༄༅། །ཚིགས་བཅད་འཆར་སྣང་ལད་མོ། །

ཆུང་རྒྱུགས་དམག་སར་འགྲོ་བའི་བུ། །

སྨྱུ་གུའི་མཚོན་ཆ་ཕྲག་ཏུ་ཁུར། །

ནང་སའི་བོད་ལྗོངས་དམའ་འབྲིང་ལ། །

སློབ་སྦྱོང་བྱེད་པའི་བསྐལ་བ་འདུག །

ཆུང་རྒྱུགས་གཡུལ་སར་ཆས་པའི་བུ། །

རྒྱལ་ཕམ་གང་འདྲ་བྱུང་ན་ཡང་། །

རྒྱལ་ཁབ་སྲིད་ཇུས་བཟང་པོ་ཡིས། །

འོས་འགན་སློབ་གསོའི་གོ་སྐབས་བསྩལ། །

འབྲིང་རྒྱུགས་རྒྱུགས་རར་ཆས་པའི་དུས། །

གནས་ཚད་དཔོག་པའི་རྒྱུགས་གཞི་མང་། །

སྣ་མང་ཤེས་ཡོན་ཚད་ལོན་གྱིས། །

མཐའ་མའི་གྲུབ་འབྲས་མི་གཅིག་པ། །

འབྲིང་རྒྱུགས་སྐྱེས་བུ་རབ་འབྲིང་ཐ། །

རབ་ནི་གཙོ་གནད་མཐོ་འབྲིང་འགྲིམ། །

འབྲིང་གིས་དཀྱུས་མའི་སློབ་འབྲིང་ཞུགས། །

ཐ་མས་ཨ་མའི་པང་དུ་ལོག །

མཐོ་རྒྱུགས་རྒྱུགས་རར་འགྲན་དུས་སུ། །

དུས་དང་རྣམ་ཀུན་བརྩོན་འགྲུས་ཀྱི། །

ཅང་ཤེས་རྟ་ཕོ་སྐུལ་བྱེད་ན། །

སློབ་ཆེན་སྒོ་ལ་བདག་པོ་མེད། །

གཞུང་ཞབས་མི་ཚེའི་རྒྱུགས་ཆེན་འདི། །

སློབ་ཆེན་སློབ་མའི་འགྲན་ར་ཡིན། །

རང་རང་ཤེས་འཇོན་མི་འདྲ་བ། །

མི་ཚེའི་འཚོ་ཐབས་སྣ་མང་ཡིན། །

རྒྱུགས་གང་ལེགས་འབྲས་མ་བྱུང་ཡང་། །

སེམས་ཤུགས་ཆག་ནས་མ་བསྡད་པར། །

མི་ཚེའི་སྣ་མང་ལམ་བུ་རུ། །

རང་འཚམ་འཇོན་ནུས་འཚོལ་ཞིག་ཨང་། །

གཞོན་ནུའི་དུས་བཟང་ལང་ཚོའི་རྒྱན། །

ཕ་མ་ཁོ་ནར་རེ་བ་ཁྲེལ། །

རང་ལམ་རང་གིས་གཏོད་བཞིན་དུ། །

རང་མགོ་ཐོན་པར་གྱིས་ཤིག་ཨང་། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། བོན་བསྟན་འཛིན།