ད་ལོའི་དཔྱིད་ཀའི་དུས་སུ། །
རེ་བས་བཏབ་པའི་མེ་ཏོག །
སྟོན་ཁ་མ་ཟིན་གོང་ནས། །
སད་དང་བ་མོས་བཅོམས་སོང་། །
ཆུ་མོ་ཡར་ཀླུང་གཙང་པོར། །
སེམས་འཕྲིན་ཕོ་ཉ་བཏང་ཡང་། །
དགའ་མ་ཡིད་འཕྲོག་ལྷ་མོས། །
འཕྲིན་ལན་གང་ཡང་མ་བྱུང་། །
གནས་བཟང་གཉན་ཆེན་ཐང་ལྷར། །
དར་ཚོན་སྣ་ལྔ་གསོལ་ཡོད། །
བསྔོ་སྨོན་བྱིན་རླབས་བདག་པོས། །
རླུང་རྟའི་དངོས་འགྲུབ་སྩོལ་རོགས། །
དབུས་ཀྱི་བར་སྐོར་ལམ་ན། །
མི་ཚོགས་གྲོག་མའི་ཚང་བཞིན། །
སྙིང་ཆུང་དམར་པོའི་དབུས་ན། །
དགའ་མ་ཁྱེད་ལས་མིན་འདུག །
སྟོན་མཇུག་རི་ཀླུང་གང་སར། །
འདབ་དྲུག་ཁ་བས་རྒྱན་སོང་། །
བུ་ངའི་སེམས་ཀྱི་ལྷ་མོ། །
ལྷང་ལྷང་སེམས་ནང་དྲན་འོང་། །
ཤེས་རིག་སློབ་གསོའི་གྲོང་དུ། །
བློ་གསལ་བུང་བ་འཁོར་བྱུང་། །
བཤེས་གཉེན་པད་མའི་བདུད་རྩི། །
ཤེས་དཔལ་གླིང་གི་རྒྱན་ཆ། །
ཤར་ཕྱོགས་སྤྲིན་བཟང་དཀར་པོ། །
ང་རང་སྒུག་ཙམ་གནང་དང་། །
བྱང་གི་གཞིས་ཁྱིམ་དྲོན་མོར། །
དྲན་པའི་ཡིག་ཆུང་བསྐུར་ཡོད། །
ཁྱོད་ནི་མོན་གྱི་ཁུ་བྱུག །
ང་ནི་དཔྱིད་དཔལ་གཞོན་ནུ། །
ནམ་ཟླ་མ་གྲང་གོང་དུ། །
རེ་བའི་མཇལ་འཕྲད་ལོས་ཡོད། །
སྟོན་མཇུག་དུས་ཀྱི་མཐའ་ལ། །
འདབ་ལོ་ཤིང་དང་བྲལ་སོང་། །
སང་ལོའི་དཔྱིད་ཀྱི་དུས་སུ། །
གཤིན་སའི་བཅུད་དུ་སྨིན་ཤོག །
ཉམས་ཆུང་བདག་གི་མཛའ་མོ། །
དབང་མེད་དུས་ཀྱིས་འཕྲལ་སོང་། །
བྲལ་ནས་ལོ་མང་སོང་ཡང་། །
སེམས་ནས་བསུབ་ཐབས་མིན་འདུག །
འཁོར་བ་ལས་ཀྱི་ཐང་ལ། །
སེམས་མཐུན་ངང་པ་ཆ་འགྲིག །
ལས་དབང་བཙན་པོ་ཞིག་གིས། །
མཉམ་གཤིབ་སྐལ་བ་མ་བྱུང་། །
ཧ་ཅང་དྲན་པས་གཟིར་ནས། །
སེམས་འཕྲིན་ཡི་གེར་བརྐོས་ཡོད། །
ལས་ཀྱི་བསྐོས་ཐང་ཡོད་ན། །
འཁོར་བའི་གྲོང་ནས་མཇལ་ཡོང་། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། བོན་བསྟན་འཛིན།


