༄༅། །ཁ་བ་དང་འབྲེལ་བའི་དྲན་འཆར།

ཁ་བ་ནི་རྨི་ལམ་ཞིག་གི་དྲན་ཤིང་ཡིན། ཁ་བ་ནི་ཆུ་རྡུལ་ཞིག་གི་གྲུབ་ཚུལ་རེད། ཁ་བ་ནི་རང་བྱུང་ཁམས་ཀྱི་ཆེས་མཛེས་སྡུག་ལྡན་པའི་དག་ཞིང་ལ་དཀར་འོད་ཀྱི་གོས་དཀར་བཀླུབས་པའི་རྨད་བྱུང་ངོ་མཚར་གྱི་ཕོ་ཉ་དེ་རེད། ཁ་བ་ནི་ང་རྒྱལ་དང་ཕྲག་དོག་གིས་མ་བསླད་ཅིང་གཡོ་སྒྱུ་དང་འདོད་ཧམ་གྱིས་མ་བཅིངས་པའི་ཞི་འཇམ་དྭངས་གཙང་གི་རང་གཅུན་ཐུབ་པའི་གཤེར་གཟུགས་ཤིག་གི་ངོ་བོ་ཡིན། ངོ་བོ་དེའི་གྲུབ་དོན་ལ་ང་རང་ཧ་ཅང་འཐད་ལ། ངོ་བོ་དེའི་ཁྱད་གཤིས་ལ་ཁོ་བོ་རབ་ཏུ་མོས། རྒྱུ་མཚན་དང་གནས་ལུགས་ཅི་ཡང་མི་ཤེས་པའི་ལོ་ན་ཕྲ་དུས་ཤིག་ནས། ང་རང་ཁ་བ་ལ་དཔེ་མེད་ཅིག་དགའ་ཞིང་། དོན་དམ་པར་ཡང་། ང་ནི་རི་མཐོ་ཞིང་ས་གཙང་བ་དང་ཁ་བ་འབབ་སའི་ཡུལ་ལུང་ཞིག་ནས་ནར་སོན་པས་ཡིན་ཤས་ཆེ། གང་ལྟར། རྒྱུ་རྐྱེན་སྣ་ཚོགས་ཤིག་གིས་ང་ནི་ཁ་བ་ལ་དགའ་ཞིང་ཁ་བས་བསྐྲུན་པའི་བྱ་དངོས་དང་། ཁ་བ་དང་འབྲེལ་བའི་གཏམ་རྒྱུད་དག་ནི་ཆེས་གླེང་རིན་ཡོད་པའི་ཕྱིར་དྲན་ཞིག་གི་ཐོ་ཡིག་ཏུ་བརྐོས་པ་ཡིན།

ཁ་བ་འབབ་པའི་དུས་ཚིགས་རེ་རེ་ནི་རེ་སྒུག་ཅིག་གི་དུས་ཆད་ཡིན་པས་སྤྲོ་སྣང་ཁད་ཁད་ཅིག་གི་དབུ་ཁྱུད་ཀྱང་དེ་དུས་བྲིས་པ་བདེན་ལ། སྐབས་དེ་དུས་ཀྱི་གཏམ་རྒྱུད་ཅིག་གི་འབྱུང་རྐྱེན་ཡང་ཁ་བ་བུ་ཡུག་འཚུབ་པའི་སྲུབས་ཀ་ནས་བརྡོལ་ཞིང་། བརྗེད་མི་གཏུབ་པའི་རྨི་ལམ་ཞིག་གི་གཤོག་ཟུང་ཡང་ཁ་བའི་མེ་ཏོག་གི་འདབ་མ་ལྷབ་ལྷུབ་ཏུ་འབབ་པའི་ཉིན་མོ་ཞིག་ལ་བརྐྱངས་པ་ཡིན་སྟབས། ཁ་བ་ནི་ཆེས་མཛེས་སྡུག་ལྡན་པའི་ང་ཡི་ནང་སེམས་ལ་ལྷད་མེད་ཀྱི་དངོས་གྲུབ་སྩོལ་མཁན་གྱི་ལྷ་རྫས་འཁྲུལ་མེད་ཅིག་ཏུ་བསྒོམས་ཡོད། ཁ་བ་འབབ་པའི་ཡུལ་གྲུ་དེ་ན། གཞན་ཕན་དང་སྙིང་རྗེའི་ཉི་འོད་ཕྱོགས་བཅུར་འཕྲོས་ཤིང་། དེ་ཡི་འོད་ཟེར་ལ་ལོངས་སྤྱོད་མཁན་དག་ནི་ནམ་ཡང་བདག་འཛིན་གྱི་རྩ་བ་བཅད་ནས་གཞན་ཕན་གྱི་ལས་ལ་བརྩོན་མཁན་ཉིད། ཁ་བ་འབབ་སའི་ཡུལ་གྲུ་དེ་ན། དྲི་མ་ཡལ་བའི་བརྩེ་བ་ཞིག་གི་འོ་ཆུ་ཕྱོགས་ཀུན་ཏུ་རྒྱུ་ཞིང་། དེ་ཡི་འོ་ཆུ་ལ་ལོངས་སུ་སྤྱོད་མཁན་གྱི་སྲོག་ལྡན་གང་དེ་སྐྱེས་སྟོབས་ཀྱི་ཤེས་རབ་འཕེལ་ཞིང་ཉོན་མོངས་ཀྱི་རྩ་བ་འཇོམས་པར་བྱེད་པའི་བསོད་ནམས་ཀྱི་སྣོད་དུ་ཤོང་ཡོད་ལོས་ཆེ། དེ་ལ་ཁ་བ་ཅན་ཞེས་ཧ་ཅང་ཡིད་དུ་འཐད་ལ་རྣ་བར་སིམ་པའི་མིང་ཞིག་ཀྱང་བཏགས་ཡོད།

དཀར་བོང་བོང་གི་ཁ་བ་ནི་རྟེན་འབྲེལ་ཞིག་གི་མཚོན་དོན་ཡང་རེད་ཨང་། དགུན་གྱི་ཚེ་ན། གནའ་ནས་ད་ལྟའི་བར་ཁ་བས་ཐལ་རྡུལ་གྱིས་ཟིན་པའི་ང་ཚོའི་ས་གཞི་ལ་བྱབས་ཁྲུས་ཐེངས་གཅིག་བྱས་ཚེ། ཁོར་ཡུག་ཐམས་ཅད་དཀར་གཙང་ངེར་བཏང་ནས་རིམས་ནད་གང་ཞིག་གི་མགོ་བོ་མནན་ཏེ། ནད་མེད་ཞི་བདེའི་འཚོ་བ་ཞིག་ལྷོད་ཀྱིས་རོལ་ཆོག་སྟེ། དེ་ལ་དངུལ་དཀར་གྱི་ཞིང་ཁམས་དང་ཞི་བདེ་ཡི་འཚོ་བ་ཞེས་བོས་ནའང་ཆོག ཁ་བ་ནི་ང་ཚོའི་ཐུན་མོང་གི་དངོས་གྲུབ་ཅིག་ཏུ་སྒོམ་ཆོག་ལ། བྱ་བ་ཆེ་ཕྲ་གང་ཞིག་གི་མགོ་རྩོམ་དུས་ཁ་བ་འབབ་པ་ནི་རྟེན་འབྲེལ་ཁྱད་པར་བ་ཞིག་ལ་ངོས་འཛིན་བྱེད་པས། མ་གཞི་ནས་ཁ་བ་ནི་ང་ཚོ་དང་བར་ཐག་ཆེས་ཉེ་ཞིང་། རྟག་པར་སེམས་ཁོང་ན་བཀྲ་ཤིས་པའི་འདུ་ཤེས་ཤིག་གིས་ཀུན་ནས་བསླངས་ཙ་ན། རྟེན་འབྲེལ་གྱི་ཁ་བ། ཞི་བདེ་ཡི་ཁ་བ། དངོས་གྲུབ་ཀྱི་ཁ་བ། ཕ་ཡུལ་གྱི་ཁ་བ། ངའི་སེམས་དབུས་ཀྱི་ཁ་བ་ཁྱེད་རྟག་ཏུ་བབས་ན་བསམས་བྱུང་།

ཁ་བ་ནི་ངའི་དྲན་པའི་ངོས་སུ་ལྷད་མེད་ཀྱི་བག་ཆགས་འཇོག་པའི་དྭངས་གསལ་གྱི་མེ་ལོང་ཞིག་རེད་ཨང་། ལོ་ཟླའི་གཙང་པོ་ཇི་ལྟར་བཞུད་ནའང་། ངས་ད་དུང་ཁྱེད་ཀྱིས་ང་ལ་བཞག་པའི་དྲན་པ་རབ་རིབ་ཅིག་གི་འདས་དོན་ཆུ་ལ་བསྐུར་མ་མྱོང་ཞིང་། རླུང་ལ་སྤུར་མ་མྱོང་ལ། མེ་ལའང་མ་བསྒྲོན་པར། ངའི་སེམས་ཀྱི་ཟབ་ས་ཞིག་ནས་ཁ་རོག་གེར་སྦས་ཏེ། སྙན་ངག་གི་ཚུལ་དུ་ཚོར་བས་བཀླགས་ཤིང་བདུད་རྩི་ཞིག་གི་ཚབ་ཏུ་དལ་གྱིས་འཐུང་བ་ཡིན། བི་ཤྭ་ཀརྨའི་པིར་རྩེ་ལས་ཕྱུངས་པའི་ཡིད་འོང་གི་རྣམ་པ་ཞིག་གི་ཟོལ་གྱིས་ཡང་ནས་བསྐྱར་དུ་བཀླགས་ཏེ། དྲན་པའི་རྩིག་ལྡེབས་སུ་ཁྱེད་རང་ཉིན་བྱེད་ཀྱི་འོད་ཟེར་དང་བསྡོངས་ཏེ་དཀར་ལམ་ལམ་གྱིས་འབབ་པར་བློས་བསླངས་བྱས་ནས། གང་དྲན་དྲན་གྱི་བགྱི་བ་སྣ་ཚོགས་ཤིག་ཡི་གེ་དང་རི་མོའི་ལམ་ནས་མཚོན་པར་བྱས། དེ་ལྟ་ན། ཁ་བ་ཁྱེད་ནི་ངའི་སེམས་ཀྱི་མངའ་ཐང་ཡིན་ལ། ཡིད་སྤྲུལ་གྱི་མཆོད་པ་ཡིན། བླ་ན་མེད་པའི་ལེགས་སྐྱེས་ཡིན་ལ། སྙན་ངག་གི་བརྗོད་སྙིང་དང་། དྲན་གདུང་གི་གཉེན་པོའང་ཡིན་ལགས།

ཁ་བ། ང་རང་ཁྱེད་དང་རིང་དུ་བཀྱེད་དུས། ངས་ཁྱེད་རང་དབྱངས་གསལ་གྱིས་དྲན་པར་བརྒྱུས་པ་ཡིན། ཁ་བ། ང་རང་ཁྱེད་ཀྱི་ཉེ་སར་བཅར་དུས། ངས་ཁྱེད་རང་ལུས་སེམས་ཀྱི་ཚོར་བས་མྱངས་པ་ཡིན། ཁ་བ། ཁྱེད་ནི་ང་ཡི་སེམས་ངལ་བྱོ་སའི་གནས་མལ་ཡིན། ཁ་བ། ཁྱེད་ནི་ང་ཡི་ནང་སེམས་གླན་སའི་བདུད་རྩི་ཡིན། ཁྱེད་རང་ནམ་ནམ་ཞར་ཞར་དུ་ང་ཡི་ཤ་གསེང་རུས་གསེང་ལ་ཐིམ་ན་ཅི་འདྲའི་སྐྱིད་ཨང་། །