2026ལོའི་ཟླ་1པར། སྡེ་ཚོགས་ལྷ་ས་གྲོང་ཁྱེར་ཨུ་ལྷན་གྱིས་ཇུས་འགོད་དང་ལྷ་ས་གྲོང་ཁྱེར་ན་ཆུང་བྱིས་པའི་བྱེད་སྒོ་ལྟེ་གནས་ཀྱིས་སྒྲིག་འཛུགས་དང་ལག་བསྟར་སྤེལ་བའི་དུས་ཡུན་ཉིན་7ཡི་“སྐེ་དར་དམར་པོ་ཡུན་ནན་དུ་བསྐྱོད་པ། དམར་པོའི་འགྲུལ་བཞུད་གསར་པ་ལག་ལེན་བྱེད་”ཅེས་པའི་གཞོན་ནུ་སྔོན་ཐོན་རུ་མིས་གསར་རྗེར་ཞིབ་འཇུག་སློབ་སྦྱོང་བྱེད་པའི་དགུན་གསེང་གི་དགུན་སྒར་བྱེད་སྒོ་ཕུན་སུམ་ཚོགས་པའི་ངང་མཇུག་འགྲིལ་བ་རེད།
ད་ཐེངས་ཀྱི་རི་བོ་དང་རྒྱ་མཚོ་བརྒལ་བའི་ཞིབ་འཇུག་སློབ་སྦྱོང་གི་ཡུལ་སྐོར་འདི་ནི་ས་ཁམས་ཐད་ཀྱི་རྒྱང་སྐྱོད་ཅིག་ཡིན་པ་མ་ཟད། གསོན་ཉམས་ལྡན་ལ་“སྐྱོད་བཞིན་པའི་བསམ་བློ་ཆབ་སྲིད་ཀྱི་སློབ་ཚན་ཆེན་པོ་”ཞིག་ཀྱང་ཡིན། ལྷ་ས་གྲོང་ཁྱེར་གྱི་སློབ་གྲྭ་ཁག་ནས་ཡོང་བའི་བོད་རིགས་དང་། རྒྱ་རིགས། ཧུའེ་རིགས། འཇང་རིགས། ཧོར་རིགས་སོགས་མི་རིགས་མང་པོ་ཚུད་པའི་ཕུལ་བྱུང་གཞོན་ནུ་སྔོན་ཐོན་རུ་མི་40དང་དེ་བཞིན་སྣེ་ཁྲིད་དགེ་རྒན་5བཅས་གངས་ལྗོངས་ས་མཐོ་ནས་ཡུན་ནན་ཕྱོགས་སུ་བསྐྱོད་དེ་གསར་རྗེའི་རྐང་རྗེས་འཚོལ་ཞིབ་དང་། མི་རིགས་ཀྱི་རིག་གནས་སྤེལ་རེས། ལག་ལེན་གྱི་རྩལ་ནུས་ཉམས་ལེན་བཅས་ལག་གདང་སྦྲེལ་ནས་རྒྱལ་གཅེས་བརྩེ་སེམས་ཟབ་གཏོང་དང་མཐོང་རྒྱ་ཆེ་རུ་བཏང་ཡོད།
ད་ཐེངས་ཀྱི་དགུན་གསེང་སྒར་གྱི་སྲོག་ཤིང་ནི་“ལག་ལེན་བསྟར་རྒྱུ་”དེ་ཡིན། ཡུན་ནན་དུ་སྡོད་རིང་སྔོན་ཐོན་རུ་མིས་སློབ་ཚན་ཙམ་མ་ཟད་ལོ་རྒྱུས་ཀྱི་ཡུལ་དངོས་སུ་བསྐྱོད་ནས་མུ་འབྲེལ་རིགས་འབྲེལ་གྱི་སློབ་གསོའི་བྱེད་སྒོར་ཞུགས་པ་རེད། སྔོན་ཐོན་རུ་མི་རྣམས་ཡུན་ནན་གྱི་གསར་རྗེའི་སློབ་གསོ་རྟེན་གཞིར་བསྐྱོད་དེ་གསར་བརྗེའི་དཔའ་བོའི་བྱས་རྗེས་ལ་ཉན་པ་དང་། ལོ་རྒྱུས་བྱུང་ཡུལ་གྱི་ཡུལ་དངོས་སུ་དད་མོས་ཀྱི་སྟོབས་ཤུགས་ཤེས་རྟོགས་བྱས་ཏེ་“བདག་གི་ལང་ཚོས་ཀྲུང་གོ་འཛུགས་སྐྲུན་བྱེད་”ཅེས་པའི་འགན་འཁྲི་འགན་འཁུར་ལ་གོ་བ་གཏིང་ཟབ་ལེན་ནས། ས་གནས་དེ་གའི་མི་རིགས་ཁག་གི་གཞོན་ནུ་ལོ་ཆུང་གིས“ལག་པས་ལག་པ་འཐེན་པ་”བརྒྱུད་དེ་ཕན་ཚུན་མཐུན་སྒྲིལ་བྱས་ནས་རུ་མི་ཚོས་མི་རིགས་མི་འདྲ་བའི་རིག་གནས་གོམས་སྲོལ་ཤེས་རྟོགས་བྱས་ནས་སེ་འབྲུའི་རྡོག་ལྟར་གོང་བུ་གཅིག་ཏུ་སྒྲིལ་བ་བྱས་པ་རེད།
སྐད་གྲགས་ཅན་གྱི་“རྟ་མགྲིན་དབང་མོ་”ཡི་སློབ་མའི་ཁྱིམ་བདག་གིས་ “ལྷ་ས་གྲོང་ཁྱེར་བྱིས་པའི་ཕོ་བྲང་གིས་ཡུན་ནན་དུ་ཉིན་བདུན་གྱི་བྱེད་སྒོ་སྤེལ་བར་དམིགས་བསལ་གྱི་ཐུགས་རྗེ་ཆེ་ཞུ་རྒྱུ་ཡིན། ད་ཐེངས་ཀྱི་དགུན་གསེང་ལ་གྲ་སྒྲིག་ཏན་ཏིག་དང་བཀོད་སྒྲིག་འཐུས་སྒོ་ཚང་བ། ནང་དོན་ཕུན་སུམ་ཚོགས་ལ་སྤྲོ་སྣང་ལྡན་པས་ཕྲུ་གུ་རྣམས་ལམ་ཧྲིལ་པོར་སྤྲོ་སྣང་ལྡན་པའི་ངང་གྲུབ་འབྲས་མང་པོ་ཞིག་ཐོབ་ལ་ད་དུང་གྲོགས་པོ་བཟང་པོ་ཡང་མང་པོ་སྒྲིག་རྒྱུ་བྱུང་ཡོད་”ཅེས་འཕྲིན་ཕྲན་ཐོག་དྲན་འཆར་བཀོད་པ་རེད།
བྱེད་སྒོ་དེ་ལྟ་སྐོར་ཁོ་ན་ཙམ་མ་ཡིན་པར་དོན་དངོས་ཀྱི་ལག་ལེན་ལ་དེ་བས་དོ་སྣང་བྱས་ཡོད། རུ་མི་རྣམས་ཀྱིས་མངོན་མིན་རིག་གནས་ཤུལ་བཞག་རྒྱུན་འཛིན་པའི་སྣེ་ཁྲིད་འོག་ཡུན་ཙི་བཟོ་བ་དང་ཝུའུ་ཐུང་དངུལ་སོགས་སྲོལ་རྒྱུན་གྱི་ལག་ཤེས་བཟོ་རྩལ་ལ་རང་ཉིད་ཀྱིས་དངོས་སུ་ལག་པ་འགུལ་ནས་མྱོང་རོལ་བྱས་པ་རེད། “དེ་ནི་ཐོབ་དཀའ་བའི་འཚར་ལོངས་ཀྱི་གོ་སྐབས་ཤིག་ཡིན་ལ། བྱིས་པ་ཚོས་འདས་པའི་ལོ་རྒྱུས་དང་། འབྱུང་འགྱུར་ལ་བལྟ་བ། མངོན་མེན་རིག་གནས་ཤུལ་བཞག་ལ་མྱོང་རོལ་བཅས་བྱས་ནས་སེམས་ནང་རྒྱལ་གཅེས་དང་། མཐུན་སྒྲིལ། འབད་འཐབ་བཅས་ཀྱི་སྙིང་སྟོབས་བཞག་ཡོད་”ཅེས་བྱེད་སྒོར་ཞུགས་པའི་རུ་ཁག་གི་སྣེ་ཁྲིད་དགེ་རྒན་ཧྲེན་ཅ་ཡིའུ་ཡིས་བཤད།
བསོད་བསྟན་གྱིས་བསྒྱུར།
