ཕ་ཡུལ་དུ་ལོག་མཁན་ཚོས། འཛུམ་ཤིག་ཤིག་གིས་ཟམ་པར་བྱིལ་བྱིལ་གནང་བཞིན་འདུག ཕ་ཡུལ་དང་གྱེས་མཁན་ཚོས། གཉོམ་དུང་དུང་གིས་ཟམ་པར་རླུང་དར་སྒྲོན་བཞིན་འདུག
ཟམ་པ་དེ། ལོ་ན་བགྲེས་པའི་ཟམ་པ་དེར། སུ་ཞིག་གིས་སྐུ་ཚེ་ཧྲིལ་པོའི་མཐུན་རྐྱེན་སྦྱར་བ་ཡིན། སུ་ཞིག་གིས་ཉིན་མཚན་གྱི་སོ་ཁ་བཤགས་ཏེ་བརྩིགས་པ་ཡིན། གལ་ཏེ་ཆེད་མངགས་ཟམ་པ་སྐྲུན་མཁན་ཞིག་ཡོད་ན། ཁོང་གི་མཚན་ལ་ཅི་ཞིག་ཞུའམ། ཁོས་ཕྱོགས་ལས་རྣམ་རྒྱལ་གྱི་རྟེན་དུ་དགོན་པའམ་མཆོད་རྟེན་ཞིག་མ་བཞེངས་པར། ཕ་ཡུལ་གྱི་གཙང་པོའི་སྟེང་ཟམ་པ་ཞིག་རྒྱག་རྒྱུ་ཇི་ལྟར་དྲན་པ་ཡིན། ཟམ་པའི་སྟེང་ནས་འགྲོ་དུས། ངས་འདི་ལྟར་བསམས། ཟམ་པ་སྔར་བཞིན་གཙང་པོའི་རླབས་ཤུགས་ཀྱིས་མི་ཁོག་པར། ས་གཞིའི་བྲང་ཁོག་ནས་ཅི་འདྲའི་གོ་ཆ་བརྟན། ཅི་འདྲའི་རྔམ་ཞིང་བརྗིད།
ཟམ་པ་འདིས་ངལ་རྩོལ་པ་ཚོའི་ཟུངས་ཁྲག་གི་དྲི་ངད་གྱོན་ནས། མི་རབས་རེ་རེའི་རྐང་འོག་ནས་ག་ལེར་ཟད་བཞིན་འདུག་པས། ཁྱེད་ནི་ཕྱི་རབས་པ་དག་གི་བསོད་ནམས་ཀྱི་བགོ་སྐལ་དང་། སྙིང་སྟོབས་ཀྱི་དར་ཆ་ཡིན། བྱིས་པ་ཚོས་ཟམ་པ་འདི་མཐོང་དུས། ཨ་མའི་གནའ་གཏམ་ལ་ཡིད་སེམས་གླན་ནས། རྐང་ཆུང་མགྱོགས་སུ་བཏང་ཡོད་སྲིད། ཟམ་པ་འདི་བརྒྱུད། དབྱངས་གསལ་སོ་བཞིའི་གཡུ་ཆུང་མགུལ་ལ་བཏགས་ནས། སློབ་ར་གྲུ་བཞིར་འབྱོར་ཡོད་སྲིད། ཐག་རིང་གི་ཡུལ་གྱར་བ་ཚོས་ཟམ་པ་འདི་དྲན་དུས། ཕ་ཡུལ་གྱི་རི་ཀླུང་དང་ཕ་མ་དྲན་སྲིད། ཆུང་དུས་ཀྱི་བབ་ཆགས་པའི་འཚོ་བ་དྲན་སྲིད། ཟམ་པ་འདི་བརྒྱུད། རྒྱང་རིང་དུ་མཐིང་མདོག་གི་རྨི་ལམ་འཐུ་རུ་ཐོན་པའང་དྲན་སྲིད།
ཟམ་པ། ཕ་ཡུལ་གྱི་ཟམ་པ། ཁྱེད་ལ་ཉིན་མོར་སྐྱོ་རོགས་མེད་ཅིང་མཚན་མོར་སྡོང་གྲོགས་མེད་ཀྱང་། ཁྱེད་ཀྱི་ཁོག་པར་ཅི་ཡང་གཤོང་བའི་བློ་གཤོགས་ཡོད། ཁྱེད་ཀྱིས་འགྲུལ་པར་མཐོ་དམན་གྱི་དབྱེ་བ་འབྱེད་ཀྱིན་མེད། ཁྱེད་ཀྱི་སྒལ་ཚིགས་ཀྱིས་ཚེ་སྲོག་ཁྲི་སྟོང་གི་ང་རྒྱལ་དང་ལྗིད་ཚད་བཏེགས་ཡོད།
ཟམ་པས་རང་ཉིད་ཀྱི་ཐུ་འོག་ནས་བཞུར་བའི་གཙང་པོའི་ལོ་རྒྱུས་དང་། ཤང་ཤང་གི་འགྱུར་ཁུག་སྙན་མོ་སེམས་ན་ཉར་ཡོད་ཀྱང་། གཙང་པོའི་འགོ་ཁུངས་ཅི་ལ་ཐུག་ཞིང་ཡུལ་ལུང་གང་དུ་འབབ་མིན་ལ་སྣང་འཇོག་བྱེད་མི་སྲིད། ཟམ་པས་རང་ཉིད་ཀྱི་ལས་གནས་ཁོ་ན་མིག་འབྲས་བཞིན་སྲུང་ནས་ཡུན་རིང་འགོར། ཡུན་རིང་འགོར། སྔོ་ཆལ་ཆིལ་གྱི་གཙང་པོ། དུས་ཚོད་མཉམ་དུ་སྔ་མོ་ཞིག་ནས་རྒྱ་མཚོར་འདྲེས་ཟིན་པས། གཙང་པོས་ཀྱང་ཟམ་པའི་ངོ་གདོང་དུ་ལྗིད་ཏིག་གེར་བབས་པའི་སེམས་ངལ་ལ་ཁྲེལ་དགོད་ཡེ་ནས་བྱེད་མ་མྱོང་། ཟམ་པ་འཚོ་ཞིང་གནས་པའི་སྙིང་པོ་ནི། རྦ་ལོང་རབ་ཏུ་འཕྱུར་བའི་གཙང་པོ་རྒྱང་རིང་ལ་བསྐུར་ཏེ། མི་རྟ་འཕྲུལ་གསུམ་གྱི་ཕེབས་ལམ་བདེ་བར་བཤང་རྒྱུ་དེའོ།
གློ་བུར་དུ་ཟམ་པ་གསར་པ་ཞིག ང་ཚོའི་མིག་ལམ་ན་ལྷམ་མེ་ལྷན་ནེར་ཐོན་བྱུང་། བསླུ་བྲིད་དང་ལོངས་སྤྱོད་ཀྱིས་བཏེགས་པའི་ལོ་ཟླ་བཞིན་དངངས་འདར་ཡམ་ཡོམ་གྱིས་ཐོན་བྱུང་། དུས་རབས་ཀྱི་གླུ་དབྱངས་གྱེར་བའི་རྟོག་ལྗོངས་ནས། སུ་ཞིག་འ་ཆད་འུ་ཐུག་ངང་ཧད་དེ་ལུས་ཡོད་དམ། སུ་ཞིག་ཕར་ལྟ་ཚུར་ལྟ་ཡི་ལྟད་མོར་རོལ་ཡོད་དམ། ཡིན་ནའང་ཕ་ཡུལ་གྱི་ཟམ་པ་འདིས། མེས་པོའི་རུས་པ་བཞིན་མཁྲེགས་པའི་ཟམ་པ་འདིས། མཇུག་མ་འགྲིལ་བའི་རང་ཉིད་ལྷག་མ་ཞིག་མུ་མཐུད་ནས་འབྲི་ཆེད། སྔར་བཞིན་ཕ་ཡུལ་གྱི་འགྲམ་ངོགས་དང་འགྲམ་ངོགས་ཡུག་གཅིག་ཏུ་སྦྲེལ་བའི་མཚམས་སུ་འགྲེང་སྟེ། མི་ཁ་དང་མཆིལ་ཞགས་ལ་སྡང་མ་མྱོང་ལ། སྡུག་ཡུས་དང་འུར་བསྟོད་སྣ་ཚོགས་ཁྲོད་འཚོ་མི་འདོད། དེ་བས་དུས་གཏན་གྱི་ངལ་གསོ་ཞིག་ལའང་རེ་སྨོན་འཆང་མེད། ཕ་ཡུལ་གྱི་ཟམ་པ། ཁྱེད་རང་འདི་ལྟར། སྙིང་རྗེ་དང་གཏོང་ཕོད་ཀྱི་ནམ་མཁའ་ལ་ཁེན་ནས་ཆས་བྱུང་།
ཟམ་པ་ལགས། ཁྱེད་ཀྱི་གཟུགས་དང་ཆ་ཤས་རེ་རེར། ཡང་ན་ཁྱེད་ཀྱི་ཕྱི་ནང་གསང་གསུམ་ལ་སྐྲ་ལོ་རླུང་ཁར་ཟད་པའི་མེས་པོ་ཚོའི་གཟུང་གཞུག་འཚོས་ཡོད་ལ། ཕྱི་རབས་པའི་རྡོག་སྒྲ་འཚབ་འཚུབ་ཀྱི་འདུར་རྒྱུག་དང་། ངུ་ངག་ལྷང་ལྷང་གི་གླུ་སྒྲ་ཡང་ཐིམ་པ་གོར་མི་ཆག
དེས་ན་ཆུ་གྲོལ་ན་ཟམ་པ་ག་ལེར་བཞུགས་ཞེས་ཟེར་མི་ཉན། ལོ་ཟླ་རེ་རེ་བཞིན་གཙང་པོས་རྒྱང་རིང་ནས་རྒྱང་རིང་དུ་ཁུར་དུས། དེང་སང་ཕ་ཡུལ་གྱི་མི་ཚོས་བདེ་སྡུག་ཁུར་དུ་བཟོད་པའི་ཟམ་པའི་ཡོན་ཏན་འབའ་ཞིག་རྟོགས་ཤིང་རྗེས་སུ་སྒོམ་མཁན་ཇེ་མང་རེད། ཟམ་པ་རྒས་གཉེར་ཀློང་དུ་ཐིམ་བཞིན་ཡོད་ཀྱང་། བསྐྱར་བཟོའི་འདུ་འགོད་ནམ་ཡང་འཇགས་ཀྱིན་མི་འདུག ཟམ་པར་ཕྱོགས་ཏེ་ཤབ་ཤུབ་སྨྲ་མཁན་ཆད་ཀྱིན་མི་འདུག ཟམ་པར་བསྟོད་པའི་སྙན་ངག་ཀྱང་གཞོན་ནུ་མ་ཞིག་གི་མིག་ཟུང་ལྟར་འོད་ཆེམ་ཆེམ་དུ་འགུལ་བཞིན་འདུག
ཕ་ཡུལ་དུ་ལོག་མཁན་ཚོས། འཛུམ་ཤིག་ཤིག་གིས་ཟམ་པར་བྱིལ་བྱིལ་གནང་བཞིན་འདུག ཕ་ཡུལ་དང་གྱེས་མཁན་ཚོས། གཉོམ་དུང་དུང་གིས་ཟམ་པར་རླུང་དར་སྒྲོན་གྱིན་གདའ། །
