ས་འཛིན་ཧྲིལ་པོར་གོས་དཀར་བཀླུབས། །
དབྱིག་འཛིན་དགའ་མ་གཅེར་བུར་ལུས། །
དལ་འགྲོས་ཆུ་ཤེལ་ཁང་བཟང་བསྐྲུན། །
གྲང་ངད་ཆེ་བའི་དགུན་ཟླ་ཡོལ། །
ཁ་བའི་ན་བཟའ་ཕུད་ཅིང་གནས། །
ས་གཞིར་ཚ་དྲོད་འཕེལ་བའི་དུས། །
རྒྱུགས་ཆུ་ལྷུང་ལྷུང་དལ་གྱིས་བཞུར། །
གཞན་གསོས་བུ་མོས་དཔྱིད་དཔལ་བསུས། །
སྐྱེ་སྟོབས་དཔལ་གྱིས་ཕྱུག་པའི་དུས། །
ས་བོན་འདེབས་ལས་བྱེད་པར་བྲེལ། །
ངལ་གསོའི་དུས་ཁོམ་དཀོན་པ་འདི། །
དཔྱིད་ཀྱི་ཐུན་མིན་རང་གཤིས་ཨེ། །
རྟག་ཏུ་ལས་འགོ་རྩོམ་གནས་འདིའི། །
དཔེ་ཟླར་དཔྱིད་དཔལ་གྱུར་དོན་ནི། །
ཞིང་པས་གཙོས་པའི་ངལ་རྩོལ་པས། །
ཐམས་ཅད་དོན་དུ་བརྩོན་པས་སོ། །
གངས་མ་ཆར་གྱི་དྲག་རྒོལ་འོག །
སྙིང་སྟོབས་མི་ཉམས་ལས་སུ་གཞོལ། །
གང་སར་འུར་སྒྲས་ཁྱབ་པའི་དཔྱིད། །
ཕ་ཡུལ་ཉིད་ལ་སྦྱར་ནས་བཤད། །
མལ་ལས་ལངས་ཤིང་ཁྱིམ་ལས་ལས། །
ཇ་འཐུང་སྤགས་བཟས་བྱས་པ་ན། །
སྲོག་ལ་ཉེས་སྐྱོན་མེད་པ་ཡིས། །
རྟག་ཏུ་རྩམ་པ་ཁོ་ནར་བརྟེན། །
དེ་ལྟར་རྒྱུན་དུ་བརྟེན་པ་ན། །
འདང་ངེས་འཚོ་བཅུད་མེད་ན་ཡང་། །
མ་འོངས་ཆེད་དུ་དམིགས་པ་ནི། །
ཕ་མས་གཙོས་པའི་ཡུལ་མིའི་བློ། །
དཔྱིད་དུས་ས་བོན་འདེབས་པ་དང་། །
སྟོན་དུས་འབྲས་བུ་སྨིན་པ་གཉིས། །
རྒྱུ་འབྲས་བསླུ་བ་མེད་པའི་ཆོས། །
བདེན་དཔང་བྱེད་པའི་གནས་ལུགས་རེད། །
དཔྱིད་ནི་སྔོ་ལྗང་བསྐྲུན་པའི་སྐབས། །
གསར་སྐྱེས་ནུས་པ་མངའ་བའི་དུས། །
འབད་བརྩོན་གྲོགས་སུ་བླངས་ཙ་ན། །
བྲག་རི་འབིགས་པར་ཐེ་ཚོམ་མེད། །
གཞོན་པའི་ཤེད་དང་རྒན་པོའི་ཇུས། །
མཉམ་ལས་བྱས་ཤིང་ལས་ལ་ཞུགས། །
དུས་ཁོམ་མེད་ཅིང་བྲེལ་ཟིང་ཆེ། །
དཔྱིད་ཀྱི་ཕ་ཡུལ་རྣམ་པ་དག །
སེམས་ཀྱི་འཆར་ཡན་ནང་དུ་འཁོར། །
སྐད་ཆའི་སྒྱུ་རྩལ་ལམ་ནས་འཚོ། །
ངག་གི་ཕོ་ཉ་ཡི་གེར་ཕབ། །
འདི་དག་ཕ་ཡུལ་ཉིད་ཀྱི་དཔྱིད། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། ཚེ་བརྟན་རྒྱལ་པོ།
