放大
缩小
默认སྔོན་སེང་གེ་ཞིག་དང་རི་བོང་ཞིག་རྒྱུན་དུ་འགྲོགས་ཤིང་ཡུལ་གཅིག་ཏུ་འཚོ་བཞིན་ཡོད་པས་ན། སེང་གེ་རང་བཞིན་གྱིས་ང་རྒྱལ་དང་སྟོབས་ཆེ་སྟབས། སེང་གེས་ནམ་རྒྱུན་རྒྱུ་མཚན་ཡོད་མེད་ལ་མ་བལྟོས་པར་རི་བོང་ལ་བརྙས་བཅོས་ཡང་ཡང་བྱེད་བཞིན་ཡོད། དེ་ལྟར་དུས་ཡུན་རིང་པོ་འདས་རྗེས། རི་བོང་ཡང་འུ་ཐུག་ཅིང་ཁོང་ཁྲོ་ལངས་ཏེ། ཁོས་དགྲ་ཤ་ཇི་ལྟར་ལེན་མིན་ཐད་བསམ་བློ་བཏང་མཐར། ཁོ་ལ་ཐབས་ཤེས་ཡག་པོ་ཞིག་རྙེད། ཁོས་དེ་ལྟར་སེང་གེའི་འགྲམ་དུ་ཕྱིན་ནས། གཅེན་པོ་སེང་གེ་ལགས། གནས་འདི་དང་རྒྱང་ཐག་མི་རིང་བའི་ས་ཞིག་ན། གཅེན་པོ་རང་དང་ཆ་འདྲ་བའི་སེམས་ཅན་འཇིགས་སུ་རུང་བ་ཞིག་གིས་ང་དང་སྟོབས་འགྲན་ནུས་ན་སྟོབས་འགྲན། དེ་ལྟར་མ་ཡིན་ན་སྡར་མའོ་ཞེས་ཟེར་མཁན་ཞིག་མཆིས་ཞེས་སྨྲས་པར། རི་བོང་གི་སྐད་ཆ་ཐོས་རྗེས་སེང་གེ་ང་རྒྱལ་གྱིས་མ་བཞག་པར། སེམས་ཅན་འདི་འདྲ་ཞིག་ག་པར་འདུག ཁྱོད་ཀྱིས་ང་ཁྲིད་དང་། ང་ཁོ་དང་སྟོབས་འགྲན་པར་བྱའོ་ཞེས་ཟེར།
རི་བོང་གིས་སེང་གེ་ཤིན་ཏུ་གཏིང་རིང་བའི་ཁྲོན་པ་ཞིག་གི་འགྲམ་དུ་ཁྲིད་དེ། འཇིགས་སུ་རུང་བའི་སེམས་ཅན་དེ་ཁྲོན་པ་འདིའི་ནང་ན་གདའོ་ཞེས་བཤད། སེང་གེ་དེའི་ཁར་སོང་བ་ན། ཆུ་ནང་དུ་གསལ་བའི་རང་གི་གཟུགས་བརྙན་དེ་རི་བོང་གིས་བཤད་པའི་སེམས་ཅན་འཇིགས་སུ་རུང་བ་དེ་རེད་སྙམ་སྟེ། ཁོས་སྐད་ཆ་དྲིས་ན་ཆུ་ནང་གི་གཟུགས་བརྙན་དེས་ཀྱང་མཆུ་ཏོ་ཀྲབ་ཀྲབ་བྱེད་ལ། ཁོས་མཆེ་བ་གཙིགས་པ་ན་ཆུ་ནང་གི་གཟུགས་བརྙན་དེས་ཀྱང་མཆེ་བ་གཙིགས་པ་སོགས་གང་ལྟར་སེང་གེས་རྣམ་འགྱུར་ཅི་ཞིག་བསྟན་ཡང་དེས་ཀྱང་དེ་ལྟར་ལད་མོ་བྱེད་པས། སེང་གེ་ང་རྒྱལ་དང་ཞེ་སྡང་གིས་མ་བཞག་པར། ཁྲོན་པའི་ནང་དུ་མཆོངས་པ་ན་མཐར་རང་སྲོག་ཤོར་བ་དང་། བློ་རིག་བཀྲ་བའི་རི་བོང་དེ་གཡུལ་ལས་རྣམ་པར་རྒྱལ་ཏེ། དུས་དེ་ནས་བཟུང་ཁོ་ལ་བརྙས་བཅོས་བྱེད་མཁན་མེད་པར་གྱུར། །
དམངས་སྒྲུང་ལས་དྲངས།
放大
缩小
默认
