དུས་ཚོད་ནི་ཡར་ཀླུང་གཙང་པོའི་ཆུ་རྒྱུན་ལྟར་ང་ཚོ་སྒུག་ནས་མི་སྡོད་པར་བར་མི་ཆད་པར་རྒྱུག་བཞིན་ཡོད། ང་ཡང་ད་ལྟ་ནར་སོན་ནས་རང་ཉིད་ཀྱི་ཕ་མ་ལས་སྟོབས་ཆེ་བའི་རང་དོན་རང་གིས་སྒྲུབ་ཐུབ་པའི་དུས་སུ་སླེབས་པའི་བུ་མོ་ཞིག་ཏུ་འགྱུར། ང་རང་ཆུང་དུས་ནས་སེམས་ཁོངས་སུ་བཅངས་པའི་ཕུགས་བསམ་དེ་ད་དུང་ཡང་ངའི་འཚར་ལོངས་ཀྱི་འགྲོས་དང་བསྟུན་ནས་ང་ཡི་སྙིང་ཁམས་ན་བརྟན་པོར་གནས་ཡོད།
ཇི་སྐད་དུ«ཆུ་ཡི་བསྟན་བཅོས»ལས། མཁས་པས་བདེན་རྫུན་བརྟག་ནས་བྱེད། །བླུན་པོ་གྲགས་པའི་རྗེས་སུ་འགྲོ། །ཆུ་ནང་ཅལ་གྱི་སྒྲ་གྲགས་པས། །གཅན་གཟན་རི་དྭགས་ཕལ་ཆེར་བྲོས། །ཞེས་པའི་ལེགས་བཤད་ལྟར། གལ་ཏེ་མི་ཞིག་ལ་རང་ཉིད་ཀྱི་ཕུགས་འདུན་མངོན་འགྱུར་བྱེད་པའི་དམིགས་ཡུལ་ཞིག་དང་། བརྟན་བརླིང་གི་བསམ་བློ་ཞིག་མེད་ཚེ། གཞན་གྱི་ཟེར་སྒྲོས་གྱི་རྗེས་སུ་འབྲངས་པ་དང་གཞན་གྱི་བསམ་བློ་ཁོ་ནར་བསྟུན་ནས་འགྲོ་བ་ལས་རང་ཉིད་ཀྱི་བསམ་བློ་མེད་པར་འགྱུར་འགྲོ་ངེས་རེད། དེས་ན། ངས་ནམ་རྒྱུན་སློབ་སྦྱོང་བྱེད་པའི་བརྒྱུད་རིམ་ནང་དུ། སྔོན་ལ་རང་ཉིད་ལ་དམིགས་ཡུལ་ཆུང་ཆུང་ཞིག་བཟོས་ནས། དེ་ལེགས་འགྲུབ་ཡོང་རྒྱུར་འབད་པ་དང་། ལེགས་སྒྲུབ་བྱུང་ཚེ་ཡང་དེ་ལས་ཆེ་བའི་དམིགས་ཡུལ་ཞིག་ལ་ཁ་ཕྱོགས་ནས་གཏན་འཁེལ་བྱེད་ཀྱིན་ཡོད། དེ་ལྟར་བྱས་ཚེ་ཤེས་ཡོན་གྱི་ཨ་སྔོན་དབྱིངས་སུ་བརྩོན་འགྲུས་ཀྱི་ཆུ་འཛིན་ཞིག་འཁྲིགས་ངེས་རེད་སྙམ་གྱི་འདུག་ལ། ངའི་ཕུགས་བསམ་གྱི་གོམ་སྟབས་ཀྱང་དེ་བས་ཇེ་མགྱོགས་སུ་འགྲོ་ངེས་རེད་སྙམ་གྱི་འདུག ད་དུང་དུས་དང་རྣམ་པ་ཀུན་ཏུ་གྲོགས་བཟང་ངན་ལའང་དོ་སྣང་བྱེད་ཀྱིན་ཡོད། གཏམ་དཔེ་ལས། གྲོགས་པོ་བཟང་ངན་འགག་རྩའི་དུས་སུ་རྟོགས། །རྟ་ཕོའི་ཤེད་ཤུགས་འདམ་རྫབ་ཁྲོད་ནས་ཤེས། །ཞེས་པ་དང་། གྲོགས་བཟང་པོ་སྨན་གྱི་ལྗོན་པ་འདྲ། །གྲོགས་ངན་པ་དུག་གི་སྡོང་པོ་འདྲ། །ལྟར་གྲོགས་བཟང་ངན་གྱིས་རང་གི་གཤིས་སྤྱོད་དང་སྦྱངས་འབྲས་སོགས་ཟླ་བ་ཚེས་པ་ཡར་ངོ་བཞིན་ཉིན་རེ་ལས་མ་བསྡད་པར་ཡག་ཐོག་ཡག་བརྩེགས་སུ་འགྲོ་ངེས་རེད་ལ། གྲོགས་ངན་ཞིག་དང་འགྲོགས་ཚེ་རང་གི་གཤིས་སྤྱོད་ཀྱང་འདམ་རྫབ་ནང་དུ་ལྷུང་བ་ལྟར་ཇེ་ངན་ནས་ཇེ་ངན་དུ་འགྲོ་བཞིན་ཡོད། དེར་བརྟེན་ཁོ་མོས་གྲོགས་བཟང་དག་དང་འགྲོགས་ནས། སྐྱེ་སྟོབས་ཀྱི་དཔལ་འབར་བའི་ངང་གོམ་སྟབས་ཆེན་པོས་མདུན་དུ་བསྐྱོད་བཞིན་ཡོད།
ངའི་སྙིང་ཁམས་ན་སྦྲུམ་པའི་ཕུགས་བསམ་གྱི་སྒྲོན་མེ་ནི་དགེ་རྒན་ཞིག་བྱེད་འདོད་པ་དེ་ཡིན། གང་ཡིན་ཞེ་ན། ད་ལྟའི་དུས་འདིར་ཏང་གི་སྲིད་ཇུས་བཟང་པོའི་བཀའ་དྲིན་འོག་རིག་གཞུང་སློབ་སྦྱོང་བྱ་རྒྱུའི་གོ་སྐབས་བཟང་པོ་ཡོད་ལ། སྤྱི་ཚོགས་འཚོ་བའི་ཁྲོད་དུ་ང་ཚོ་ཚང་མ་ལྟོ་གོས་གཏམ་གསུམ་ལ་སེམས་ཁྲལ་ཡེ་ནས་མེད་པའི་དུས་ཤིག་ཀྱང་རེད། ཁོ་མོས་ཀྱང་བཀའ་དྲིན་དེ་དག་དུས་ནམ་ཡང་ཚོར་སྲིད། བཀའ་དྲིན་ཚོར་བཞིན་ཚོར་བཞིན་དུ་ཡིད་ཀྱི་མཚོ་མོའི་ངོས་སུ་དགའ་ཚོར་གྱི་དྲག་ཆར་མི་འབབ་པ་ཅི་ལ་སྲིད།
འོན་ཀྱང་དེང་དུས་ཀྱི་ལོ་ཆུང་བྱིས་པ་དང་རྒན་རྒོན། ཕོ་མོ་རྒན་གཞོན་ཚང་མར་ཞིབ་པར་བལྟས་ན། ང་ཚོས་དུས་རྒྱུན་འཚོ་བའི་ཁྲོད་དུ་གསེར་ལས་དཀོན་པའི་དུས་ཚོད་བཟང་པོ་འཕྲོ་བརླག་བཏང་ནས་ཉིན་མཚན་ཀུན་དུ་ཁ་པར་སོགས་ལ་མགོ་གཡེངས་ནས་ཤེས་བྱའི་ལས་ལ་མི་བརྩོན་པ་དེ་ཚོར་བདག་གི་སེམས་གཏིང་ནས་སྡུག་བསྔལ་གྱི་རྦ་རླབས་འཕྱུར་བཞིན་འདུག ངས་ངའི་སྙིང་ཁམས་ནང་སྦྲུམ་བའི་ཤེས་ཡོན་གྱི་སྒྲེན་མེ་དེར་ཁ་ཕྱོགས་ནས་རང་ཉིད་ཀྱི་ཕུགས་བསམ་མངོན་འགྱུར་བྱེད་བྱེད། གནའ་མིའི་གཏམ་ལས། ནོར་བུ་རང་ལ་ཡོད་དུས། །ནོར་བུའི་ནོར་ཉམས་མ་ཆོད། །ནོར་བུ་གཞན་ལ་ཤོར་དུས། །སྙིང་རླུང་སྟོད་ལ་འཚང་བྱུང། །ཞེས་པའི་ལེགས་བཤད་སེམས་སུ་བཅངས་ནས་ད་ལྟའི་གོ་སྐབས་བཟང་པོ་དེར་དམ་འཛིན་བྱས་ཏེ་ཤེས་བྱའི་གནས་ལ་འབད་བརྩོན་བྱེད་རྒྱུ་ཤིན་ཏུ་གལ་འགངས་ཆེའོ། །
ལྷ་ས་མཐོ་འབྲིང་གཉིས་པའི་ལོ་རིམ༢（༡༤）
ཟུར་ཁྲིད་དགེ་རྒན། བདེ་སྐྱིད་འཕྲིན་ལས།
