«ས་སྐྱ་ལེགས་བཤད»ལས“མཁས་པ་སློབ་པའི་དུས་ན་སྡུག །བདེ་བ་འདོད་ལ་མཁས་མི་སྲིད། །བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །”ཅེས་པ་ལྟར་ཕུགས་བསམ་གྱི་ཆེད་དུ་སློབ་སྦྱོང་ལ་བུང་བ་པད་ཚལ་དང་ངང་པ་མཚོ་ནང་དུ་འཇུག་པ་བཞིན་ཉིན་མཚན་ལྟོས་མེད་དུ་འབད་འབུངས་བྱེད་དགོས། གང་ལགས་ཤེ་ན། ཕུགས་བསམ་ཞེས་པའི་ཡིག་འབྲུ་གཉིས་པོ་འདི་རྣམ་ཀུན་མཐོང་སླ་ཡང་ལག་ཏུ་རག་སླ་བ་ནི་རྩ་བ་ནས་མིན། ཕུགས་བསམ་ནི་ངའི་སློབ་སྦྱོང་གི་ངར་ཤུགས་འབྱུང་སའི་གཞི་མ་དང་། ཕུགས་བསམ་ནི་ཉིན་བྱེད་སྒྲོན་མེ་གཅིག་དང་འདྲ་བར་ངའི་རྨོངས་མུན་གྱི་འཇིག་རྟེན་དེ་འོད་ཟེར་སྟོང་ལྡན་གྱིས་བཀང་ནས་མདུན་ཕྱོགས་སུ་སྣེ་ཁྲིད་བྱེད།
གོ་ལ་འདིར་འཚོ་སྡོད་བྱེད་མཁན་གྱི་སྐྱེ་བོ་ནམ་མཁའི་རྒྱུ་སྐར་ཚོགས་བཞིན་ཡོད་པ་ཁོ་ཚོ་ཚང་མར་རང་ཉིད་ཀྱི་ཕུགས་བསམ་རེ་རེ་ཡོད་ངེས་རེད། སྐྱེ་བོ་ལ་ལ་ནི་ནད་གདུང་གིས་མནར་བའི་ནད་པ་ཚོའི་ལུས་པོ་ནད་ཀྱི་འཆིང་རྒྱ་ལས་འགྲོལ་མཁན་གྱི་འཚོ་བྱེད་བཟང་པོ་ཞིག་བྱེད་འདོད། ལ་ལ་ནི་རྒྱལ་ཁབ་ལ་སྲུང་སྐྱོབ་བྱེད་མཁན་གྱི་དམག་མི་ཞིག་བྱེད་འདོད། ཡང་ལ་ལ་ནི་མི་དམངས་ལ་བདེ་སྐྱིད་ཀྱི་སྤྲོ་བ་སྦྱིན་མཁན་གྱི་ཉེན་རྟོག་པ་ཞིག་བྱེད་འདོད།
གུས་པ་རང་གི་ཕུགས་བསམ་ནི་སྐྱེ་བོའི་ཚོགས་ཀྱི་རྨོངས་པའི་མུན་པ་སེལ་མཁན་གྱི་དགེ་བའི་བཤེས་གཉེན་བཟང་པོ་ཞིག་བྱེད་འདོད་པ་དེ་ཡིན། རྒྱུ་མཚན་ཅི་ཡིན་ཞེ་ན། ང་རང་སློབ་སྦྱོང་བྱེད་པའི་བརྒྱུད་རིམ་ནང་དུ་དགེ་བའི་བཤེས་གཉེན་མང་པོ་ཞིག་དང་འཕྲད་མྱོང་། ཡིན་ནའང་ངའི་ངོས་ནས་བརྗོད་ན་བརྩེ་བ་ཆེས་ཟབ་ཤོས་ནི་བདག་གི་བོད་ཡིག་རྒན་ལགས་ཡིན། ཁོང་ལ་ཙ་རིའི་སྨྱུག་མ་དང་འདྲ་བའི་སྐུ་གཟུགས་རིང་པོ་ཞིག་མེད་རུང་སྐུ་གཟུགས་ཚད་ལྡན་ཞིག་ཡོད། གནག་ཅིང་སྣུམ་པའི་དབུ་སྐྲ་སི་ལིང་ལྗང་པ་དང་དཀར་གསལ་ཟླ་བ་དང་འདྲ་བའི་བཞིན་རས། ཐོ་རེངས་སྐར་ཆེན་ལྟ་བུའི་སྤྱན་ཟུང་དེའི་སྟེང་དུ་འཇའ་ལྟར་གུག་པའི་སྨིན་མ་མཛེས་པོ་ཞིག་ཡོད། ཁོང་ཕྱིའི་ལུས་མཛེས་པ་ཁོ་ན་མ་ཡིན་པར་ཐུགས་སེམས་ནི་གངས་དཀར་ཏི་སེ་ལྟར་མཛེས་པས་ངའི་སེམས་ནང་ཁོང་ནི་ནམ་མཁའི་ལྷ་མོ་ཞིག་དང་གཉིས་སུ་མ་མཆིས། བོད་ཡིག་རྒན་ལགས་ཁོང་གིས་ཞོགས་སྔ་ལངས་དང་དགོང་ཕྱི་ཉལ་གྱིས་སློབ་གསོའི་ལས་ལ་གཞོལ་བ་མ་ཟད་རྟག་ཏུ་སློབ་ཁྲིད་གནང་ཚར་རྗེས་སྐར་མ་གཉིས་གསུམ་ཙམ་གྱི་དུས་ཚོད་བེད་སྤྱད་ནས་ང་ཚོར་ནམ་རྒྱུན་ཕ་མར་བརྩི་འཇོག་དང་གཟའ་མཇུག་ལ་རིག་ཚན་ཁག་གི་ལས་བྱ་ཧུར་ཐག་གིས་སྒྲུབ་ཚར་རྗེས་རང་འགུལ་ངང་ནས་ཁྱིམ་ལས་ཙག་ཙིག་བྱེད་རོགས་བྱེད་དགོས་ཚུལ་དང་། ནར་སོན་རྗེས་དྲིན་ཆེན་ཡབ་ཡུམ་ལ་དྲིན་ལན་ཇི་ལྟར་འཇལ་དགོས་ཚུལ་སོགས་སྤྱོད་ཡོན་གཉིས་ལྡན་གྱི་སྐྱེ་བོ་བཟང་པོ་ཞིག་བྱེད་དགོས་པའི་རིན་བྲལ་གྱི་བསླབ་བྱ་ཡང་ཡང་གནང་གི་ཡོད་པས་ངས་ཀྱང་ཁོང་གི་བཀའ་སློབ་དེ་དག་རྡོ་བརྐོས་རི་མོ་བཞིན་སེམས་ལ་བརྟན་པོར་བཅངས་ཡོད། དབྱར་དུས་ཀྱི་ཉིན་ཞིག་ལ་གནམ་གཤིས་ཚ་བ་ཧ་ཅང་ཆེ་ཡང་ཁོང་གིས་སྐད་སངས་མཐོན་པོའི་སྒོ་ནས་སློབ་ཁྲིད་གནང་བས། ང་དང་ངའི་སློབ་གྲོགས་ཚོས་ཀྱང་བློ་རྩེ་གཅིག་སྒྲིམ་ངང་ནས་ཉན་པ་དང་ཚ་ཚ་འུར་འུར་གྱིས་ལན་བཏབ་པས་སློབ་ཁྲིད་ཀྱི་མྱུར་ཚད་ཀྱང་སྔོན་དང་མི་འདྲ་བར་སྔ་བསྣུར་གྱིས་ལེགས་འགྲུབ་བྱུང་། དེ་རྗེས་ཁོང་གིས་ང་རང་མོ་ཊའི་ནང་དུ་འཁྱགས་པ་བྱི་རིལ་ལེན་པར་བཏང་ནས་སློབ་མ་རེ་རེ་ལ་རེ་རེ་སྤྲད་བྱུང་བས། སེམས་པ་རབ་ཏུ་དགའ་ཞིང་སྐྱིད་པའི་ཚོར་སྣང་རང་ཤུགས་སུ་སྦྱིན་བྱུང་། སྐབས་དེར་ངའི་སེམས་སུ་ཁོང་ནི་ང་ཚོའི་དྲིན་ཆེན་ཨ་མ་དང་འདྲ་བའི་བྱམས་བརྩེ་ཆེ་བའི་རྒན་བཟང་པོ་ཞིག་རེད་སྙམ་བྱུང་ལ། ང་རང་ཡང་སླད་མ་འོངས་པར་ཁོང་དང་འདྲ་བའི་དགེ་རྒན་བཟང་པོ་ཞིག་ཆགས་པ་བྱ་རྒྱུའི་འདུན་པ་འགོག་མེད་དུ་འཆར་བྱུང་།
ཨེ་མ། ཁོང་ནི་མུན་ནག་ཁྲོད་ཀྱི་སྒྲོན་མེ་དང་ལྐུགས་པ་ཁ་གྲགས་ཀྱི་སྨན་བཟང་ལྟ་བུ་ཡིན་པ་མ་ཟད། ངའི་མིག་དཔེ་བཟང་པོ་ཞིག་ཀྱང་ཡིན་པས་ཁོང་གི་བཀའ་སློབ་སེམས་ལ་བརྟན་པོར་བཅངས་ནས། ཟས་བརྗེད་གཉིད་བཅག་གིས་བརྩོན་འགྲུས་ཀྱི་རྟ་ཕོ་ལ་བཅིབས་ཏེ་རང་གི་ཕུགས་བསམ་མངོན་འགྱུར་ཡོང་བ་བྱ་རྒྱུ་ཡིན། །
ལྷ་ས་ཅང་སུའུ་ཚོད་སློབ་ལོ་རིམ་༩（༢）
ཟུར་ཁྲིད་དགེ་རྒན། རིག་འཛིན་སྒྲོལ་མ།
