ལྕུག་ཕྲན་ཡལ་ག་ལྡེམ་པའི་གདན་སྟེང་ན། །
སོས་ཀའི་མེ་ཏོག་མངོན་པར་བཞད་པ་སྟེ། །
ན་ཆུང་རྐང་དྲུག་བུང་བའི་ཁྱུ་ཚོགས་ཀྱི། །
ལོ་རེའི་སྟོན་མོ་ཚེས་པའི་ཉིན་མོ་ལགས། །
བྱམས་བརྩེའི་བདག་ཉིད་གནམ་འོག་ཕ་མ་ཡིས། །
རིགས་ཀྱི་མྱུ་གུའི་མ་འོངས་མཛེས་སྡུག་སླད། །
ངལ་བའི་ཁུར་ཆེན་ཇི་ལྟར་ལྕི་ན་ཡང་། །
བསྣམས་ཏེ་འཚོ་བའི་འཕྲང་ལམ་རེ་རེ་འགྲིམས། །
སྤྱི་ཚོགས་འཚོ་བའི་འགྲན་རྩོད་འདུ་འཛི་རྒོད། །
སྦྱངས་ཀྱང་མ་ཤེས་རྨོངས་པའི་གྲལ་ན་མེད། །
སེམས་ཀྱི་མེ་ལོང་དཀའ་སྡུག་གཡའ་དང་བྲལ། །
བྱིས་པའི་རང་གཤིས་དྭངས་གཙང་ཆུ་བོ་བཞིན། །
གཉེན་དང་ཉེ་དུས་རེ་ལྟོས་ཁྱེད་ཚོར་བཅོལ། །
ཕ་དང་མ་ཡིས་ཐམས་ཅད་ཁྱེད་ཚོར་བཏང་། །
རིག་པའི་སློབ་གླིང་འགྲིམ་ཞིང་ནར་སོན་དུས། །
དྲིན་དང་རེ་བ་ཡོད་ཚད་མ་བརྗེད་རོགས། །
རྣམ་དཔྱོད་ཤེས་རབ་བཀྲ་བའི་འོད་ཟེར་དང་། །
སྤྱོད་གཙང་ཀུན་ཡིད་འཕྲོག་པའི་ནོར་བུ་གཉིས། །
ནམ་ཡང་སེམས་ཀྱི་གཏིང་ནས་མ་བོར་བར། །
བྱིས་པའི་མདུན་ལམ་སྔར་ལས་ཡངས་པར་ཤོག །
སློབ་གླིང་དགའ་ཚལ་མེ་ཏོག་ལྡུམ་ར་འདྲ། །
སྐད་བརྡ་རིག་པ་རྒྱ་མཚོའི་འཇིངས་ལས་ཟབ། །
བྱིས་བློ་གསར་པ་གཞན་དུ་མ་གཡེངས་པར། །
ཤེས་བྱའི་འདོད་རྒུ་ལེན་པར་འབད་གྱུར་ཅིག །
ལོ་ཆུང་བྱིས་པ་དར་རས་དཀར་པོ་བཞིན། །
ཕ་མ་དགེ་རྒན་པིར་ཐོག་མཁན་པོ་ཚོས། །
མདོག་ལེགས་ཚོན་རྩིའི་སློབ་གསོའི་རི་མོ་ཡིས། །
མིག་དཔེ་སྟོན་ནས་ཕྲུ་གུའི་བློ་སྒོ་ཕྱེས། །
འབྱུང་འགྱུར་རེ་བ་ཁྱེད་ཚོའི་ལག་ཏུ་ཡོད། །
ཁྱེད་ཚོའི་ཨམ་ཕྲག་ནང་དུ་ཡོད་ཚད་མཆིས། །
མ་འོངས་བདག་པོ་ཁྱེད་ཚོ་ཡིན་དང་ཡིན། །
བློ་གསར་བྱིས་པའི་དུས་ཆེན་བཀྲ་ཤིས་ཤོག །
