ཕུགས་བསམ་ནི་ང་ཚོ་སློབ་མ་ཞིག་གི་ངོས་ནས་བཤད་ན་མདུན་ལམ་དང་འབྲེལ་བ་ཆེན་པོ་ལྡན་པའི་གནད་དོན་ཞིག་རེད། གལ་སྲིད་ཕུགས་བསམ་མེད་ན་མི་དེ་ནི་རེ་བ་དང་ཁ་ཕྱོགས་བོར་བའི་ལོང་བ་ཞིག་དང་གཅིག་པ་རེད་ཅེས་ཤོད་སྲོལ་ཡོད། ངའི་ངོས་ནས་བརྗོད་ན་འཇིག་རྟེན་འདིར་སླེབས་ནས་ཕུགས་བསམ་མི་འདྲ་བ་གསུམ་འབྱུང་མྱོང་།
༢༠༡༦ལོར་ང་རང་ཐེངས་དང་པོར་སློབ་གྲྭར་ཞུགས། ཐེངས་ཤིག་དགེ་རྒན་ཞིག་གིས་ང་ཚོར“ཕྲུ་གུ་ཚོ། ཁྱོད་ཚོས་བལྟས་ན་ཕྲུ་གུ་ཞིག་ལ་ངེས་པར་དུ་ལྡན་དགོས་པའི་ཆ་རྐྱེན་གང་ཡོད”ཅེས་དྲིས་སོང་། སློབ་མ་ཚོས“སློབ་སྦྱོང་རེད”ཅེས་བཤད། འོན་ཀྱང་ངའི་སེམས་སུ“མི་སེམས”རེད་བསམ་བྱུང་། དགེ་རྒན་གྱིས་སློབ་མ་ཚོའི་སྐད་ཆའི་མཇུག་རྫོགས་ལ་མ་རྫོགས་ཀྱི་མཚམས་སུ། “འོ་ཡ། རེད། དང་པོ་མི་སེམས་རེད། གཉིས་པ་རིག་གནས་རེད། གསུམ་པ་ཕུགས་བསམ་རེད”ཅེས་གསུངས། ངས“ཕུགས་བསམ”ཞེས་པའི་ཡིག་འབྲུ་གཉིས་པོ་དེ་དེ་དུས་ཐེངས་དང་པོར་ངོས་འཛིན་ཐུབ་པ་ཡིན། ངས་རང་གི་ཕུགས་བསམ་དམག་མི་ཞིག་ཏུ་གྱུར་ན་བསམ་མྱོང་། ང་དམག་མི་ལ་ཧ་ཅང་དགའ། ཁོང་ཚོའི་ལུས་རྩལ་དང་སྙིང་སྟོབས་དེ་ཚང་མས་མིག་དཔེ་བྱེད་འོས་པ་ཞིག་ལོས་ཡིན། དེ་དུས་རྒན་ལགས་ཀྱིས་ང་ལ“ཁྱོད་ཀྱི་ཕུགས་བསམ་གང་ཡིན”ཞེས་འདྲི་སྐབས། ངས་ཚམ་ཚོམ་མེད་པར“དམག་མི་ཡིན”ཞེས་ལན་འབུལ་མྱོང་། ལོ་གཅིག་གི་རྗེས་ཙམ་ལ་ང་རང་སློབ་གྲྭ་འབྲི་རུ་ལ་བསྒྱུར་བ་དང་། ཐེངས་དང་པོར་འབྲི་རུར་འབྱོར་སྐབས་ང་ཧང་སངས་བྱུང་། ངས་གྲོང་ཁྱེར་རྒྱ་ཆེན་དེ་འདྲ་མཐོང་བ་ཐེངས་དང་པོ་ཡིན། སློབ་གྲྭའི་ཁོར་ཡུག་ཧ་ཅང་གཙང་བ་མ་ཟད། སློབ་གྲྭ་དེར“ནོར་ནག་གི་སྙིང་སྟོབས”ཞེས་པའི་དཔའ་མི་ཞུམ་པའི་སྙིང་སྟོབས་ཤིག་སློབ་གྲྭའི་རིག་གནས་ཚུལ་དུ་ཁྱབ་བསྒྲགས་བྱེད་བཞིན་ཡོད་པས། དེ་ངའི་ཕུགས་བསམ་དང་གཤིས་ཀ་གཉིས་བར་ཤིན་ཏུ་འཚམ་སྣང་ཤར།
འོན་ཀྱང་ང་ལོ་རིམ་གསུམ་པའི་སྐབས་སུ་ངའི་ཕུགས་བསམ་དང་པོ་དེ་སྟོང་བསམ་ཡིན་པ་གཞི་ནས་རྟོགས། མི་གཞན་གྱིས་ལབ་པ་ལྟར་ན། ལུས་ལ་རྨ་དང་ནད་གཞི་ཡོད་པའི་མི་ཡིན་ན་དམག་མིར་འགྲོ་རྒྱུ་མེད་ཟེར། སྐབས་ཤིག་རིང་ངའི་སེམས་པ་སྐྱོ་སྣང་གིས་ཡོངས་སུ་མནར། ངས་དེ་དོན་ཨ་ཁུ་ལ་ཞུ་སྐབས། ཨ་ཁུས“དེ་ངོ་མ་རེད”ཟེར། ལོ་རིམ་བཞི་པར་སླེབས་སྐབས་ང་རང་ནག་ཆུར་སྤོ་ལོ་རྒྱག་པར་འགྲོ་རྒྱུའི་གོ་སྐབས་ཤིག་ཐོབ་པ་དང་། དེའི་རྗེས་སུ་ངའི་ཕུགས་བསམ་ནི་ལུས་རྩལ་དགེ་རྒན་ཞིག་བྱེད་རྒྱུ་དེ་ཡིན།
སློབ་ཆུང་ལས་ཐོན་རྗེས། སློབ་ཁང་ནང་གི་སློབ་མ་ཚང་མས་མིག་ཆུ་བཏང་ནས་དགེ་རྒན་དང་ཁ་འབྲལ་འདོད་མི་བྱེད་ཅིང་། སློབ་གྲོགས་ཚོས“རྗེས་མ་ང་ཚོ་མང་ཙམ་ལྷན་དུ་འགྲོ་ཆོག་གི་རེད”ཅེས་གཅིག་གིས་གཅིག་ལ་སེམས་གསོ་བྱས།
ཟླ་བ་དགུ་པ་སླེབས་པ་དང་ང་རང་སློབ་འབྲིང་དུ་སླེབས། ཐོག་མར་སློབ་འབྲིང་དུ་སླེབས་པ་དང་ཕར་ལྟ་ཚུར་ལྟ་བྱེད་སྐབས་གཡས་གཡོན་ལ་ངོ་ཤེས་པ་མང་པོ་འདུག འོན་ཀྱང་དེ་ལོར་ང་གཟུགས་པོའི་ནད་གཞིས་རྐྱེན་པས་སྨན་ཁང་དུ་ཐེངས་དུ་མ་སོང་། ཐ་ན་རྒན་ལགས་འུ་ཐུག་སྟེ“གལ་སྲིད་ཡུན་རིང་ནད་དགོངས་ཞུ་དགོས་ཚེ་ཐད་ཀར་སློབ་གྲྭ་ནས་ངོ་སྤྲོད་བྲིས་ཏེ་ཡར་ཞུ་བྱས་ན་འགྲིག ཁྱོད་ཡོང་མ་ཐུབ་ན་མ་ཡོང་ན་ཡང་ཆོག”ཅེས་གསུང་མྱོང་།
སློབ་འབྲིང་ལོ་རིམ་གཉིས་པའི་སྐབས་སུ་ང་ཚོ་འཛིན་གྲྭ་བརྗེས་པ་དང་། འཛིན་བདག་ཚེས་གསུམ་ཞེས་པ་ཞིག་འཕྲད། ཁོང་ནི་ཕ་ཡུལ་འབྲི་རུ་ནས་ཡིན་ཞིང་། རྒྱུན་དུ་ང་ཚོ་སློབ་མ་ཚོར་ཀུན་སྤྱོད་ཀྱི་སློབ་གསོ་ཞེ་དྲག་རྒྱག་གི་ཡོད། ད་དུང་རྒན་དགའ་བཟང་དང་། ཚེ་རིང་གཡང་འཛོམས། ཤེས་རབ་ཕུན་ཚོགས་སོགས་སློབ་ཁྲིད་གནང་མཁན་ཡིན་པས་ཧ་ཅང་དགའ་པོ་བྱུང་། ཁོང་ཚོས་ང་ལ་སློབ་ཁྲིད་བྱེད་པ་མ་ཟད་ཡིད་ཆེས་ཀྱང་ཆེན་པོ་གནང་གི་ཡོད།
དེ་དག་ལས་རྒན་དགའ་བཟང་ནི་ངའི་ངོས་ནས་བཤད་ན་མི་རླབས་ཆེན་ཞིག་ཡིན། རྒྱུ་མཚན་ནི་ཁོང་གིས་ཉིན་ལྟར་ང་ཚོར་རྩོམ་ཡིག་འབྲི་རྒྱུ་བསྐུར་བ་དང་། རྩོམ་བསྡུས་ནས་བཅོས་བརྒྱབ་ཚར་རྗེས་ཡུལ་གཞན་གྱི་དུས་དེབ་དང་ཚགས་པར་སོགས་ཀྱི་ཐོག་ཏུ་སྐུར་རོགས་བྱས་ཏེ་སློབ་མ་ཚོར་རྩོམ་ཡོན་ཏོག་ཙམ་རག་ཐབས་བྱེད། དཀའ་ངལ་ཡོད་པའི་སློབ་མར་ཐུགས་ཁུར་ཟབ་བཞེས་གནང་གི་ཡོད་པས། ངའི་ཕུགས་བསམ་གསུམ་པ་ནི་དགེ་རྒན་ཁོང་དང་འབྲེལ་བ་ངེས་ཅན་ཡོད།
ངའི་ཕུགས་བསམ་གསུམ་པ་ནི་གཞན་ལ་རོགས་པ་བྱེད་རྒྱུ་དང་། དབུལ་ཕོངས་དངུལ་མེད་པ་ལ་སྒོར་མོ་བསགས་ནས་སྦྱིན་པ་གཏོང་རྒྱུ་དེ་ཡིན། དཀའ་ངལ་ཇི་ལྟར་འཕྲད་ཀྱང་ངས་རང་ཉིད་ཀྱི་ཕུགས་བསམ་དེའི་ཆེད་དུ་དཀའ་བ་སྤྱད་དེ་མངོན་འགྱུར་ཐུབ་པ་བྱེད་ངེས་ཡིན། དུས་རྒྱུན་དུ་ངས་ཕུགས་བསམ་ཞེས་པ་ནི་སེམས་ཤུགས་སྐྱེ་བྱེད་ཀྱི་རྒྱུ་རྐྱེན་གཙོ་བོ་ཞིག་ཏུ་ངོས་འཛིན་གྱི་ཡོད་པས། མི་ཞིག་གི་ངོས་ནས་ཕུགས་བསམ་ལྡན་རྒྱུ་ནི་ཤིན་ཏུ་གལ་ཆེ་ལ། དེ་ལས་གལ་ཆེ་བ་ནི་ཕུགས་བསམ་ཆེད་དུ་འབད་བརྩོན་ལྷོད་མེད་བྱད་པའི་ངང་རྒྱུན་དེ་ཡིན་པས། ང་ལ་ཕུགས་བསམ་དོན་འཁྱོལ་ཡོང་བའི་ཆེད་དུ་དཀའ་བ་སྤྱོད་པའི་ཆོད་སེམས་ཡོད། །
འབྲི་རུ་རྫོང་སློབ་འབྲིང་དང་པོའི་ལོ་རིམ༩（༦）
ཟུར་ཁྲིད་དགེ་རྒན། དགའ་བཟང་།
