འདི་ནི་ཟླ་9ཚེས་3ཉིན་ལྷོ་ཁ་གྲོང་ཁྱེར་མི་དམངས་སྲིད་གཞུང་གིས་2024ལོའི“ཀྲུང་ཧྭའི་ཞིམ་ཟས། བོད་ཀྱི་བྲོ་བ། ཡར་ཀླུང་དྲི་ཞིམ་”གསར་གཏོད་དང་འབྱུང་འགྱུར་ཞིམ་ཟས་འགྲན་བསྡུར་ཆེན་པོ་ལྷོ་ཁ་རྩེད་ཐང་གསོལ་མགྲོན་ཁང་དུ་བདེ་བླག་ངང་མཇུག་འགྲིལ་བའི་རྣམ་པ་ཡིན།
ཟླ་9ཚེས་3ཉིན་ལྷོ་ཁ་གྲོང་ཁྱེར་མི་དམངས་སྲིད་གཞུང་གིས་འཛུགས་གཉེར་དང་ལྷོ་ཁ་གྲོང་ཁྱེར་ཚོང་དོན་ཅུས་དང་ལྷོ་ཁ་གྲོང་ཁྱེར་ཡུལ་སྐོར་མ་འཇོག་ཀུང་སིས་སྒྲུབ་འགན་འཁུར་བའི་2024ལོའི“ཀྲུང་ཧྭའི་ཞིམ་ཟས། བོད་ཀྱི་བྲོ་བ། ཡར་ཀླུང་དྲི་ཞིམ་”གསར་གཏོད་དང་འབྱུང་འགྱུར་ཞིམ་ཟས་འགྲན་བསྡུར་ཆེན་པོ་ལྷོ་ཁ་རྩེད་ཐང་གསོལ་མགྲོན་ཁང་དུ་བདེ་བླག་ངང་མཇུག་འགྲིལ་བ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་འགྲན་བསྡུར་ཆེ་མོ་ནི་2024ལོའི“ཀྲུང་ཧྭའི་ཞིམ་ཟས། བོད་ཀྱི་བྲོ་བ་”གསར་གཏོད་དང་འབྱུང་འགྱུར་ཞིམ་ཟས་འགྲན་བསྡུར་ཆེ་མོའི་ལྷོ་ཁའི་གྲ་སྒྲིག་འགྲན་བསྡུར་དུས་ཡུན་ཉིན་གཉིས་ཡིན་པ་དང་། ཁྱོན་ཕུལ་བྱུང་བཟའ་བཏུང་ཁེ་ལས་26གི་འཐུས་མི་འགྲན་བསྡུར་ནང་ཞུགས་རྒྱུའི་ཡིད་དབང་བཀུག་ཡོད་པ་རེད། འགྲན་བསྡུར་ཆེན་པོའི་ནང་ཞུགས་མཁན་བདམས་ཐོན་པས་ལྷོ་ཁའི་ས་ཁོངས་ཀྱི་ཁྱད་ཆོས་དང་ཟུང་འབྲེལ་གྱིས་ལྷོ་ཁའི་ཁྱད་ལྡན་བཟའ་བཅའ་སྤྱོད་དགོས་པ་སྟེ། དཔེར་ན་མཚོ་སྨད་འབྲི་གཡག་དང་། སྣ་དཀར་རྩེའི་སོ་གད་ལུག ལྷུན་རྩེའི་ནས་ནག་སོགས་ཁྱད་ལྡན་དངོས་རྫས་ཁག་གི་ཚལ་བཟོ་དགོས་ལ། ད་དུང་གཏན་འཁེལ་བྱས་པའི་དུས་ཚོད་ནང་གཏན་འཁེལ་བྱས་པའི་ཚལ་དང་རང་འདེམས་ཚལ་བཅས་སྣ་ཁ་གཉིས་བཟོ་དགོས།
འགྲན་བསྡུར་ཆེན་པོའི་ནང་བོད་རང་སྐྱོང་ལྗོངས་གཡོས་སྦྱོར་ཟ་ཁང་ལས་རིགས་མཐུན་ཚོགས་ཀྱི་ཚོགས་གཙོ་ཁྲུའུ་ལི་ཆུན་སོགས་རྒྱལ་ཁབ་རིམ་པའི་ཞིབ་དཔྱད་ཨུ་ཡོན་དྲུག་གདན་དྲངས་ནས་སྐར་གྲངས་དཔྱད་བསྡུར་བྱས་པ་རེད། ཉིན་གཉིས་ཀྱི་འགྲན་བསྡུར་དྲག་པོ་བྱས་པ་བརྒྱུད་མཐར་སྐར་འབྲུག་ལ་བྱ་དགའ་རིམ་པ་དང་པོ་ཐོབ་པ་དང་། བཀྲ་ཤིས་དང་རྒྱལ་མཚན་བཟང་པོར་བྱ་དགའ་རིམ་པ་གཉིས་པ་ཐོབ་པ། ཐང་ཙུའུ་ཅུན་དང་བློ་བཟང་བསྟན་པ། ཅའ་ལུང་བཅས་ལ་བྱ་དགའ་རིམ་པ་གསུམ་པ་ཐོབ་པ་རེད། དེ་དང་ཆབས་ཅིག་འགྲན་བསྡུར་ཆེ་མོའི་ནང་ད་དུང་ཁྱད་ལྡན་བྱ་དགའ་5དང་གསར་གཏོད་བྱ་དགའ་5སྐུལ་ལྕག་བྱ་དགའ་10བཅས་ཐོབ་པ་རེད།
ལྷོ་ཁ་ཡུལ་སྐོར་མ་འཇོག་ཀུང་སིའི་སྤྱི་ཁྱབ་ལས་འཛིན་གཞོན་པ་བསོད་ནམས་རྡོ་རྗེས་ད་ཐེངས་ཀྱི་འགྲན་བསྡུར་དེའི་དམིགས་ཡུལ་ནི་ལྷོ་ཁའི་ཆེས་ཕུལ་དུ་བྱུང་བའི་མ་བྱན་ཚོགས་པ་གཅིག་སྡུད་ཀྱིས་ལྷོ་ཁའི་རྫོང（ཆུས་དང་གྲོང་ཁྱེར）བཅུ་གཉིས་ཀྱི་ཁྱད་ལྡན་ཞིམ་ཟས་སྔོག་འདོན་བྱས་ཏེ། ལྗོངས་ཡོངས་སུ་ལྷོ་ཁའི་ཐུན་མོང་མ་ཡིན་པའི་ཞིམ་ཟས་རིག་གནས་འགྲེམས་སྟོན་བྱ་རྒྱུ་དེ་ཡིན་ཞེས་བཤད།
བསོད་བསྟན་གྱིས་བསྒྱུར།
