དེ་ཡང་ང་རང་སྤང་ལྗོངས་སྔོན་མོའི་སྟེང་ལ་བསྡད་དེ་གནམ་ལ་བལྟས་ཚེ་ཡངས་ཤིང་རྒྱ་ཆེ་བའི་ལྷ་ལམ་སྔོན་པོ་དང་། ཐུར་ལ་བལྟས་ཚེ་ལྷུང་ལྷུང་དུ་འབབ་པའི་ཆུ་མོ་ཅི་དགར་རྒྱུ་བ་མཐོང་། རྒྱབ་ན་ལྷུན་ཆགས་ཀྱི་རི་བོ་བརྗིད་ཅིང་། མདུན་ན་ས་གཞིའི་རྒྱན་དུ་གྱུར་པའི་ཕྱུགས་ཟོག་རྣམས་ཁྱུ་དང་ཁྱུ་བྱས་ཏེ་རྩྭ་ཐང་དུ་གྲམ་པ་དེ་དག་ནི་ཅི་འདྲའི་ཉམས་དགའ་ལ་་མཛེས་སྡུག་དང་ལྡན་པ་ཞིག་རེད་ཨང་།
ཞོགས་པ་དྲོ་སྐྱིད་ཉི་མ་ཤར་རིའི་རྩེ་ནས་ཤར་ཏེ་ཉི་ཟེར་ཁ་སྤྲོད་ཀྱི་རི་བོའི་ལྡེབས་སུ་འཕྲོ། བྱ་དང་བྱིའུ་སྔ་པོ་ནས་ཅ་ཅོ་སྒྲོག་གིན་གཟན་ཆས་འཚོལ་བར་བསྐྱོད། འབྲོག་པའི་ལྕགས་ཁང་གི་སྦུ་གུ་ལས་ལྡང་བའི་སྔོ་འཕྱུར་འཕྱུར་གྱི་དུ་བ་དག་རང་དབང་གི་སྟངས་སྟབས་དང་བཅས་སྟེང་ཕྱོགས་དགུང་སྔོན་དབྱིངས་སུ་བསྐྱོད། དྲོ་སྐྱིད་ཀྱི་ཉི་འོད་ས་གཞི་ཡོངས་ལ་ཁྱབ། མཁའ་རླུང་གཙང་བའི་ཞོགས་པར་སྤང་ལ་བསྡད་དེ་ཕྱོགས་བཞི་མཚམས་བརྒྱད་ཀྱི་རྣམ་པར་བཀྲ་བའི་མཛེས་ལྗོངས་ལ་མྱོང་རོལ་བྱེད་པ་ནི་བདེ་སྐྱིད་ཅིག་ཡིན། ཕྱེ་མ་ལེབ་ནི་ཕྲུ་གུ་དང་ལྷན་དུ་རྩེད་འཇོར་རོལ་བར་དགའ་བས། ཁོ་མདུན་ནས་འཕུར་ཅིང་བྱིས་པ་ཚོས་རྒྱབ་ནས་འདེད་པའི་རྣམ་པ་ནི་བལྟས་ཚོད་ལ་སྙིང་པོས་དབེན་ཡང་དོན་དུ་དེ་ནི་སྤྲོ་སྣང་གིས་ཕྱུག་པ་ཞིག་ཡིན།
ཉིན་གུང་གི་དུས་སུ་ཕར་ཕྱོགས་ཀྱི་རི་ལྡེབས་སུ་གྲམ་པའི་ཕྱུགས་ཟོག་དག་སྐབས་རེ་མགོ་བོ་དགྱེ་དགུ་གྲངས་མེད་བྱས་ཏེ་རྩྭ་ཟ་ཞིང་། སྐབས་རེ་འབུ་ཚགས་བྱས་ནས་རྔ་མ་གཡུགས། ཉི་མ་ཚ་བའི་སྟབས་ཀྱིས་ནོར་ལ་ལ་ནི་ཚ་གདུང་སེལ་བའི་ཆེད་དུ་ཆུ་མོའི་ནང་ལ་ཞུགས། དེ་ནས་ཁྱོད་ཀྱི་གོམ་པའི་འདེགས་འཇོག་ཁྱིམ་གྱི་ཕྱོགས་སུ་ཞོག་དང་། རོ་བཅུད་ལྡན་པའི་འོ་མའི་དྲི་བསུང་ཁྱིམ་ལ་མ་འཛུལ་གོང་ནས་སྣ་ལ་འཐུལ་ངེས། ཁྱིམ་ལ་འཛུལ་བ་དང་། ཨ་མས་སྔོན་ལ་འོ་མ་ཕོར་པ་གང་བླུགས་ནས་ང་ལ་འཐུང་པར་སྐུལ་བ་ནི་རྒྱུན་ལྡན་གྱི་སྣང་ཚུལ་ཞིག་ཏུ་གྱུར་ཡོད་ལ། ཞིམ་མངར་རོ་བཅུད་ལྡན་པའི་འོ་མ་ཁ་ལ་འཐུང་སྐབས་དེའི་དྲི་ཞིམ་དང་ལྷན་དུ་ད་དུང་མ་ཡལ་བའི་རྩྭ་འཇམ་གྱི་དྲི་མ་སོས་པ་ཞིག་ཀྱང་སྣ་ཡི་མྱང་བྱར་འཐུལ་ངེས།
ཕྱི་དྲོ་སླེབས་པ་ན། རྟ་བདུན་དབང་པོ་ནུབ་རིའི་རྩེ་ལ་སླེབས་ཤིང་འོད་ཟེར་ལྷག་མ་རི་འདབས་ནས་རིམ་བཞིན་གྱེན་ལ་སྡོག་འགོ་ཚུགས། དུས་དེར་འབྲི་མོ་མ་བུ་འཕྲད་པའི་ངུར་སྒྲ་ནི་སྙན་པའི་རོལ་མོ་ཞིག་དང་འདྲ་བར་ཡུལ་ཕྱོགས་འདིའི་ས་ཕྱོགས་གང་སར་ཁྱབ།
ང་རང་འབྲོག་ཐང་གི་འཚོ་བ་ལ་དགའ། གང་ཡིན་ཞེ་ན། འདི་རུ་གྲོང་ཁྱེར་གྱི་འཚོ་བ་ནང་བཞིན་འཕྲུལ་འཁོར་དང་རླངས་འཁོར་གྱི་སྒྲ་རྐྱང་རྐྱང་མ་ཡིན་པར། རང་བྱུང་ཁམས་ཀྱིས་གནང་བའི་སྐད་སྒྲ་སྣ་ཚོགས་གསལ་པོར་གོ་རྒྱུ་ཡོད། སྐད་སྒྲ་འདི་དག་ནི་སྨན་མཆོག་ཅིག་དང་འདྲ་བར་སེམས་ནང་གི་མི་སྐྱིད་པའི་གནས་ཚུལ་ཡོད་རིགས་གནས་སྐབས་དྲུང་ནས་འབྱིན།
ང་རང་ཡངས་པའི་རྩྭ་ཐང་ལ་དགའ། རྩྭ་ཐང་སྟེང་གི་མི་རྣམས་ཀྱི་རང་དབང་ངང་འཚོ་བ་སྐྱེལ་བའི་རྣམ་པ་ལ་དགའ། ངས་རང་གི་ལས་ཀྱི་དབང་ཐང་ལ་བཀའ་དྲིན་ཆེ་ཞུ་འདོད། དེ་ནི་ང་རང་མཐོ་སྒང་ནས་འཚར་ལོངས་བྱུང་བའི་བུ་ཕྲུག་ཅིག་ཡིན་པས། རང་ཉིད་ཡངས་པའི་རྩྭ་ཐང་དང་དྲོ་འཇམ་དྲི་བཞོན་ལས་བསྐྱེད་པའི་སྐལ་བཟང་མེ་ཏོག་བཞིན་དུ་གནས་འདིར་འཚར་ལོངས་བྱུང་བ་ཡིན་པས། ང་རང་བདེ་སྐྱིད་ལྡན་པའི་འབྲོག་ཐང་གི་འཚོ་བར་ཤིན་ཏུ་དགའོ། །
འབྲི་རུ་རྫོང་སློབ་འབྲིང་དང་པོའི་ལོ་རིམ༨（༥）
ཟུར་ཁྲིད་དགེ་རྒན། དགའ་བཟང་།
