ཉེ་ཆར་གསར་འགོད་པས་ལྗོངས་ཡོངས་ཀྱི་གྲོང་གསེབ་ཀྱི་སྐུར་སྐྱེལ་ཟོག་འགྲེམས་མ་ལག་འཛུགས་སྐྲུན་གྱི་གྲུབ་འབྲས་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར། རང་ལྗོངས་ཀྱིས་“སྦྲག་མྱུར་མཉམ་ལས”དང་“འགྲུལ་པ་དང་ཟོག་འགྲེལ། སྦྲག་སྲིད་མཉམ་འདྲེས་”སོགས་ཀྱི་རྣམ་པ་བརྒྱུད་དེ། “རྫོང་དང་རྫོང་ཁག་བགོས་དང་། ཤང་དང་ཤང་ལ་དྲ་བ་དང་ས་ཚིགས་ཡོད་པ། གྲོང་ཚོ་ཚང་མར་ཞབས་ཞུ་ཡོད་པ་” བཅས་ཐག་རིང་ཞིང་འབྲོག་ཁུལ་གྱི“མཐའ་འཇུག་གི་སྤྱི་ལེ་གཅིག”ཕྱོགས་ཡོངས་ནས་མངོན་འགྱུར་ཐུབ་པ་བྱས་ཡོད།
རང་སྐྱོང་ལྗོངས་སྦྲག་སྲིད་དོ་དམ་ཅུས་ཀྱིས་ངོ་སྤྲོད་བྱས་པར་གཞིགས་ན། མིག་སྔའི་བར་རང་ལྗོངས་སུ་རིམ་རྩིས་བྱས་ན་སྦྲག་སྲིད་ཀྱི་མྱུར་སྐྱེལ་ལས་ཚིགས་1324བསྐྲུན་ཡོད་པ་དང་། རིམ་སྤར་གྱི་གྲོང་ཚོ་རིམ་པའི་སྐུར་སྐྱེལ་ཟོག་འགྲེམས་ཕྱོགས་བསྡུས་ཞབས་ཞུའི་ས་ཚིགས་2410བཙུགས་པས་གྲོང་གསེབ་སྐུར་སྐྱེལ་གྱི་ཟོག་འགྲེམས་དྲ་རྒྱ་ཁྱབ་ཚད་100%ཟིན་པ་དང་གྲོང་གསེབ་ཀྱི་སྦྲག་ལམ་རླངས་འཁོར་ཅན་དུ་འགྱུར་བ་100%ཟིན་ཡོད། 2025ལོར་“སྦྲག་སྲིད་མྱུར་སྐྱེལ་མཉམ་ལས”ཀྱིས་གྲོང་ཚོར་མྱུར་སྐྱེལ་ཐུམ་སྒྲིལ་བསྐྱལ་ཚད་འབོར་གྲངས་ཁྲི་600ལས་བརྒལ་ནས་ན་ནིང་གི་ལྡབ་2.5ཟིན་ཡོད།
“བོད་ལ་བསྐུར་གླ་མི་དགོས་པའི་”སྲིད་ཇུས་ཀྱི་རྒྱབ་སྐྱོར་འོག རང་སྐྱོང་ལྗོངས་ཚོང་དོན་ཐིང་གིས་སྐུར་སྐྱེལ་གྱི་ཟོག་འགྲེམས་དང་གློག་རྡུལ་ཚོང་དོན་མཐུན་སྦྱོར་ངང་འཕེལ་རྒྱས་གཏོང་རྒྱུར་སྐུལ་འདེད་ཤུགས་ཆེན་བཏང་ཡོད། གློག་རྡུལ་ཚོང་དོན་གྲོང་གསེབ་ཏུ་བསྐྱོད་པའི་ལས་དོན་ཐད་ཅིན་ཏུང་ཚོགས་པ་ནང་འདྲེན་བྱས་པ་བརྒྱུད་ཅིན་ཏུང་གིས་བོད་དུ་ཐད་ཀར་མ་རྩ་བཞག་པ་སྒོར་དུང་ཕྱུར་5བརྒལ་བ་དང་སྐུལ་ཁྲིད་ཀྱི་མ་རྩ་སྒོར་དུང་ཕྱུར་15ལས་བརྒལ་ཡོད། དེའི་ནང་ལྷོ་ནུབ་ཀྱི་ཐོག་མའི་རིག་ནུས་ཅན་“ས་སྤྱང་མཛོད་ཁང་”དང་པོ་དེ་བསྐྲུན་ནས་སྤྱོད་འགོ་ཚུགས་པས་ལྷ་སའི་མཐའ་འཁོར་གྱི་གློག་རྡུལ་ཚོང་དོན་ཉོ་སྒྲུབ་དེ་ཉིན་གཅིག་གམ་ཕྱི་ཉིན་ལ་འབྱོར་ཐུབ་པ་མངོན་འགྱུར་བྱུང་ཡོད། ཐག་རིང་ས་གནས（གྲོང་ཁྱེར་）ལ་ཉིན་བཞི་ཡི་ནང་འབྱོར་ནས་ས་གནས་དེ་གའི་འཛད་སྤྱོད་པར་“མགྱོགས་ལ་གྲོན་ཆུང་”བའི་འཛད་སྤྱོད་ཉམས་སུ་མྱོང་ཐུབ་པ་བྱུང་ཡོད།
ངོ་སྤྲོད་བྱས་པར་གཞིགས་ན། རང་སྐྱོང་ལྗོངས་འགྲིམ་འགྲུལ་སྐྱེལ་འདྲེན་ཐིང་གིས་རྒྱུན་མཐུད་ངང་གྲོང་རྡལ་དང་སྒྲིག་གཞིའི་གྲོང་ཚོར་འགྲུལ་སྐྱེལ་རླངས་འཁོར་འབྲེལ་མཐུད་བྱེད་པའི་ལས་དོན་ལ་སྐུལ་འདེད་བཏང་ནས། གྲོང་གསེབ་ཀྱི་འགྲུལ་སྐྱེལ་རོགས་སྐྱོར་སྲིད་ཇུས་བཙུགས་ནས་ལོ་ལྟར་གྲོང་གསེབ་ཀྱི་འགྲུལ་སྐྱེལ་ཁ་གསབ་མ་དངུལ་སྒོར་ཁྲི་3392དོན་འཁྱོལ་བྱས་པ་རེད། མིག་སྔའི་བར་ལྗོངས་ཡོངས་ཀྱི་གྲོང་གསེབ་འགྲུལ་སྐྱེལ་ཁེ་ལས་54དང་། ལམ་ཐིག་369ལ་འཁོར་རིགས་501ཡིས་རིམ་རྩིས་བྱས་ན་ཤང་གྲོང་623ལ་མངོན་འགྱུར་བྱུང་བ་དང་། སྒྲིག་གཞི་ཅན་གྱི་གྲོང་ཚོ་3902འགྲུལ་སྐྱེལ་རླངས་འཁོར་དང་འབྲེལ་མཐུད་བྱས་པས་འགྲུལ་སྐྱེལ་རླངས་འཁོར་འབྲེལ་མཐུད་བྱེད་ཚད་སོ་སོར་91.8%དང་73.0%ཟིན་པ། 2025ལོར་སྒྲིག་གཞི་ཅན་གྱི་གྲོང་ཚོ་28ལ་གསར་དུ་འགྲུལ་སྐྱེལ་རླངས་འཁོར་དང་འབྲེལ་མཐུད་བྱས་པ་རེད། འགྲུལ་སྐྱེལ་དྲ་རྒྱ་རྒྱུན་ཆད་མེད་པར་རྒྱ་སྐྱེད་དང་རྒྱུན་སྲིང་བྱས་པ་བརྒྱུད་ཞིང་འབྲོག་ཁུལ་གྱི་སྐུར་སྐྱེལ་ཟོག་འགྲེམས་མ་ལག་འཛུགས་སྐྲུན་ལ་གདམ་ག་བྱེད་ཆོག་པའི་སྐྱེལ་འདྲེན་ནུས་པ་དང་ལམ་ཐིག་གི་འདེགས་སྐྱོར་མཁོ་འདོན་བྱས་ཡོད།
ཤེས་རྟོགས་བྱུང་བར་གཞིགས་ན། ལྗོངས་ཡོངས་ཀྱི་རྫོང་དང་ཆུས་38ལ་འགྲུལ་པ་དང་ཟོག་འདྲེན་སྦྲག་སྲིད་འཕེལ་རྒྱས་ཀྱི་ཚོད་ལྟ་སྤེལ་བ་དང་། གྲོང་གསེབ་ཀྱི་འགྲུལ་པ་དང་ཟོག་འདྲེན་སྦྲག་སྲིད་ཀྱི་མཉམ་འདྲེས་ལམ་ཐིག་97ཤར་གཏོང་ཐུབ་པ་དང་། གྲོང་གསེབ་ཀྱི་འགྲུལ་སྐྱེལ་འཁོར་རིགས་130དེའི་ནང་ཞུགས་པས་2025ལོར་རིམ་རྩིས་བྱས་ན་མངགས་བསྐྱེལ་སྦྲག་རྫས་དང་། མྱུར་སྐྱེལ་སྦྲག་རྫས་ཀྱི་ཐུམ་སྒྲིལ་སོགས་ཁྲི་114.7ལྷག་ཙམ་སྐྱེལ་འདྲེན་བྱས་ནས་ཞིང་ལས་ཐོན་རྫས་གྲོང་ཚོ་ནས་གྲོང་ཁྱེར་དུ་ཡོང་བ་དང་། འཛད་སྤྱོད་དངོས་རྫས་གྲོང་གསེབ་ཏུ་བསྐྱོད་པའི་དགོས་མཁོ་དེ་བས་ལེགས་པའི་སྒོ་ནས་སྐོང་ཐུབ་པ་བྱུང་ཡོད།
གོམ་སྟབས་རྗེས་མར་རང་ལྗོངས་ཀྱིས་རྒྱུན་མཐུད་ངང་གྲོང་གསེབ་ཀྱི་སྐུར་སྐྱེལ་ཟོག་འགྲེམས་མ་ལག་ལེགས་སུ་བཏང་ནས་“མྱུར་སྐྱེལ་གྲོང་ཚོར་བསྐྱོད་པའི”སྤུས་ཚད་ལེགས་གཏོང་ལ་སྐུལ་འདེད་བཏང་ནས། དེ་ལས་མང་བའི་ཞིང་འབྲོག་པར་དེང་རབས་ཟོག་འགྲེམས་ལས་བྱུང་བའི་སྟབས་བདེ་ལོངས་སུ་སྤྱོད་དུ་བཅུག་ནས་གྲོང་གསེབ་དར་རྒྱས་ཡོང་བར་སྔར་བས་རྒྱབ་སྐྱོར་མཁོ་འདོན་བྱེད་རྒྱུ་ཡིན་པ་རེད།
བསོད་བསྟན་གྱིས་བསྒྱུར།
