ནམ་མཁའ་གློ་བུར་དུ་འཐིབས་ནས་འབྲུག་སྒྲ་ལྡིར་ལྡིར་དུ་གྲགས། ཆར་པ་ཆེན་པོ་ཞིག་བབས་པའི་རྗེས་སུ། སྤྲིན་ནག་གི་ཡོལ་བ་དལ་གྱིས་ཕྱེ་ནས་ཉི་མའི་གསེར་མདོག་གི་བཞིན་རས་རིམ་གྱིས་མངོན། ས་གཞི་ཆེན་པོའི་སྟེང་ནས་རླངས་པ་འཕྱུར་ཞིང་སྨུག་པར་གྱུར་ནས་ནམ་མཁར་སྐྱོད་བཞིན་འདུག
ཤར་ཕྱོགས་ཀྱི་མཚམས་ནས་དར་ཚོན་སྣ་ལྔ་དང་མཚུངས་པའི་འཇའ་ཚོན་ཞིག་ཤར་བྱུང་། འཇའ་ཚོན་དེ་ནི་རི་མོ་མཁན་ཞིག་གིས་དཀར་སེར་དམར་ལྗང་ལ་སོགས་པའི་ཚོན་གྱིས་ལེགས་པར་བྲིས་པའི་རི་མོ་ལྟར་མཛེས་ཤིང་ལྟ་ན་སྡུག་ལ། སྣེ་གཅིག་ཆུའི་ནང་དུ་ཟུག་ཅིང་། སྣེ་གཅིག་རྩྭ་ཐང་དུ་ཟུག་འདུག
ངས་ཉིན་མོ་ཆར་པ་བབས་པའི་རྗེས་སུ་འཇའ་ཚོན་ཤར་བའི་རྒྱུ་མཚན་མ་ཤེས་པར། ཚན་རིག་རྒྱུན་ཤེས་སྐོར་གྱི་དཔེ་དེབ་མང་པོར་བལྟས་པ་ན། དེའི་རྒྱུ་མཚན་གསལ་པོ་ཤེས་བྱུང་། དེ་ནི་ཆར་པ་བབས་མ་ཐག་པའི་རྗེས་སུ། ཉི་མའི་འོད་ཟེར་མཁའ་དབུགས་ནང་གི་ཆུ་རྡུལ་ཕྲ་མོ་མང་པོའི་ཐོག་ལ་འཕྲོས་པ་ན། སྡེབ་འཕྲོ་དང་ལྡོག་འཕྲོ་བྱུང་ནས་ཉི་འོད་གྲུབ་ཆའི་ཚོན་མདོག་དམར་པོ་དང་། དམར་སེར། སེར་པོ། ལྗང་ཁུ། སྔོན་པོ། སྔོ་སྐྱ། སྨུག་པོ་སོ་སོར་ཕྱེ་ནས་བྱུང་བ་ཡིན། དེ་འདྲ་ཡིན་ཕྱིར་འཇའ་ཚོན་འཆར་བའི་ཁ་ཕྱོགས་ནི་ཉི་མའི་ལྡོག་ཕྱོགས་ཡིན་ཏེ། སྔ་དྲོར་ནུབ་ཕྱོགས་སུ་འཆར་བ་དང་། ཕྱི་དྲོར་ཤར་ཕྱོགས་སུ་འཆར་གྱི་ཡོད། འཇའ་ཚོན་གྱི་མདོག་བཀྲ་མིན་ནི་མཁའ་དབུགས་ནང་གི་ཆུ་རྡུལ་གྱི་ཆེ་ཆུང་ལ་རགས་ལས་པས། ཆུ་རྡུལ་ཆེ་ན་འཇའ་ཚོན་ཧ་ཅང་བཀྲ་བ་དང་། ཆུ་རྡུལ་ཆུང་ན་འཇའ་ཚོན་དེ་ཙམ་བཀྲག་ཆེན་པོ་མེད།
ནམ་མཁའི་སྤྲིན་ཚོགས་རིམ་བཞིན་ཡལ་བ་དང་། འཇའ་ཚོན་གྱི་སྣེ་མོ་ཡང་རིམ་བཞིན་ཇེ་མཐོར་སོང་སྟེ་ནམ་མཁའི་སྤྲིན་དཀར་དང་འདྲེས། ངའི་སེམས་ལ་མི་ཞིག་གིས་རང་གི་མི་ཚེ་གང་པོ་ཁ་དོག་སྣ་ལྔ་འཛོམས་པའི་འཇའ་ཚོན་བཞིན་དུ་མཛེས་སྡུག་ལྡན་པ་ཞིག་ཏུ་བསྒྱུར་འདོད་ན། ཆུང་དུས་ནས་ལེ་ལོ་རྣམ་གཡེང་གི་བྱ་སྤྱོད་རིང་དུ་དོར་ཞིང་། ཤེས་རབ་ཀྱི་རྟ་ཕོར་བརྩོན་འགྲུས་ཀྱི་ལྕག་གིས་བསྐུལ་ཏེ་ཤེས་བྱའི་ཐང་ཆེན་དུ་བརྒྱུགས་ན། མི་ཚེ་འདི་གཞི་ནས་འཇའ་ཚོན་བཞིན་ཁ་དོག་རྣམ་པར་བཀྲ་བ་ཞིག་ཏུ་འགྱུར་སྲིད་སྙམ་བྱུང་། །
བོད་ལྗོངས་ཉིན་རེའི་ཚགས་པར་ལས་དྲངས།
