དུས་རབས་རྐང་འགྲོས་མྱུར་བ། །
མི་སེམས་བསླུ་བྲིད་མང་བ། །
རང་སེམས་རང་གིས་སྲུང་ནས། །
དྲང་གཏམ་གསལ་བར་བཤད་འདོད། །
རང་དགོས་ཤེས་བྱའི་གནས་ལ། །
བརྩོན་འགྲུས་ལྕག་གིས་སྐུལ་ཏེ། །
ཕ་མའི་བཀའ་དྲིན་སོམས་པ། །
ན་མཉམ་གཞོན་ནུའི་རྒྱན་རེད། །
ཆང་རག་དུ་བའི་ཆེད་དུ། །
དངུལ་ལོར་བག་མེད་གཏོང་བ། །
ཕ་མའི་བཀའ་དྲིན་བརྗེད་པ། །
སློབ་གྲོགས་ཁྱོད་ཀྱི་མཚང་རེད། །
ཤེས་བྱའི་ལྡུམ་ར་འགྲིམ་ཞིང་། །
བཤེས་གཉེན་བཀའ་སློབ་སྲུང་ནས། །
རང་དགོས་ཤེས་བྱར་བརྩོན་པ། །
སློབ་མ་བཟང་པོའི་རྒྱན་རེད། །
དགོས་པའི་ཤེས་བྱར་མི་བརྩོན། །
མི་དགོས་དྲ་ཁང་འགྲིམ་སྟེ། །
ལང་ཚོ་སྟོང་ཟད་གཏོང་མཁན། །
ན་གཞོན་ཁྱོད་ཀྱི་མཚང་རེད། །
ཤེས་བྱ་རིག་གནས་སྦྱངས་ནས། །
སྤྱི་ཚོགས་འཚོ་བའི་ཁྲོད་དུ། །
རང་གཞན་གཉིས་ཕན་གནང་ན། །
གངས་ཕྲུག་གཞོན་ནུའི་རྒྱན་རེད། །
བརྩོན་པས་ཡོན་ཏན་མ་སྦྱངས། །
འདུ་འཛིའི་ཁྲོམ་ལམ་འགྲིམ་སྟེ། །
དོན་མེད་གཏམ་འཆལ་སྨྲ་བ། །
རང་རིགས་གཞོན་ནུའི་མཚང་རེད། །
ང་ལས་ཁྱོད་དམན་ཟེར་ཞིང་། །
རིགས་རུས་དབྱེ་བ་འབྱེད་ཀྱིན། །
མཐུན་སྒྲིལ་གསེར་ཟམ་བཤིག་མཁན། །
ང་རྒྱལ་དུག་ཆུའི་མཚང་རེད། །
མཐུན་སྒྲིལ་ལག་གདང་སྦྲེལ་ཞིང་། །
ཡ་རབས་སྲོལ་རྒྱུན་བསྐྱངས་ཏེ། །
བློ་རིག་གསལ་བའི་སྐབས་སུ། །
སྐྱོན་ཡོན་གསལ་བར་ཕྱེས་དང་། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། བོན་བསྟན་འཛིན།
