ཉེ་ཆར་ཆིང་ཧྭ་སློབ་ཆེན་དང་ཀྲུང་དབྱང་མཛེས་རྩལ་སློབ་གླིང་གིས་མཉམ་འབྲེལ་ཐོག་སྤེལ་བའི“བརྒྱུད་བསྒྲགས་འཆར་གཞི་གསར་པའི”བྱེད་སྒོ་དེ་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་བྱིས་པའི་ཕན་བདེ་ཁང་གཉིས་པར་སྤེལ་ཞིང་། མཐོ་སློབ་གཉིས་ནས་ཡོང་བའི་སློབ་གྲོགས་21གིས་དུས་ཡུན་ཉིན་10ཡི་སློབ་སྐྱོར་ལག་ལེན་བྱེད་སྒོ་སྤེལ་བ་བརྒྱུད་ས་གནས་དེ་གའི་ཕྲུ་གུ་ཚོར་སྣ་མང་ཕུན་སུམ་ཚོགས་པའི་སློབ་ཚན་དང་བརྗེད་པར་དཀའ་བའི་སློབ་སྦྱོང་གི་ཉམས་ལེན་བྱས་པ་རེད།
སློབ་སྐྱོར་ཚོགས་པའི་ནང་ཆིང་ཧྭ་སློབ་ཆེན་གྱི་སློབ་གྲོགས་ཚོས་བྱང་ཚད་མཐོ་རུ་གཏོང་བའི་སློབ་ཚན་ཇུས་འགོད་བྱས་པ་དེའི་ནང་སེམས་ཁམས་རིག་པ་དང་། སྙན་ངག གསར་འགྱུར་ཁྱབ་སྤེལ། གནམ་རིག་དངོས་ཁམས་སོགས་ཀྱི་ནང་དོན་ཚུད་ཡོད་པ་དང་། ཆིང་ཧྭ་སློབ་ཆེན་རླངས་འཁོར་སྐྱེལ་འདྲེན་སློབ་གླིང་གི་སློབ་གྲོགས་ཚོས་ད་དུང་རིག་ནུས་རླངས་འཁོར་ཆུང་ཆུང་གི་གོ་རིམ་སྒྲིག་པའི་སློབ་ཚན་བཀོད་སྒྲིག་བྱས་པ་དང་། ཀྲུང་དབྱང་མཛེས་རྩལ་སློབ་གླིང་གི་སློབ་གྲོགས་ཚོས་སློབ་ཆུང་སློབ་མ་ཚོར་ཤེལ་སྒོའི་སྒྱུ་རྩལ་དང་ལག་ཤེས་མེ་ཏོག་བསླ་སྟངས། ཚོས་རྒྱག་སྟངས་སོགས་སྒྱུ་རྩལ་མྱོང་རོལ་གྱི་སློབ་ཚན་བཀོད་སྒྲིག་བྱས་པ་རེད།
བྱེད་སྒོའི་མཐའ་མཇུག་གི་ཉིན་མོར་སློབ་སྐྱོར་ཚོགས་པ་དང་ཕྲུ་གུ་ཚོས་མཉམ་དུ་རིག་རྩལ་མཉམ་འཁྲབ་དང་ལག་ཤེས་བརྩམས་ཆོས་འགྲེམས་སྟོན་བྱས་པ་རེད། དགའ་སྤྲོའི་ཞབས་བྲོ་དང་མི་སེམས་འགུལ་བའི་གླུ་གར། སྤྲོ་སེམས་རབ་ཏུ་འཁོལ་བའི་མཉམ་གཞས་བཅས་ཀྱིས་ཕྲུ་གུ་ཚོའི་ལང་ཚོའི་གསོན་ཤུགས་དང་རྒྱལ་གཅེས་ཀྱི་བརྩེ་སེམས་གང་ལེགས་མངོན་ཡོད།
“སློབ་སྐྱོར་གྱི་དུས་ཚོད་དེར་གཅེས་འཛིན་བྱེད་འོས་པ་ཞིག་ལ། ཕྲུ་གུ་ཚོས་ང་ཚོར་འཛིན་པའི་བརྩེ་སེམས་དང་ཤེས་བྱར་དགའ་ཞེན་བྱེད་པའི་རྣམ་འགྱུར་ལས་སློབ་སྐྱོར་ཚོར་སེམས་འགུལ་ཆེན་པོ་ཐེབས།” སློབ་སྐྱོར་ཚོགས་པས“ད་ཐེངས་ཀྱི་སློབ་སྐྱོར་བྱེད་སྒོ་དེས་ང་ཚོ་དང་ཕྲུ་གུ་ཚོའི་བར་མི་རིགས་མཐུན་སྒྲིལ་ཟབ་ཏུ་གཏོང་བའི་སྦྲེལ་ཟམ་ཞིག་བསྐྲུན་པ་དང་། ཆབས་ཅིག་སློབ་མ་ཚོས་བོད་ཀྱི་རིག་གནས་དང་སློབ་གསོའི་གནས་བབ་ལ་བསམ་ཤེས་དང་བསམ་གཞིག་བྱེད་ཟབ་ཏུ་ཕྱིན་ཡོད”ཅེས་བཤད།
ད་ཐེངས་ཀྱི་ལག་ལེན་བྱེད་སྒོ་ནི་ཆིང་ཧྭ་སློབ་ཆེན་འཁོར་རིགས་སློབ་གླིང་གི“བརྒྱུད་བསྒྲགས་འཆར་གཞི་གསར་པའི”སྤུས་རྟགས་ལག་ལེན་རྣམ་གྲངས་ཀྱི་ཆ་ཤས་ཤིག་ཡིན་པ་དང་། དེ་ཆིང་ཧྭ་སློབ་ཆེན་གྱི་སྤྱི་ཚོགས་ཀྱི་ཕུལ་བྱུང་ལག་ལེན་རྣམ་གྲངས་ཤིག་ཡིན་པས་འཆར་གཞི་དེས་ས་ཆ་མང་པོར་སློབ་སྐྱོར་གྱི་བརྟག་ཞིབ་བྱས་པ་དང་། 2020ལོ་ནས་བཟུང་སྤེལ་འགོ་ཚུགས་ཚུན་བར་གཞོན་ནུ་ལོ་ཆུང་ཁྲི་500ལྷག་ཙམ་ལ་ཕན་པ་བསྐྲུན་ཡོད་པ་རེད།
བསོད་ནམས་བཀྲིས་ཀྱིས་བསྒྱུར།
