ཤེས་རབ་བཟང་པོའི་མཚོན་ཆ་རྣོ་ན་ཡང་། །བརྩོན་འགྲུས་ལག་པའི་ཤེད་དང་མ་སྦྲེལ་ན། །གཏི་མུག་དགྲ་ཡི་མགོ་གཅོད་མི་ནུས་པས། །ཤེས་བརྩོན་ཟུང་འབྲེལ་བྱེད་དགོས་སློབ་གྲོགས་ཚོ། །ཞེས་པ་ལྟར་དུས་སྐབས་ཀྱི་གོམ་བགྲོད་དང་བསྟུན་ནས་ན་ཟླ་ཚོ་ལམ་ལ་ཆས། དབྱར་གསུམ་གྱི་མེ་ཏོག་དང་ལྷན་དུ་ན་ཟླ་ཚོ་ལམ་ལ་ཆས། མཐོ་རྒྱུགས་ཀྱི་ཅོང་སྒྲ་གྲགས་ཟིན་པས་ང་ཚོ་ལམ་ལ་ཆས་རན།
གནའ་མིའི་ཁ་དཔེར། མི་ལ་བརྩོན་འགྲུས་ལྡན་འགྱུར་ན། །འཇིག་རྟེན་འདི་ན་དཀའ་བ་མེད། །ཅེས་པ་ལྟར་ང་ཚོ་ནི་ཐང་དཀར་རྒོད་པོ་དང་གཉིས་སུ་མེད། དགུང་ཨ་སྔོན་ནི་ང་ཚོའི་གར་སྟེགས་དང་། གཤོག་ཟུང་ནི་ང་ཚོའི་འབད་བརྩོན་དང་ཡིད་ཆེས་ཡིན་ནོ། །
བྱ་ཁུ་བྱུག་མོན་ལ་འཕུར་ཡང་སླར་ལོག་པའི་དུས་ཤིག་ཡོད། སྟོན་དུས་ལོ་མ་ས་ལ་ལྷུང་ཡང་སླར་སྐྱེས་པའི་དུས་ཤིག་ཡོད། མཛེས་ཤིང་ལྟ་ན་སྡུག་པའི་མེ་ཏོག་སྐམ་ཡང་སླར་བཞད་པའི་དུས་ཤིག་ལོས་ཡོད། འོན་ཀྱང་། དུས་ཚོད་ནི་དྲག་ཏུ་འབབ་པའི་ཆུ་ཀླུང་ཞིག་དང་འདྲ་བར་ཤུགས་ཀྱིས་མདུན་དུ་རྒྱུག་པ་ལས་ཕྱིར་ལྡོག་པའི་གོ་སྐབས་ནི་ནམ་ཡང་མ་མཆིས་པས་ང་ཚོས་ནམ་ཡང་དུས་ཚོད་འཕྲོ་བརླག་ཏུ་མི་གཏོང་བར་སློབ་ལ་བརྩོན་རྒྱུ་ནི་ང་ཚོ་ན་གཞོན་ཚོའི་ཕྲག་སྟེང་དུ་བབས་པའི་འོས་འགན་ཡིན།
ཕུགས་བསམ་ནི་ཕ་མས་ང་ཚོར་སྤྲད་པའི་འོས་འགན་ཞིག་མ་ཡིན་ལ། མཐོ་རྒྱུགས་སྐབས་ཀྱི་སྐར་གྲངས་ནི་དེ་བས་མིན། གསེར་ས་འོག་ཏུ་གནས་ཀྱང་འོད་ནམ་མཁར་འཕྲོ་ཞེས་པ་ལྟར་སྐྱེ་བོ་ཞིག་ལ་ཤེས་བྱ་ཡོན་ཏན་ཇི་ལྟ་བུ་ཞིག་ཡོད་པ་ནི་དེའི་ལུས་ཀྱི་བྱ་སྤྱོད་དང་ངག་གི་གཏམ་ལས་གསལ་པོར་ཤེས་ཐུབ་པས་ང་ཚོས་སྤྱོད་ཡོན་གཉིས་ལྡན་གྱི་སློབ་མ་ཞིག་ཅིས་ཀྱང་འབད་དགོས་སོ། །
གྲོག་མཁར་དང་ནི་སྦྲང་རྩི་ལྟར། །ཟླ་བ་ཚེས་པ་ཡར་གྱི་ངོ་། །རྒྱལ་པོའི་ནོར་དང་སྤྲང་པོའི་ནོར། །ཅུང་ཟད་ཅུང་ཟད་བསགས་པས་འཕེལ། །ཞེས་པ་ལྟར་ཕུགས་བསམ་ནི་རྒྱ་མཚོ་ཆེན་པོའི་རླུང་ཤུགས་ལ་བརྟེན་ནས་མདུན་བསྐྱོད་བྱེད་པའི་གྲུ་གཟིངས་དང་འདྲ་བར་དཀའ་སྤྱད་འབད་བརྩོན་བྱེད་པ་ནི་ཡར་ཐོན་ཡོང་བའི་རྨང་གཞི་ཡིན་པས་ང་ཚོ་མཉམ་དུ་འབད། ང་ཚོ་མཉམ་དུ་མདུན་དུ་བསྐྱོད་ནས་རང་ཉིད་ཀྱི་ཕུགས་བསམ་མངོན་འགྱུར་ཆེད་ཤེས་བྱའི་གནས་ལ་འབད་བརྩོན་བྱེད་དགོས་སོ། །
ལྷ་ས་མཐོ་འབྲིང་གཉིས་པའི་ལོ་རིམ༣（༡༢）
ཟུར་ཁྲིད་དགེ་རྒན། པད་སྐྱིད།
