ཉེ་ཆར། རང་སྐྱོང་ལྗོངས་སྲིད་གཞུང་གསར་འགྱུར་གཞུང་ལས་ཁང་གིས་གསར་འགྱུར་ཁྱབ་བསྒྲགས་ཚོགས་འདུ་འཚོགས་པ། རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་ཏང་ཙུའུ་ཧྲུའུ་ཅི་གཞོན་པ་དང་། རྒྱུན་ལས་ཡོན་ཀྲང་གཞོན་པ། གསར་འགྱུར་མགྲིན་ཚབ་པ་བཅས་ཡིན་པའི་ཀྲའོ་ཡུས་ཡན་གྱིས་ངོ་སྤྲོད་བྱས་པར་གཞིགས་ན། འདི་ལོའི་ལོ་སྟོད་ནས་བཟུང་བོད་ཀྱི་ཁྲིམས་ཁང་གིས་ཏང་དང་རྒྱལ་ཁབ་ཀྱི་ལས་ཀའི་ཁྱོན་ཡོངས་ལ་དམིགས་ནས“དོན་ཆེན་བཞི”དང་ “གསར་གཏོད་བཞི”ནུས་ཤུགས་ཡོད་རྒུས་འདེགས་སྐྱོར་དང་ཞབས་འདེགས་ཞུས་ཏེ་གྲུབ་འབྲས་ཐོབ་པ་རེད། ལྗོངས་ཡོངས་ཀྱི་ཁྲིམས་ཁང་གིས་གྱོད་གཞི་སྣ་ཚོགས་ཁྱོན་བསྡོམས་ངོ་གྲངས་54702བདག་སྤྲོད་བྱས་པ་དེ་ལོ་གོང་མ་དང་བསྡུར་ན་བརྒྱ་ཆ་15.41འཕར་བ་དང་། འདྲི་གཅོད་དུས་བཀག་ནང་གྱོད་གཞི་མཇུག་སྒྲིལ་ཚད་བརྒྱ་ཆ་99.75ཟིན་ཡོད། སྤྱིའི་ཟུར་ལྟའི་བར་མཚམས་བཙུགས་ཡོད་པའི་དམིགས་ཚད་ཁག་20ཡི་ཁྲོད་དུ་དམིགས་ཚད་ཁག་13འོས་འཚམས་ཀྱི་ལུགས་དང་མཐུན་པས་དེས་བརྒྱ་ཆ65ཟིན་ཡོད། “གསར་གཏོད་བཞི་”དང་“མདུན་གྲལ་དུ་སྐྱོད་པ་བཞི་”ལ་སྐུལ་འདེད་གཏོང་བར་སྤུས་ལེགས་ཕན་ཆེའི་ཁྲིམས་འཛིན་ཞབས་ཞུ་འདོན་སྤྲོད་བྱས་ཡོད།
མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་གཏོད་པའི་ལས་དོན་ལ་ཞབས་འདེགས་ཞུ་བའི་ཐད་ལྗོངས་ཡོངས་ཀྱི་ཁྲིམས་ཁང་གིས་ཉེས་དོན་གྱི་འདྲི་གཅོད་དང་པོའི་གྱོད་གཞི་ཁྱོན་1030ཞིབ་གཅོད་མཇུག་སྒྲིལ་བྱས་པ་དང་། ཉེན་ཡོད་ཀྱི་རླངས་འཁོར་གཏོང་བ་དང་འགྲིམ་འགྲུལ་ཆག་སྒོ་བཟོ་བའི་ཉེས་གསོག་གྱོད་གཞི་370ཞིབ་གཅོད་མཇུག་སྒྲིལ་བྱས་པ། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་ཉེས་གསོག་དང་ལྐོག་ཟ་ལྐོག་རྔན་གྱི་ཉེས་གསོག གཏུམ་སྤྱོད་ཀྱི་ཉེས་གསོག་ཚབས་ཆེན་བཅས་ཁག་གཅིག་ལ་ཁྲིམས་ལྟར་རྡུང་རྡེག་ནུས་ལྡན་བཏང་ནས་ཆུ་ཚད་དེ་བས་མཐོ་བའི་དུས་བདེའི་བོད་ལྗོངས་དང་ཁྲིམས་སྐྱོང་བོད་ལྗོངས་ལ་སྐུལ་འདེད་བཏང་སྟེ། སྤྱི་ཚོགས་ཁྱོན་ཡོངས་རྒྱུན་མཐུད་དང་ཡུན་རིང་གི་བརྟན་ལྷིང་འགན་ལེན་བྱ་ཆེད་ལེགས་སྐྱེས་ཧུར་ཐག་ཕུལ་ཡོད། ས་མཐོའི་དཔལ་འབྱོར་སྤུས་ཚད་མཐོ་པོའི་སྒོ་ནས་འཕེལ་རྒྱས་འགྲོ་རྒྱུར་ཞབས་འདེགས་ཞུ་བའི་སྔོན་སྐྱོད་ཁུལ་གཏོད་པའི་ལས་དོན་ཐད། ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་གདེང་འཇོག་སྟོན་གྲངས་མ་ལག་དང་དེ་བཞིན་བཀོལ་སྤྱོད་སྒྲིག་སྲོལ་ཞིབ་ཕྲ་བཟོས་པ་དང་འདྲི་གཅོད་འགན་ནུས་འདོན་སྤེལ་གང་ལེགས་བྱས་ཏེ་ལྗོངས་ཡོངས་ཀྱི་ཁྲིམས་ཁང་གིས་དམངས་དོན་ཚོང་དོན་གྱོད་གཞི་20343ཞིབ་གཅོད་མཇུག་སྒྲིལ་བྱས་པ་དང་། རྒྱལ་ཁབ་ཀྱི་སྐྱེ་ཁམས་ཤེས་དཔལ་མཐོར་འདེགས་གཏོད་པའི་ལས་དོན་ཕྱོགས་ལ་ཞབས་འདེགས་ཞུ་བའི་ཐད་ནགས་ཤིང་ལྐོག་གཅོད་དང་ཁྲིམས་འགལ་ངང་གཏེར་ཁ་སྔོག་འདོན། རྩ་ཆེའི་རི་སྐྱེས་སྲོག་ཆགས་ལ་གནོད་འཚེ་གཏོང་བ་སོགས་ཀྱི་ཉེས་དོན་གྱོད་གཞི་དང་ཁོར་ཡུག་ཐོན་ཁུངས་གསར་སྤེལ་དང་བེད་སྤྱོད་བྱེད་པ། སྐྱེ་ཁམས་ལས་གྲྭ་འཛུགས་སྐྲུན་སོགས་ཀྱི་དམངས་དོན་དང་སྲིད་འཛིན་གྱོད་གཞི་45ཁྲིམས་ལྟར་ཞིབ་གཅོད་བྱས་པ་དང་སྤྱི་ཕན་གཏུག་བཤེར་གྱོད་གཞི་4ཞིབ་གཅོད་བྱས་པ། རྒྱལ་ཁབ་ཀྱི་མཐའ་བརྟན་མཐའ་དར་དམངས་ཕྱུག་བྱ་སྤྱོད་ཀྱི་དཔེ་སྟོན་ཁུལ་གསར་གཏོད་ལས་དོན་ལ་ཞབས་འདེགས་ཞུ་བའི་ཐད་མཐའ་མཚམས་འཛུགས་སྐྲུན་བྱེད་རིང་གི་འགལ་བ་དང་རྩོད་གཞི་སྣ་ཚོགས་ཁྲིམས་ལྟར་ཐག་གཅོད་འོས་འཚམས་བྱས་ནས་ལྗོངས་ཡོངས་ཀྱི་མཐའ་མཚམས་ཁྲིམས་ར་33གྱིས་ཁྱོན་གྱོད་གཞི་3577ཞིབ་གཅོད་བྱས་པ་རེད།
ཚེ་རིང་ཐར་གྱིས་བསྒྱུར།
