དེ་ཡང་ཟང་ཟིང་ཡོ་ལང་གི་རྦ་རླབས་དྲག་ཏུ་འཕྱོ་བའི་གོ་ལའི་ཁམས་འདིའི་སྟེང་དུ་སྐྱེ་བོ་སོ་སོའི་ཁམས་དང་མོས་པ་སྣ་ཚོགས་པའི་དབང་གིས་མི་གཤིས་ཀུན་སྤྱོད་ཀྱང་འདྲ་མིན་སྣ་ཚོགས་ཤིག་ཆགས་ཡོད།
མི་གཤིས་ཟེར་བ་ནི་ཡུན་ཐུང་གི་འབད་པས་གྲུབ་པ་ཞིག་མ་ཡིན་པར་དེར་ཡུན་རིང་གི་ཉམས་ལེན་བྱས་ཏེ་གྲུབ་པ་ཞིག་ཡིན། དེ་ནི་མི་ཚེའི་ལམ་བུའི་སྟེང་གི་བྱ་བའི་ལེགས་ཉེས་དང་ལུགས་ཀྱི་བླང་དོར་འབྱེད་པའི་མིག་ཟུང་ལྟ་བུ་ཞིག་ཡིན་པས། “གོམས་གཤིས་བཟང་པོས་མི་ཚེ་དོན་ལྡན་བྱེད། གོམས་གཤིས་ངན་པས་མི་ཚེ་སྡུག་ལ་སྦྱར”ཞེས་གསུངས་པ་ལྟར་མི་གཤིས་གསོ་བར་གོམས་གཤིས་བཟང་པོ་ཞིག་མེད་དུ་མི་རུང་བའི་ངེས་མཁོའི་ཆ་རྐྱེན་ཞིག་ཡིན་ལ། གོམས་གཤིས་དེས་བསྐྱེད་པ་ནི་ལྟོས་བཅས་ཀྱི་མི་གཤིས་ཟེར་བ་དེ་ཡིན་པར་སྙམ།
བསིལ་ལྡན་ཁ་བའི་ལྗོངས་འདིར་ཤེས་རིག་གི་བློ་མིག་ཡངས་པོར་ཕྱེ་མཁན་གྱི་རྒྱ་བོད་ལོ་པཎ་རྣམས་ཀྱིས་གནས་ལུགས་བསྟན་པའི་རྩོམ་པ་ནམ་མཁར་འགྲན་པ་ཡང་། གསེར་གྱི་མདངས་ལ་འཁུ་བའི་མི་གཤིས་བཟང་པོ་ཉམས་ལེན་རྒྱུན་འཁྱོངས་མཛད་ནས་དུས་ཀུན་ཆད་པ་མེད་པའི་དཀའ་བ་སྤྱད་དེ་དངོས་ཡོད་འཚོ་བའི་བསླབ་བྱ་དང་ཉམས་མྱོང་གསོག་འཇོག་གི་ཉིང་བཅུད་ཡིན་པ་ལས་གློ་བུར་གྱི་བྱ་རྡོ་ལམ་འཕྲད་བཞིན་སྟེས་དབང་གིས་གྲུབ་པ་ནི་ག་ལ་ཡིན། འོན་ཀྱང་། འཕེལ་རྒྱས་དང་འགྲན་རྩོད་ཀྱིས་ཁེངས་པའི་ཁོར་ཡུག་ནང་དབང་ཆ་དང་རྒྱུ་ནོར། ངོ་བསྟོད་དང་མཚན་སྙན་ཁོ་ན་དོན་དུ་གཉེར་བའི་ཡམས་ནད་དེས་སྤྱི་ཚོགས་ཧྲིལ་པོར་ལྷག་བསམ་དང་བྱམས་བརྩེ། དེ་བཞིན་སྙིང་རྗེ་སོགས་ཆར་རྗེས་ཀྱི་འཇའ་ཚོན་བཞིན་ཡལ་འགྲོ་བ་ནི་ཡིད་སྐྱོ་དགོས་པའི་དོན་དངོས་ཞིག་ཀྱང་ཡིན་པ་རེད།
“བསྟོད་པས་དགའ་བར་མི་འགྱུར་ཞིང་། །སྨད་པས་མི་དགར་མི་འགྱུར་བ། །སྐྱེས་བུ་དམ་པའི་མཚན་ཉིད་ལགས”ཞེས་པ་ལྟར་ཐོལ་བྱུང་གི་ང་རྒྱལ་དང་ཞེ་སྡང་སོགས་གཅུན་སྡོམ་གང་ཐུབ་བྱས་ན་རིང་པོར་མ་ལོན་པར་རང་རྒྱུད་ཀྱི་མི་གཞི་ཀུན་སྤྱོད་ཀྱང་ཇེ་ལེགས་ཇེ་བཟང་དུ་འགྲོ་རྒྱུ་ནི་བསྙོན་དུ་མེད་པའི་ཆོས་ཉིད་ཅིག་ཡིན་པས། རང་ཚུགས་ཐུབ་པའི་གཤིས་ཀ་གསོ་སྐྱོང་བྱེད་ཤེས་ན་མི་ཚེ་དོན་ལྡན་ཞིག་རོལ་ཐུབ་པ་རེད།
དེ་བཞིན་“ཀུན་སྤྱོད་གཙང་བས་གཞན་གྱི་ཡིད་དུ་འཐད། །སྨྲ་བ་ཉུང་བས་ཕོག་ཐུག་གཡེང་བ་མེད ”ཅེས་པའི་གདམས་པ་བཞིན་འཚོ་བའི་ཁྲོད་དུ་རང་ཉིད་ཀྱི་བསམ་སྤྱོད་ལ་བསམ་གཞིག་ནན་དུ་བྱས་ནས། མི་འདང་བའི་ཆ་རྣམས་ལེགས་བཅོས་སུ་གཏོང་ཐུབ་ན་ད་གཟོད་ཀུན་སྤྱོད་ཀྱིས་མཛེས་པའི་སྐྱེ་བོ་ཞིག་དང་བྱ་གཞག་ཅི་ཞིག་བརྩམས་ཀྱང་འགལ་རྐྱེན་བར་ཆད་མེད་པར་ལམ་ལྷོང་ངང་བསྒྲུབ་ཐུབ་ཅིང་། རང་ཉིད་དྲིན་གྱིས་བསྐྱངས་པའི་བརྩེ་ལྡན་ཡབ་ཡུམ་གཉིས་ཀྱང་རང་ཉིད་ཀྱི་དཔལ་དང་ཕུན་སུམ་ཚོགས་པའི་ཡོག་ཏན་གྱིས་སེམས་ཀྱི་ཞིང་སར་རེ་འདོད་ཀྱི་སྦྲང་ཆར་འཇོ་བ་ལྟ་བུར་ཡོང་ངེས་སོ། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། བོན་བསྟན་འཛིན།
