ཟླ་12ཚེས་26ཉིན་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་རེད། རང་སྐྱོང་ལྗོངས་ནོར་སྲིད་ཐིང་ཏང་ཙུའུ་ཡི་ཁོངས་མི་ཐིང་ཀྲང་གཞོན་པ་ལིའུ་ཝུའུ་ཡིས་རང་ལྗོངས་ཀྱིས་སྔར་ལས་ཧུར་བརྩོན་གྱི་ནོར་སྲིད་སྲིད་ཇུས་ལག་བསྟར་བྱས་པའི་ཕན་འབྲས་སྐོར་ངོ་སྤྲོད་གནང་སྟེ། 2025ལོར་ཀྲུང་དབྱང་གི་དམིགས་བསལ་ཐུགས་ཁུར་དང་ཤུགས་ཆེན་རྒྱབ་སྐྱོར་འོག་བོད་ཀྱིས་སྔར་ལས་ཧུར་བརྩོན་གྱི་ནོར་སྲིད་སྲིད་ཇུས་གནད་ལ་འཁེལ་བའི་སྒོ་ནས་ལག་བསྟར་བྱས་ཏེ། ནོར་སྲིད་འཁོར་སྐྱོད་བརྟན་བརླིང་ལེགས་སུ་ཕྱིན་པ་དང་འགན་སྲུང་ནུས་ལྡན་བྱུང་ཞིང་སྔོན་དཔག་ལྟར་ན་ལོ་ཧྲིལ་པོའི་ནོར་སྲིད་ཡོང་འབབ་སྒོར་དུང་ཕྱུར་300ཐོག་མར་བརྒལ་རྒྱུ་དང་། ནོར་སྲིད་གཏོང་སྒོ་སྒོར་དུང་ཕྱུར་3000ཐོག་མར་བརྒལ་རྒྱུའི་རེ་བ་ཡོད་པས། བོད་ཀྱི་ནོར་སྲིད་གཏོང་ཡོང་ལོ་རྒྱུས་རང་བཞིན་གྱི་ཚད་བརྒལ་མངོན་འགྱུར་ཐུབ་རྒྱུ་ཡོད་པ་རེད།
ཤེས་རྟོགས་བྱུང་བར་གཞིགས་ན། 2025ལོར་ཀྲུང་དབྱང་གིས་བོད་ལ་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་ཕྱིན་ནས་ལོ་རེའི་ཁ་གསབ་མ་དངུལ་སྒོར་དུང་ཕྱུར་2881ཟིན་ཡོད་པ་དང་། ཟླ་དང་པོ་ནས་བཅུ་གཅིག་པའི་བར་ལྗོངས་ཡོངས་ཀྱི་སྤྱིར་བཏང་སྤྱི་པའི་སྔོན་རྩིས་ཡོང་འབབ་སྒོར་དུང་ཕྱུར་287.18ལེགས་གྲུབ་བྱུང་བ་དེ་དུས་མཚུངས་ལས་བརྒྱ་ཆ་14.6འཕར་ཡོད། དེའི་ནང་ཁྲལ་སྡུད་ཡོང་འབབ་སྒོར་དུང་ཕྱུར་193.34ཟིན་པ་དང་བརྒྱ་ཆ་19.7འཕར་བ་དང་ཡོང་འབབ་ཀྱི་སྤུས་ཚད་མངོན་གསལ་དོད་པོས་མཐོ་རུ་ཕྱིན་ཡོད། དུས་མཚུངས་ལྗོངས་ཡོངས་ཀྱི་སྤྱིར་བཏང་སྤྱི་པའི་སྔོན་རྩིས་གཏོང་སྒོ་སྒོར་དུང་ཕྱུར་2715.61ཟིན་པ་དེ་བརྒྱ་ཆ་7.8འཕར་ཡོད།
དེའི་ནང་2025ལོར་དམངས་འཚོ་ཁྱབ་ཁོངས་ཀྱི་ནོར་སྲིད་མ་དངུལ་གྱིས་ལྗོངས་ཡོངས་ཀྱི་སྤྱིར་བཏང་སྤྱི་པའི་སྔོན་རྩིས་གཏོང་སྒོའི་བརྒྱ་ཆ་80ཡན་ཟིན་ཡོད། སྤྱི་ཚོགས་འགན་སྲུང་མ་ལག་རྒྱུན་ཆད་མེད་པར་འཐུས་ཚང་དུ་བཏང་བ་དང་། ལྗོངས་ཡོངས་ཀྱི་གཞི་རྩའི་རྒན་གསོ་འགན་བཅོལ་དང་གཞི་རྩའི་སྨན་བཅོས་འགན་བཅོལ་ནང་ཞུགས་མཁན་མི་གྲངས་མུ་མཐུད་མང་དུ་ཕྱིན་ནས་འགན་སྲུང་ཆུ་ཚད་བརྟན་པོའི་ངང་མཐོ་རུ་ཕྱིན་ཡོད། རང་སྐྱོང་ལྗོངས་ཀྱིས་གྲོང་ཁྱེར་དང་རྫོང་གི་སྤོ་སྒྱུར་གཏོང་སྤྲོད་མ་དངུལ་སྒོར་དུང་ཕྱུར་1972བཀོད་སྒྲིག་བྱས་ནས་ལོ་རྒྱུས་ཀྱི་མཐོ་ཤོས་བཏོད་ནས་གཞི་རིམ་གྱི་“འགན་ལེན་གསུམ་”གྱི་དགོས་མཁོ་འགན་ལེན་ནུས་ལྡན་བྱུང་ཞིང་། གྲོང་ཁྱེར་དང་གྲོང་གསེབ་ཀྱི་གཞི་རྩའི་སྤྱི་པའི་ཞབས་ཞུ་སྔར་ལས་དོ་མཉམ་དང་། ཞིང་འབྲོག་ཁུལ་གྱི་བསྐུར་སྐྱེལ་ཟོག་འགྲེམས་དྲ་རྒྱ་ཁྱབ་ཚད་བརྒྱ་ཆ་98ཟིན་པ། གྲོང་ཁྱེར་གྱི་འགན་སྲུང་རང་བཞིན་གྱི་སྡོད་ཁང་འཛུགས་སྐྲུན་དང་ཁུལ་ཆུང་རྙིང་པ་བསྒྱུར་བཀོད་ལ་སྐུལ་འདེད་ཏན་ཏིག་བཏང་ཡོད། སྒོར་དུང་ཕྱུར་187བཀོད་སྒྲིག་བྱས་ནས་དམངས་འཚོ་དོན་དག་དངོས་ཁག་28ལག་ལེན་བསྟར་རྒྱུར་རྒྱབ་སྐྱོར་བྱས་ཏེ་མང་ཚོགས་ཀྱི་ཛ་དྲག་དཀའ་ངལ་དང་སེམས་ཁྲལ་གྱི་གནད་དོན་ཐག་གཅོད་བྱས་ཡོད།
རང་སྐྱོང་ལྗོངས་ནོར་སྲིད་ཐིང་སྔོན་རྩིས་ཁྲུའུ་ཡི་ཁྲུའུ་ཀྲང་ལིའུ་ཞུའེ་ཡིས“ལོ་ལྔ་ཚན་བཅུ་བཞི་པའི”དུས་སྐབས་ཀྱི་ནོར་ཁྲལ་སྒྲིག་སྲོལ་སྒྱུར་བཅོས་གནས་ཚུལ་ངོ་སྤྲོད་གནང་སྐབས། བོད་ཀྱི་དེང་རབས་ནོར་སྲིད་ལམ་ལུགས་ཀྱི་སྒྲོམ་གཞི་གཞི་རྩའི་ཆ་ནས་གཏན་འཁེལ་བྱས་ཡོད་ཅིང་། སྔོན་རྩིས་དོ་དམ་ཐད་གྲུབ་འབྲས་ཀྱིས་ཁྲིད་སྟོན་དུ་འཛིན་པའི་“2+1”གཞི་རྩའི་སྔོན་རྩིས་བསྒྱུར་བཅོས་མ་ལག་ལྡན་པའི་སྒོ་ནས་སྐུལ་འདེད་བཏང་བ་དང་སྔོན་རྩིས་ཚོད་འཛིན་སྲ་བརྟན་བྱས་ཏེ། སྲིད་གཞུང་གིས་“འཚོ་བ་དམ་པོ་”ཡི་འཚོ་བ་རོལ་བར་གོམས་གཤིས་བྱུང་བས། སྤྱིར་བཏང་འགྲོ་སོང་གིས་བཟུང་བའི་བསྡུར་ཚད་མུ་མཐུད་དུ་ཆག་ཡོད། ནོར་སྲིད་སྒྲིག་སྲོལ་ཐད་རིམ་པ་ཁག་གི་ལས་དོན་དབང་ཆ་དང་གཏོང་སྒོའི་འགན་འཁྲི་ཁ་གསལ་བཏང་བ་དང་། སྤོ་སྒྱུར་གཏོང་སྤྲོད་ལམ་ལུགས་རྒྱུན་ཆད་མེད་པར་འཐུས་ཚང་དུ་བཏང་བ། རང་སྐྱོང་ལྗོངས་ཀྱིས་ཕྱོགས་ཁག་ལ་སྤོ་སྒྱུར་གཏོང་སྤྲོད་ལོ་ལྔའི་ནང་བརྒྱ་ཆ་39འཕར་བ་དང་། གཞི་རིམ་གྱི་“འགན་ལེན་གསུམ་”གྱི་ཉེན་ཁ་“མི་ཐོན་པ་”རྒྱུན་འཁྱོངས་བྱས་པ་མ་ཟད། རྫོང་（གྲོང་ཁྱེར）10རུ་ནོར་སྲིད་ཐད་ཀར་དོ་དམ་བསྒྱུར་བཅོས་ཚོད་ལྟ་བྱས་ནས་གཞི་རིམ་གྱི་འགན་སྲུང་ནུས་པ་ཆེ་རུ་བཏང་ཡོད། དཔྱ་ཁྲལ་ལམ་ལུགས་ཐད་རྒྱལ་ཡོངས་དང་དུས་མཉམ་དུ་དཔྱ་ཁྲལ་ལམ་ལུགས་འཐུས་ཚང་དུ་གཏོང་བ་དང་ཁྲལ་མིན་པའི་ཡོང་འབབ་དོ་དམ་ཚད་ལྡན་དུ་གཏོང་བ། ཁེ་ལས་ཀྱི་ཐོབ་ཁྲལ་ས་གནས་ཀྱིས་མཉམ་སྤྱོད་བྱས་པའི་ཆ་ཤས་རྩ་ཆག་གཏོང་བ་སོགས་ཀྱི་གཟིགས་སྐྱོང་སྲིད་ཇུས་དོན་འཁྱོལ་བྱས་ནས་ཚོང་གཉེར་ཁོར་ཡུག་ལེགས་སུ་གཏོང་རྒྱུ་ཡིན།
ཚེ་རིང་ཐར་གྱིས་བསྒྱུར།
