གོམས་འདྲིས་ཆེ་བའི་ཐ་སྙད་དག་ནི། ནང་མི་སྤུན་མཆེད་དང་འདྲ་བར། དེ་འདྲའི་སྙིང་ལ་སྡུག་ཨང་། ཐ་སྙད་རྙིང་དྲི་འཚུབ་འཚུབ་རེ་ཐུག་དུས། ཡུན་རིང་མ་འཕྲད་པའི་གྲོགས་པོ་ཞིག་དང་ཐུག་པ་ལྟར་སྙིང་ལྷག་ཏུ་ཉེ། མཐོང་མྱོང་མེད་པའི་ཐ་སྙད་གསར་པ་རེ་ཐུག་དུས། ཁ་འབྲས་མཚར་བའི་མཛེས་མ་ཞིག་ལ་ཐུག་པ་ལྟར་སེམས་རབ་ཏུ་འཚབ། མ་གཞི་ཞིབ་པར་བསམས་ན། རིང་མིན་ཐུང་མིན་གྱི་མི་ཚེ་ནི། གསར་མིན་རྙིང་མིན་གྱི་ཐ་སྙད་ཚོ་དང་འགྲོགས་ནས་ཡོད་ཨང་།
སྙིང་ཉེ་བའི་ཐ་སྙད་རེ་རེའི་གྲིབ་གཟུགས་ཁྲོད་ནས། མེས་པོ་ཚོའི་མཚར་སྡུག་འོད་སྟོང་འཕྲོ་བའི་སྔོན་ཆད་བཀླགས་ཐུབ་ལ། ཡིད་དུ་འོང་བའི་ཐ་སྙད་རེ་རེའི་ངོ་གདོང་ནས། ཕྱི་རབས་ཚོའི་ངོ་མཚར་རྨད་དུ་བྱུང་བའི་མ་འོངས་མཐོང་ནུས།
ཁ་པར་གྱི་འཆར་ཤེལ་ངོས་ཀྱི་ཐ་སྙད་དག་འོད་ཀྲིག་ཀྲིག་བྱེད། དཔེ་ཆའི་ཤོག་ལྷེའི་འདབས་ཀྱི་ཐ་སྙད་དག་སྣུམ་ཤིག་ཤིག་བྱེད། ཡིག་གཟུགས་མི་འདྲ་བ་སྣ་ཚོགས་པའི་ཐ་སྙད་དག་གི་མཛེས་སྡུག་ཉམས་སུ་མྱོང་སྐབས། ཆ་ལུགས་མི་འདྲ་བའི་རིགས་ཀྱི་སྤུན་ཟླ་ཞེ་གཅིག་གིས་སྐོར་བྲོ་ལིང་ལིང་འཁྲབ་ཀྱིན་པའི་སྣང་བ་འཆར་ལ། ནང་དོན་མི་འདྲ་བ་སྣ་ཚོགས་པའི་ཐ་སྙད་དག་གི་རོ་བཅུད་ཡིད་ལ་སིམ་སྐབས། ཡུན་རིང་སྐོམ་པས་གདུང་པའི་བྱེ་ཐང་གི་འགྲུལ་བཞུད་པར་ཡན་ལག་བརྒྱད་ལྡན་གྱི་ཆུ་བོ་ཤང་ཤང་དུ་རྒྱུག་པ་ཞིག་དང་འཕྲད་པའི་སྣང་བ་སྟེར།
ལྟོགས་པ་དང་སྐོམ་པ། ངལ་བ། ཡིད་མུག་པ། དེ་བཞིན་སྐྱོ་བ་དང་འཁྲེང་བ། དྲན་པ། བློ་ཕངས་པ། སྟོང་ལྷང་ལྷང་དང་ཡུལ་ཡུལ་པོའི་གནས་སྐབས་མཐའ་དག་ལ། རང་གིས་ཅི་ཡང་མི་ནུས་ཤིང་། ཡུན་ཐུང་གི་མི་ཚེ་འདི་ལྟར་སྟོང་ལ་ཟད་པའི་གདུང་བ་དྲག་པོས་མནར་དུས། ཐ་སྙད་ཀྱི་ཚོགས་ནི་ཡོད་ཚད་ལ་སེམས་གསོ་ནུས་པ་དང་། ཐམས་ཅད་ལ་དྲིས་ལན་འདེབས་ནུས་པའི་ནོར་བུ་དགོས་འདོད་ཀུན་འབྱུང་འབའ་ཞིག་དེའོ། །
