དབྱར་ཁ་སྤང་ལ་སྐྱེས་པའི། །སྤང་རྒྱན་མེ་ཏོག་མཚར་ཡང་། །
སྟོན་གྱི་བསིལ་རླུང་ལྡང་སྐབས། །སད་དང་བ་མོས་བཅོམ་སོང་། །
ཆར་དུས་རི་མ་འདབས་ཀྱི། །སྤེན་མའི་རང་གཤིས་རྩུབ་ཀྱང་། །
གངས་དང་ལྷགས་པས་མི་བཟོད། །ལྕགས་ཐབ་ནང་ལ་གཟིམ་སོང་། །
བྱིའུ་ཆུང་སྐད་སྙན་འདོན་པ། །དཔྱིད་ཀ་སླེབས་སོང་བསམ་བྱུང་། །
དགུན་གྱི་ཁ་བའི་གྲང་ཟུག །ལུས་སེམས་མནར་བ་མི་བརྗེད། །
ཡར་ལ་བལྟས་པས་གངས་རི། ། མར་ལ་བལྟས་པས་མཚོ་མོ། །
ལུང་ཆུང་སྦུ་སུག་དོག་ཀྱང་། །སེམས་ཀྱི་བརྟེན་ས་རང་ཡིན། །
ཁྱེད་ནི་ལ་ཁའི་ཉི་མ། །བདག་ནི་ལང་ཚོའི་མེ་ཏོག །
རྟིང་མ་བསྐྱར་དུ་མཇལ་བའི། །སྨོན་ལམ་རིང་ནས་བཏབ་ཡོད། །
ཕ་མ་དྲན་པའི་སྐྱོ་གླུ། །ཏི་སིའི་ཕྱོགས་སུ་ལེན་པས། །
གངས་རི་བེམ་པོར་གནས་ཀྱང། །གདུང་བའི་སྤྱན་ཆབ་བསིལ་བྱུང། །
དབྱར་གྱི་ལྡོག་མེད་སྙེ་གྲ། །མགོ་ལྕོག་མཐོ་མཐོ་མ་གནང་། །
ད་གཟོད་འབྲས་ལྡན་དུས་སུ། །སྔོ་ལོ་ལངས་ནས་འཕྱར་ཡོང་། །
ཟླ་བའི་དཀྱིལ་འཁོར་ཀློང་ནས། །མཛེས་ལྡན་ལྷ་མོ་མཇལ་དུས། །
ཆུང་འདྲིས་བྱམས་པར་འཁྲུལ་ཡང་། །མཉམ་འགྲོགས་སྐལ་བ་མི་འདུག །
དཔྱིད་ཀྱི་ཕོ་ཉ་སླེབས་བྱུང་། །ལྗོན་ཤིང་མྱུ་གུ་འབུས་སོང་། །
ནུབ་ཀྱི་གྲང་རླུང་ངར་མོ། །ཉི་མའི་དྲོད་ཀྱིས་བཅོམ་སོང་། །
ལས་དང་སྐལ་བ་བཟང་པོས། །སྐྱིད་པའི་ས་འདིར་མཇལ་བས། །
ཆུ་དང་ཉ་མོ་བཞིན་དུ། །ནམ་ཡང་བྲལ་མེད་སྨོན་ལམ། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། བོན་བསྟན་འཛིན།
