ངའི་རྩིས་རིག་དགེ་རྒན་ནི་གཟུགས་ཅུང་ཐུང་བ་དང་། ངོ་གདོང་རིལ་ཞིང་ཟླུམ་པ། གཟུགས་ཅུང་ཙམ་རྒྱགས་པ། མིག་སྒོར་ལ་ཆེ་བ། ད་དུང་སློབ་ཁྲིད་ལ་ཕེབས་དུས་མིག་ཤེལ་ཡུ་བ་དམར་པོ་ཅན་ཞིག་བརྒྱབ་སྟེ་དཔེ་དེབ་མཆན་ལ་བཅུག་ནས་ཁྲིད་སྟེགས་སུ་འབྱོར་ན། སྐྲ་ནག་ཀྲིག་ཀྲིག་འོད་འཚེར་བས་མིག་གིས་ལྟ་མི་བཟོད་པ་ཞིག་ཡིན། ངའི་རྩིས་རིག་དགེ་རྒན་ནི་གཞན་གྱི་མིག་ལམ་དུ་མཛེས་མ་ཞིག་ཡིན་ཟེར་དཀའ་མོད། ཁོང་ལ་འདྲིས་ཤིང་ཁོང་གི་བཟང་སྤྱོད་ལ་གོམས་པའི་སློབ་གྲོགས་ཚོའི་མིག་ལམ་དུ་བྱམས་ལྡན་གྱི་མ་ལོ་བཞིན་སྙིང་དུ་སྡུག་ཅིང་བློ་འབབ་ཅིག་ཡིན་པ་གདོན་མི་ཟ།
ཁོང་ནི་ངའི་རྩིས་རིག་དགེ་རྒན་ཡིན་ལ། འཛིན་བདག་ཡང་ཡིན། ནམ་རྒྱུན་ངའི་གྲངས་རིག་མ་ཤེས་པའི་སྐབས་སུ། ང་ལ་ངོ་ནག་ནག་བྱས་ཏེ་ང་ལ་རྩིས་རིག་རྩིས་རྒྱག་ཏུ་བཅུག་པར་མ་ཟད། བོད་ཡིག་དང་རྒྱ་ཡིག དབྱིན་ཡིག་བཅས་བསླབ་བྱ་རིས་མེད་དུ་སློབ་སྦྱོང་བྱེད་དུ་འཇུག དེའི་རྐྱེན་གྱིས་ངའི་རྒྱུགས་འབྲས་ཧ་ཅང་བཟང་། ད་ལྟ་ང་རང་སློབ་འབྲིང་དུ་སླེབས་རྗེས། རྩིས་རིག་དགེ་རྒན་ངའི་གམ་དུ་མེད་ནའང་། ང་ལ་སློབ་སྦྱོང་གི་གོམས་གཤིས་བཟང་བོ་བསླབས་ཡོད་པས་སྐར་འབྲས་བཟང་བོ་ལོན་པར་ནམ་ཡང་སྟ་གོན་བྱས་ཡོད་མོད། ངའི་དྲན་འཛིན་གྱི་ཡོལ་ངོས་ན་ནམ་ཡང་བསུབ་ཏུ་མེད་པ་ནི། ངས་དྲི་བ་ཞིག་མ་ཤེས་པར་ངོ་ནག་ཅིང་སེམས་སྡུག་པའི་སྐབས་སུ་རྩིས་རིག་དགེ་རྒན་ནི་གློག་འཕྲུལ་ལྟར་ངའི་མདུན་ནས་གློ་བུར་དུ་ཕེབས་ནས། ཁོང་གིས་ང་ལ་མི་ཚེ་ཀྱག་ཀྱོག་ཆེ་ལ། སྡུག་ན་རིང་བ། སྐྱིད་ན་ཐུང་བས་ཁྱོད་རང་འདི་ལྟར་ཉིན་རྒྱུན་དཀའ་ཁག་ཅིག་ལ་འཕྲད་ན་སེམས་མི་སྐྱིད་པར་བསྡད་ན་ཉིན་གཅིག་ཀྱང་འཁྱོལ་དཀའ་བར་འདུག་ཟེར་ནས་དཀའ་ཁག་སེལ་ཐབས་ཀྱི་བསླབ་བྱ་མང་པོ་གནང་བ་རེད། སྐད་ཆ་དེ་དག་ཧ་ལས་པ་ཧང་སང་པ་ཞིག་མིན་རུང་། ང་ལ་བསམ་གཞིག་གི་བར་སྟོང་ཞིག་བསྐྲུན་ཅིང་ངའི་སེམས་ལ་འགྲོ་བ་ཞིག་ཡིན་པས་ང་ལ་ཁྲིད་སྟོན་མང་པོ་བྱས་པ་རེད། ད་ལྟ་ཁོ་མོ་ངའི་གམ་དུ་མེད་ན་ང་ལ་ཁེར་རྐྱང་གི་སྣང་བ་ཞིག་རང་དབང་མེད་པར་འཁོར་ཡོང་། རྩིས་རིག་དགེ་རྒན་གྱིས་དོན་དག་ཅི་ཞིག་བསྒྲུབས་ཀྱང་ཚང་མ་འདྲ་མཉམ་ཡིན་མོད། ང་ལ་ཧ་ཅང་གཟབ་ནན་བྱེད་པ་ལས་གུ་ཡངས་གཏན་ནས་མི་བྱེད་ནའང་ངས་སྔར་བཞིན་ཁོང་དྲན་པ་མ་ཟད། ཁོང་གིས་ནམ་རྒྱུན་མི་ཚེ་ནི་ཤོག་དཀར་ཞིག་དང་འདྲ་ལ། སྐྱོན་ནི་ཤོག་དཀར་ངོས་ཀྱི་ནག་ཐིག་དེ་ཡིན་ཟེར། ཤོག་དཀར་གྱི་ཁ་ཞེང་ཅི་ལྟར་ཆེ་ཡང་ནག་ཐིག་ལྷང་ཡིན་པས། སྐྱོན་ཆ་མི་བཟོ་བ་གལ་ཆེ་ཟེར་བ་ནམ་ཡང་ངའི་སེམས་ནང་དྲན་བཞིན་འདུག་གོ །
