༄༅། །དུས་ཚོད་ཀྱི་རིན་ཐང་།

བཏང་སྙོམས་དང་རིན་ཐང་གི་མཛེས་ཉམས་ཕྱུག་པའི་དུས་ཀྱི་བདག་མོ་ནི་ཡར་ཀླུང་གཙང་པོའི་ཆུ་རྒྱུན་བཞིན་ཉིན་མཚན་ལྟོས་མེད་ངང་མདུན་ཕྱོགས་སུ་བསྐྱོད་བཞིན་ཡོད་ལ། བདག་གི་ཁྱིམ་གྱི་སྒོ་མདུན་དུ་གནས་པའི་ལྕང་ཆུང་དེ་ཡང་ཉིན་རེ་བཞིན་འཚར་ལོངས་བྱུང་ནས་ལྕང་སྡོང་ཆེན་པོ་ཞིག་ལ་གྱུར་ཟིན་པ་མ་ཟད་ང་རང་ཡང་གོ་མེད་ཚོར་མེད་ཀྱི་བྱིས་པ་ཞིག་ནས་ད་ལྟའི་ན་ཚོད་དར་ལ་བབས་པའི་གཞོན་ནུ་མ་ཞིག་ལ་འགྱུར་ཟིན།

བྱིས་དུས་སུ་ང་རང་ནི་མྱུར་ཙམ་འཚར་ལོངས་བྱུང་ན་བསམ་བཞིན་ཡོད། འོན་ཀྱང་ད་ལྟ་ང་རང་འདི་འདྲ་བསམ་རྒྱུ་ལྟ་ཞོག་དུས་ཀྱི་བདག་མོ་དལ་ཙམ་ཕེབས་ན་སྙམ། དུས་ཀྱི་གོམ་འགྲོས་དང་བསྟུན་ནས་ང་ཚོའི་དྭངས་གཙང་གི་སེམས་ཁམས་ལ་འགྱུར་ལྡོག་འགྲོ་བཞིན་ཡོད་ལ། ང་ཚོའི་དྲིན་ཆེན་གྱི་ཨ་མའི་བཞིན་རས་ངོས་སུ་དུས་ཀྱི་འཁོར་ལོས་ཡ་ང་སྙིང་རྗེ་མེད་པར་གཉེར་མའི་རྦ་རླབས་ཀྱི་རི་མོ་འབྲི་བཞིན། སྔར་གྱི་སྣུམ་ཞག་དང་ལྡན་པའི་དབུ་སྐྲ་དག་ལ་ཚོན་ཁྲ་དཀར་པོས་མཛེས་མདངས་ཉམས་པར་བྱེད། ད་དུང་ལུས་པོའི་ཡན་ལག་ཀྱང་རྔ་དབྱུག་ལྟ་བུར་གུག་བཞིན་འདུག ཆུང་དུས་ཀྱི་ང་རང་ནི་ཉིན་གང་སེམས་ནད་ཕྲན་བུ་ཙམ་ཡང་མེད་པར་ཕ་མ་གཉིས་པོའི་བྱམས་སྐྱོང་འོག་འཚར་ལོངས་བྱུང་། ད་ལྟ་དུས་ཀྱི་བྱེད་པོས་ཅུང་ཙམ་སྒུག་ན་སྙམ་ཡང་། དུས་ཀྱི་རྟ་ཕོ་ནི་འཕངས་ཟིན་པའི་མདའ་མོ་བཞིན་སླར་ལོག་པའི་སྐལ་བ་ནི་ནམ་ཡང་མེད།

དུས་ཀྱི་འཁོར་ལོ་ནི་གཟུགས་འཛིན་མིག་གིས་མཐོང་མི་ཐུབ་ལ། དབང་པོའི་ཡན་ལག་གིས་ཀྱང་རེག་རྒྱུ་མེད་པས། ང་ཚོས་ནམ་ཡང་དུས་ཀྱི་བདག་མོ་རང་ཉིད་ཀྱི་མིག་མདུན་ནས་ཇི་ལྟར་འདས་མིན་ཚོར་མི་ཐུབ། སྐྱེ་རྒ་ན་འཆི་ནི་འགྲོ་བ་མིའི་རིགས་ཚང་མས་རྟོགས་པའི་འཇིག་རྟེན་གྱི་ཆོས་ཉིད་ཅིག་ཡིན་རུང་། གློ་བུར་བར་ཆད་དང་ཆག་སྒོ་མགོ་ཐོག་ཏུ་འབབ་པའི་ཉིན་མོར། ད་གཟོད་དུས་ཀྱི་མྱུར་བགྲོད་མེ་འཁོར་འདི་ཉིད་དབྱར་དགུན་སྟོན་དཔྱིད་ཀྱི་དབྱེ་བ་མེད་པར་ང་ཚོའི་མིག་མདུན་ནས་མྱུར་མོར་འདས་འགྲོ་བ་སེམས་ཀྱིས་ཚོར་ཡང་སྲིད།

དུས་རྒྱུན་གྱི་སློབ་སྦྱོང་བྱེད་པའི་སྐབས་སུ་ཡང་ང་ཚོས་དུས་ཚོད་ལ་དམ་འཛིན་བྱས་ནས་རང་དགོས་ཤེས་བྱའི་གནས་ལ་བརྩོན་པ་བྱེད་དགོས་པ་ལས་ཕན་མེད་ཀྱི་ལས་ལ་མགོ་གཡེང་ནས་སྡོད་མི་རུང་། དུས་ཚོད་ཀྱང་ཤེས་བྱ་ཡོན་ཏན་དང་འདྲ་བར་རྐུན་པོས་རྐུ་རྒྱག་མི་ཐུབ་ལ། དབང་གྲགས་ཅན་གྱིས་དབང་དང་འབྱོར་པར་བརྟེན་ནས་འཕྲོག་ཀྱང་མི་ཐུབ་པས། ང་ཚོས་རང་ཉིད་ལ་བདེ་སྐྱིད་དང་ལྡན་པའི་མ་འོངས་ཞིག་བསྐྲུན་དགོས་ཚེ། ངེས་པར་དུ་རང་ཉིད་ལ་དབང་བའི་རིན་ཐང་གི་དུས་ཚོད་དག་དམ་འཛིན་དང་འཕྲོ་བརླག་མི་ཡོང་བ་བྱེད་དགོས། མི་ལ་ལས་ཕྱིན་ཚར་བའི་དུས་ཚོད་ལ་འགྱོད་པས་མནར་ནས་སྡོད་པ་ལས་མིག་མདུན་དུ་འགྲོ་བཞིན་པའི་དུས་ཚོད་ལ་སྣང་བ་འཇོག་གི་མེད། ཕྱིར་ལོག་མེད་པའི་དུས་ཀྱི་ཆོས་ཉིད་བཙན་པོའི་མདུན་ན་ང་ཚོར་ལྷག་པ་དེ་རིང་གི་དུས་ཚོད་ཙམ་ལས་མེད་པས། ད་ལྟའི་དུས་ཚོད་ལ་དམ་འཛིན་བྱས་ནས་ཕྱིན་ཆད་འགྱོད་པ་མེད་པ་ཞིག་བྱེད་དགོས་པ་གཙོ་བོ་རེད།

མི་ལ་ལས་སྣ་མང་ཕུན་སུམ་ཚོགས་པའི་འཇིག་རྟེན་འདིའི་ནང་ཚེ་སྲོག་ནི་རིན་ཐང་དང་ལྡན་པར་ངོས་འཛིན་བྱེད་ཀྱི་ཡོད། ལ་ལས་གསེར་དངུལ་རྒྱན་གོས་ནི་རིན་ཐང་དང་ལྡན་པར་ངོས་འཛིན་བྱེད་ཀྱི་ཡོད། འོན་ཀྱང་ཞིབ་མོར་བསམ་ཚེ། དེ་དག་ལས་ཀྱང་རིན་ཐང་ཆེ་བ་ནི་དུས་ཚོད་ཡིན། ཚེ་སྲོག་ནི་དུས་ཚོད་ལ་དམ་འཛིན་མེད་པར་ཉི་མ་གང་འཁྱོལ་བྱས་ཚེ། ཚེ་སྲོག་དེ་ཡང་རིན་ཐང་མེད་པར་འགྱུར་བས། ང་ཚོས་མིག་མདུན་གྱི་སྐར་ཆ་གཅིག་ནས་འགོ་བརྩམས་ཏེ་གཅེས་འཛིན་བྱས་ན་ཡོད་ཚད་རིན་ཐང་ལྡན་པར་འགྱུར་སྲིད། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། ཉི་ཕན།