འཇིག་རྟེན་འདི་རུ་ཨ་མ་གཅིག་པུ་བཟང་ཞེས་པའི་སྙན་འཇེབས་ཀྱི་འགྱུར་ཁུགས་འདི་ངའི་རྣ་བར་ཐོས་ཐེངས་རེར། ཨ་མའི་བྱམས་བརྩེའི་ཞལ་རས་ངའི་ཡིད་ལ་དབང་མེད་དུ་འཁོར་ཞིང་། ནམ་ཡང་འཇལ་ཐབས་མེད་པའི་ཨ་མའི་གཅེས་སྐྱོང་དང་ཐུགས་ཁུར་དེ་ཝ་ལེར་དྲན་བྱུང་།
བདག་གི་ཨ་མ་ནི་ཞིང་གྲོང་གི་བུད་མེད་དཀྱུས་མ་ཞིག་ཡིན། ད་ལོ་སོ་བརྒྱད་ལས་སོན་མེད་ནའང་། མོའི་གདོང་ལ་གཉེར་མ་ཟབ་མོ་མང་པོ་བབས་ཡོད། ཁོ་མོའི་སྨྱུག་མའི་ཚུགས་དྲུག་ལྟར་དྲང་ཞིང་ཕྲ་བའི་གཟུགས་པོའང་ཅུང་ཡོན་པོར་འགྲོ་བའི་སྣང་བ་སྟེར། ངའི་མིག་ལམ་དུ་ཨ་མའི་བཞིན་རས་ཟླ་བའི་དཀྱིལ་འཁོར་ལ་བྱམས་བརྩེའི་འཛུམ་མདངས་རྒྱས་ཤིང་། ཁོ་མོའི་བྱ་རྒོད་ཀྱི་གཤོག་པ་བརྐྱངས་པ་ལྟ་བུའི་སྨིན་མའི་ལོག་ནས་ཁྲ་ཆུང་མིག་གཉིས་འཛུམ་དམུལ་དམུལ་བྱེད་ཅིང་། ཡིད་ཆེས་དང་རེ་ལྟོས་ཀྱི་མིག་ཟུང་ཀེམ་ཀེམ་དུ་གཡོ།
ངའི་ཨ་མ་ནི་སྤྱིར་བཏང་གི་བུད་མེད་བཟོ་བ་ཞིག་ཡིན། ནངས་སྔ་ལངས་དང་དགོང་ཕྱི་ཉལ་བྱས་ཏེ་བཟོ་བྱེད་པ་ནི་མོས་འོས་འགན་དུ་བརྩིས་ཏེ། སྔ་དྲོ་དུས་ཚོད་ཆུ་ཚོད་ལྔ་དང་དགོང་མོར་དུས་ཚོད་ཆུ་ཚོད་གཉིས་དང་ཕྱེད་ཀ་བར་ལས་ལ་བརྩོན་པ་ཡིན། འདི་ལས་ངས་མཛངས་མའི་ཡོན་ཏན་བརྒྱད་ལས། ལས་ལ་བརྩོན་ཞིང་ལས་འབྲས་བཟང་བ་ཞེས་པ་དེ་ཉམས་སུ་མྱོང་ཐུབ།
ང་སློབ་ཆུང་སློབ་རིམ་དྲུག་པ་ཡིན་པའི་སྐབས་ཀྱི་ཉིན་ཞིག་ལ། ཨ་ཕ་རྫོང་ལ་སོང་ནས་ཅ་ལག་མང་པོ་ཉོས་ཡོད་པ་མ་ཟད། ང་ཚོ་ལ་གྱོན་གོས་རེ་ཉོས་ཡོང་མོད། འོན་ཀྱང་ང་རང་གྱོན་ཆས་དང་ཟ་རྒྱུ་ལ་དེ་འདྲ་སྤྲོ་བ་མེད་པས། ངས་ཨ་ཕ་ལགས། ཁྱོད་ཀྱིས་ང་ལ་སློབ་སྦྱོང་གི་མཁོ་ཆས་ཏེ། སྨྱུག་སྒམ་དང་དཔེ་ཁུག་བློ་འབབ་ཅིག་ཉོས་ན་ཅི་མ་རུང་ཞེས་བཤད་པ་ན། ཨ་ཕ་ཁ་ཁུ་སིམ་མེར་ཅང་མི་སྨྲ་བར་ལུས་མོད། ཨ་མས་གཞི་ནས་དོན་ཞིག་གི་ཧ་གོ་སོང་བ་ལྟར་གཅེས་ཕྲུག་ཨ་མ་རྫོང་ལ་འགྲོ་དུས་ཉོ་ངེས་ཡིན་ཟེར། ངས་རྒྱུན་དུ་ཨ་མ་རྗོང་ལ་འགྲོ་བར་རེ་སྒུག་མང་དུ་བྱས་མོད། ཨ་མ་ཁྱིམ་ལས་ཙག་ཙིག་དང་བཟོ་ལས་སྣ་ཚོགས་ལ་མགོ་འཁོར་ནས་ཡུན་རིང་ལུས། ཉིན་ཞིག་ཨ་མ་སློབ་གྲྭའི་སྒོ་འགྲམ་དུ་འཛུམ་ཤིག་ཤིག་གིས་ལག་ལ་དཔེ་ཁུག་ཞིག་བཟུང་ནས་ང་སྒུག་འདུག་པས། ང་རང་རི་དྭགས་ཀྱིས་སྒྲ་སྙན་ཐོས་པ་དང་རྨ་བྱས་འབྲུག་སྒྲ་ཐོས་པ་ལྟ་བུའི་དགའ་འབོད་དང་གནམ་ལྡིང་ས་ལྡིང་བྱེད་ཞོར་ཨ་མའི་འགྲམ་དུ་ཡོང་།
མི་ཚོས་བཤད་ན། ཨ་མའི་བྱམས་བརྩེ་ནི་ཉི་མའི་དྲོད་ཁོལ་དང་འདྲ་ཟེར་བ་ནི་བདེན་པ་བདེན་དྲང་གི་སྐད་ཆ་ཞིག་ཡིན་པ་ངས་ཚོར་བས་མྱོང་ཐུབ། ཨ་མའི་ཞལ་རས་ཉི་མའི་དཀྱིལ་འཁོར་འདྲ་བ་ནས་བྱམས་བརྩེའི་ཟེགས་མ་འཇོ་བས་ངའི་སློབ་སྦྱོང་གི་དཀའ་སྡུག་དང་གྲང་འཁྱགས་ཀྱི་སྡུག་བསྔལ་འཇོམས་འགྲོ་ལ། ཨ་མའི་ཞལ་རས་ཟླ་བའི་དཀྱིལ་འཁོར་འདྲ་བ་ནས་སེམས་གསོ་དང་རེ་འབོད་ཀྱི་བསིལ་ཟེར་ལྷུང་བས་ང་ལ་སྔར་ལས་བློ་སྤོབས་དང་ཡིད་ཆེས་ཀྱི་སྙིང་སྟོབས་སྦྱིན།
ངའི་བསམ་པའི་བརྩེ་དུངས་ཀྱི་རྩིག་ལྡེབས་ངོས་སུ་ལྷམ་མེར་བཀྲ་བའི་དྲན་འཛིན་གྱི་རི་མོ་སྟེ། ལོ་ཟླའི་རླུང་འཚུབ་ཀྱིས་བསུབ་མི་ཐུབ་ཅིང་དུས་ཀྱི་ཆར་ཆུ་ཡིས་འཇིག་མི་ནུས་པ་ནི་ཨ་མའི་ཞལ་རས་རེད་ཨང་། །
