མདང་གསུམ་ཁོ་བོ་ཡི་སྨོན་ལམ། །བཅོ་ལྔའི་དུང་ཟླ་ཡི་ཀློང་ན། །
མཛའ་གྲོགས་དབྱངས་ཅན་གྱི་ཞལ་འཛུམ། །ཡིད་ལ་འཁོར་འཁོར་རང་བྱས་བྱུང་། །
གདོང་བཞི་ཚངས་སྲས་ཀྱི་ལྷ་མོ། །དབང་བའི་བསྐལ་བ་ཞིག་མི་རུང་། །
ར་བཟི་ཁོ་བོ་ཡི་སེམས་ལ། །དྲན་པ་འགོག་ཐབས་རང་མི་འདུག །
བཅོ་ལྔའི་ཟླ་འོད་ཀྱི་འོག་ནས། །དྲི་བཞོན་རྟ་མཆོག་ལ་བཅིབས་ཏེ། །
མི་རྟག་རྨི་ལམ་གྱི་ཁྲོད་ནས། །མཛའ་བརྩེའི་ལྡུམ་ར་ལ་ཕེབས་ཤོག །
རིག་པའི་ཤེས་རབ་ཀྱི་ལྷ་མོ། །ཐུག་པའི་བསྐལ་བ་འདི་དཀའ་བས། །
ལྷད་མེད་བརྩེ་བ་ཡི་མཆོད་ཆང་། །མཛའ་གྲོགས་ཁྱེད་ཉིད་ལ་སྤྲིངས་ཡོད། །
བཅོ་ལྔའི་དཀར་གསལ་གྱི་ཟླ་བ། །འགྲིབ་པའི་ནམ་དུས་ཤིག་མཆིས་ཀྱང་། །
མཛའ་གྲོགས་དབྱངས་ཅན་གྱི་ཞལ་འཛུམ། །མ་བྲལ་སེམས་དབུས་ན་བཅངས་ཡོད། །
མི་ཚོགས་བརྒྱ་འགྲོ་ཡི་འཕྱ་སྨོད། །ཚ་གདུང་ཁ་སང་གི་རྨ་ཁ། །
མཛའ་མོ་དབྱངས་ཅན་གྱི་འཛུམ་མདངས། །སེལ་བའི་སྨན་མཆོག་རང་ལོས་ཡིན། །
སྐོམ་ཡང་ཡུལ་ཆུ་ཡི་སྙིགས་མ། །མི་འཐུང་འབྲོང་རྒོད་ཀྱི་ངང་ཚུལ། །
སྐྱོ་ཡང་ཕྱོགས་རིས་ཀྱི་བརྩེ་བ། །མི་བཅངས་ཁོ་བོ་ཡི་ངང་ཚུལ། །
ཁྱེད་ནི་ཐང་དཀར་གྱི་རྒོད་པོ། །ང་ནི་སྡེར་ཐོགས་ཀྱི་གླག་མོ། །
ལས་ཀྱི་བཀོད་པ་ཞིག་མིན་ན། །འཛོམས་པའི་དགོས་པ་རང་ཅི་ཡོད། །
དེ་ཕྱིར་ལས་དབང་གི་རྒན་པོའི། །ངག་འཇམ་ཁ་ཏ་ལ་ཉན་ནས། །
ཁོ་བོའི་དྲན་སེམས་ཀྱི་པང་དུ། །མ་བྲལ་ཡུན་རིང་དུ་བཞུགས་རོགས། །
ལས་མེད་འཁྱམས་པོ་ཡི་བརྩེ་བ། །ནག་ནོག་དྲི་མ་རང་མེད་པས། །
སྐུ་ཉིད་དབྱངས་ཅན་གྱི་ལྷ་མོ། །སོས་དལ་བག་ཕེབས་ལ་བཞུགས་རོགས། །
ཁོ་བོ་ནོར་བཟང་གི་ཚུལ་ནས། །དབྱངས་ཅན་ཡིད་འཕྲོག་གི་དྲུང་དུ། །
བརྩེ་བའི་མཛའ་འཕྲིན་གྱི་ལྷད་མེད། །དམ་བཅའི་ཐམ་ཁ་དེ་བརྒྱབ་ཡོད། །
ལྷ་མོ་ངག་དབང་གི་ལྷ་མོ། །ལྷ་མོ་གཏན་གྲོགས་ལ་བྱུང་ན། །
ལྷ་མོ་ཁྱེད་ཉིད་ལས་ལྷག་པའི། །ལྷ་མོ་མི་ཡུལ་ལ་མེད་དོ། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། ཚེ་བརྟན་རྒྱལ་པོ།
