2024ལོར་ལྗོངས་ཡོངས་ཀྱི་ཁོར་ཡུག་མཁའ་རླུང་སྤུས་ཚད་སྤྱི་ཡོངས་ཀྱི་རྒྱུན་སྲུང་རྒྱུན་འཁྱོངས་ལེགས་སུ་ཕྱིན་ཡོད། ལྷ་ས་གྲོང་ཁྱེར་གྱི་ཁོར་ཡུག་མཁའ་རླུང་སྤུས་ཚད་རིམ་གཉིས་ཚད་གཞིར་སླེབས་པ་དང་ལེགས་པའི་ཉིན་གྲངས་ཀྱི་སྡུར་ཕྲེང་99.5%ཟིན་ནས་རྒྱལ་ཡོངས་ཀྱི་གཙོ་གནད་གྲོང་ཁྱེར་168ཁྲོད་ཨང་དང་པོར་སླེབས་ཡོད་པ་རེད། ཇོ་མོ་གླང་མའི་ས་ཁོངས་ཀྱི་ཁོར་ཡུག་མཁའ་རླུང་སྤུས་ཚད་ཀྱི་རྒྱུན་མཐུད་རྒྱུན་སྲུང་རྒྱུན་འཁྱོངས་ལེགས་པའི་རྣམ་པར་གནས་ནས་རིམ་པ་དང་པོའི་ཚད་གཞིར་སླེབས་ཡོད། གསལ་སྟོན་ལ་ལྟ་ཞིབ་ཚད་ལེན་བྱས་ན། རང་ཁུལ་གྱི་སྐྱེ་ཁམས་ཀྱི་ཁོར་ཡུག་སྤུས་ཚད་གནས་ཚུལ་སྤྱི་ཡོངས་ནས་རྒྱུན་སྲུང་རྒྱུན་འཁྱོངས་བརྟན་ལྷིང་ཡིན་པས། བོད་ལྗོངས་ནི་སྔར་བཞིན་འཛམ་གླིང་ཐོག་གི་སྐྱེ་ཁམས་ཀྱི་ཁོར་ཡུག་སྤུས་ཚད་ཡག་ཤོས་ཀྱི་ས་ཁུལ་གྲས་ཤིག་ཡིན།
ངོ་སྤྲོད་བྱས་པར་གཞིགས་ན། 2024ལོར་རང་ལྗོངས་ཀྱི་ཆུ་ཀླུང་གཙོ་བོའི་མཚོ་མཚེའུ་ཡི་ཆུ་སྤུས་རིགས་གསུམ་པའི་ཆུ་གཟུགས་ཀྱི་སྡུར་ཕྲེང་100%ལ་སླེབས་པའམ་ཡང་ན་དེ་ལས་ལེགས་པས་བཏུང་ཆུའི་ཆུ་ཁུངས་ཀྱི་སྤུས་ཚད་100%ཟིན་ཡོད་པ་རེད། ས་རྒྱུའི་ཁོར་ཡུག་གི་སྤུས་ཚད་གནས་ཚུལ་བདེ་འཇགས་ངང་གནས་ཡོད། རང་བྱུང་སྐྱེ་ཁམས་ཀྱི་གནས་ཚུལ་སྤྱི་ཡོངས་ནས་བརྟན་ལྷིང་ཡིན་པ་དང་ཁོར་ཡུག་གི་སྤུས་ཚད་སྤྱིའི་ཆར་བརྟན་པོ་ཡིན་པས་ཁོར་ཡུག་གི་སྤྱིའི་སྤུས་ཚད་ལེགས་པོ་ཡོད།
ཤེས་རྟོགས་བྱུང་བར་གཞིགས་ན། རང་ལྗོངས་ཁུལ་དུ་ལྗོངས་ཐད་གཏོགས་འབྲེལ་ཡོད་སྡེ་ཁག་གི་ཐིང་རིམ་པའི་འགོ་ཁྲིད་ཀྱི་ཙུའུ་ཀྲང་གིས་འགན་འཁུར་བའི་ལྟ་ཞིབ་ཚོགས་ཆུང་གསུམ་བཙུགས་ཡོད་པས། ས་གནས་དང་གྲོང་ཁྱེར་བདུན་གྱི་ཀྲུང་དབྱང་ཁོར་ཡུག་སྲུང་སྐྱོང་ལྟ་སྐུལ་བཅོས་སྒྲིག་བྱས་ཚུལ་ལ་ཆེད་དམིགས་ལྟ་སྐུལ་བྱས་ནས། རང་ལྗོངས་ཀྱིས་རེས་སྐོར་གཉིས་པའི་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོབ་ལྟ་སྐུལ་གྱི་བསམ་འཆར་གནད་དོན་བཅོས་སྒྲིག་དངོས་སུ་ལག་ལེན་བསྟར་ནས་ཕན་འབྲས་ཐོན་རྒྱུར་འགན་ལེན་ཐུབ་ཡོད།
བསོད་བསྟན་གྱིས་བསྒྱུར།
