བདག་ལ་ད་བར་དགེ་བའི་བཤེས་གཉེན་མང་པོ་འཕྲད་མྱོང་ཡོད། དེའི་ནང་ནས་གུས་མོར་བག་ཆགས་ཟབ་ཤོས་ནི་ང་ཚོའི་འཛིན་གྲྭའི་བོད་ཡིག་རྒན་ལགས་ཡིན།
ཁོང་ནི་སྐུ་གཟུགས་རིང་ལ་སྐུ་ཤ་རིད་ཙམ་དང་སྤྱན་གཉིས་ཆེ་ཞིང་ནག་པ་ཞིག་ཡོད་ཁོང་གིས་ང་ཚོ་སློབ་ཕྲུག་རྣམས་ལ་ཕ་མ་གཅིག་གི་བུ་ཕྲུག་ལྟར་བྱམས་བརྩེ་ཆེན་པོས་སྐྱོང་བ་ལས། ཉེ་དགའ་ཕྱོགས་ཞེན་སོགས་ཡེ་ནས་གནང་གི་མེད་ང་ཚོའི་བོད་ཡིག་རྒན་ལགས་ཀྱིས་དུས་ཚོད་སྐར་ཆ་གཅིག་ཀྱང་ཆུད་ཟོས་མི་གཏོང་བར། ངལ་གསོའི་སྐབས་ཀྱང་སློབ་ཁྲིད་གནང་གི་ཡོད་ལ་རྟག་ཏུ་ང་ཚོར་ཡོན་ཏན་མེད་ན་སྲོག་མེད་པ་དང་གཅིག་པ་རེད་ཅེས་གསུངས་ཀྱི་ཡོད།
ང་ཚོའི་རྒན་ལགས་ཀྱི་སློབ་ཚན་ཚོགས་དུས་ནན་ཏན་ཧ་ཅང་ཆེ་བས་སློབ་མ་མང་ཆེ་བའི་བོད་ཡིག་རྨང་གཞི་ཧ་ཅང་ཡག་པོ་ཡོད་པ་མ་ཟད། བོད་ཡིག་སྦྱོང་རྒྱུར་ཤིན་ཏུ་དགའ་པོ་ཡོད་ལ་སློབ་ཁྲིད་ཀྱི་ཐབས་ཤེས་ཀྱང་ཧ་ཅང་བཟང་པོ་ཡོད། ང་ཚོས་སློབ་སྦྱོང་ཡག་པོ་བྱས་པ་དང་སློབ་ཚན་ཡག་པོ་ཉན་ན་ང་ཚོར་བརྙན་འཕྲིན་བལྟ་རུ་བཅུག་པ་དང་རྔན་པ་སོགས་ཉོ་གནང་གི་ཡོད།
གུས་མོས་ཁོང་གིས་བཀའ་དྲིན་དུས་ནམ་ཡང་བརྗེད་མི་སྲིད་ལ། ད་ལྟ་ནས་སློབ་སྦྱོང་ལ་འབད་བརྩོན་བྱས་ནས་ཁོང་ལྟ་བུའི་དགེ་བའི་བཤེས་གཉེན་བཟང་པོ་ཞིག་བྱེད་ཀྱི་ཡིན། །
