ངས་སྨག་རུམ་གྱིས་ཡོངས་སུ་བསྒྲིབས་པའི་ཀྱག་ཀྱོག་དང་གཡང་གཟར་གྱི་ལམ་སྣེ་ཞིག་ཏུ་ལག་སྙོབ་བྱེད་བཞིན་མི་ཚེའི་བགྲོད་ལམ་གསར་པ་ཞིག་ལ་འགྲོ་མགོ་བརྩམས། དུས་ནམ་ཞིག་ལ་འོད་སྣང་གིས་བརྒྱན་པའི་མར་མེ་རྐང་གཅིག་གིས་རང་ལུས་ཤ་ཁྲག་གི་ཟེགས་མ་རེ་རེ་ངའི་ཁོར་ཡུག་གི་ཕྱོགས་བཞིར་སྟོར་ནས་མུན་པའི་སྨག་རུམ་མཐའ་དག་ཕར་མཐར་བསྐྲད་དེ་རྨོངས་པའི་སྨག་རུམ་ལས་བསྐྱབས། མར་མེ་རྐང་གཅིག་དེ་ནི་བདག་གི་སློབ་ཆུང་གི་དགེ་རྒན་ནམ་མི་ཚེའི་ནང་གི་དགེ་རྒན་ཐོག་མ་དེའང་ཡིན།
དགེ་རྒན་ཁོང་ནི་གཟུགས་རིང་ཞིང་ཤ་སྐམ་ལ་ངོ་གདོང་ཅུང་ནག་ཙམ་ཞིག་ཡོད། ཉིན་ལྟར་ཁོང་འཕྲད་དུས་དགའ་སྤྲོ་ཡི་སྣང་བ་ཞིག་དབང་མེད་དུ་སྦྱིན། གང་ལགས་ཤེ་ན། ཁོང་གི་ཅུང་ནག་པའི་ངོ་གདོང་དེའི་སྟེང་དུ་དུང་ལྟར་དཀར་བའི་སོ་ཕྲེང་དེ་མངོན་ནས་བྱམས་བརྩེའི་འཛུམ་མདངས་ཀྱི་འོད་སྣང་དེ་ནི་སྨག་རུམ་མུན་པ་ཇི་འདྲ་ཞིག་ཡིན་ཡང་བཏུམས་མི་ཐུབ་པ་མ་ཟད། དེས་སློབ་མ་མང་པོའི་སྐྱོ་སྡུག་གི་སེམས་ཁམས་ལ་བྱམས་བརྩེའི་འོད་སྣང་སྦྱིན་ནས་སྐྱོ་སྡུག་གི་མུན་པ་བཅོམ་ནས་དགའ་སྤྲོའི་མི་ལྕེ་འབར་བ་བྱེད། དེ་བས་ཁོང་དང་འདྲ་བའི་སློབ་ཆུང་གི་བཤེས་གཉེན་དམ་པ་རྣམས་ནི་བདག་གི་མི་ཚེ་གང་པོ་འདི་རུ་རྨོངས་གཉིད་ཀྱི་མུན་པ་སེལ་ནས་ཤེས་རིག་གི་ཟམ་ཆེན་བསྐྲུན་མཁན་དེ་ཡིན། ཁོང་གིས་ད་དུང་བདག་ཆུང་དུས་ནས་མི་བྱེད་ལུགས་བྱེད་སྟངས་དང་འབྲེལ་བའི་སློབ་ཚན་མང་པོ་ནན་ཏན་ངང་སློབ་ཁྲིད་གནང་ནས། འགྲོ་སྟངས་འཚོ་སྟངས་སོགས་བསྐྱར་ནས་བསྐྱར་དུ་ནན་བཤད་གནང་སྟེ་མི་བྱེད་ལུགས་བྱེད་སྟངས་སོགས་ཀྱི་བསླབ་བྱའི་འབོད་སྒྲ་ཡང་ཡང་སྒྲོག་པས་བདག་གིས་མི་ཚེ་རིང་པོ་འདིར་འགྲིམ་ལུགས་འགྲིམ་སྟངས་ཤེས་བྱུང་ངོ་། །
ཨེ་མ། ཁྱེད་ཀྱི་ཚིག་འཇམ་གྱི་བསླབ་བྱ་དང་ཤེས་རིག་གི་སྒྲོན་མེས་སྤྱི་ཚོགས་འདིའི་ཐོག་སྤྱོད་ཡོན་གཉིས་ལྡན་གྱི་སློབ་མ་འབོར་ཆེན་གསོ་སྐྱོང་གནང་སྟེ་སྤྱི་ཚོགས་འདི་སྔར་ལས་ལྷག་པའི་འཕོ་འགྱུར་ཇེ་ཆེར་འགྲོའོ། ། ཨེ་མ། ཁྱེད་ཀྱིས་རང་ལ་བརྩེ་བའི་བྱམས་ལྡན་གྱི་ཕ་མ་ཕར་ལ་བསྐྱུར་ནས་རང་ལུས་གི་ཕུང་པོའི་ལུས་ངག་ཡིད་གསུམ་གྱིས་དཀའ་ངལ་ལ་མ་འཛེམས་པར་མི་རབས་ནས་མི་རབས་སུ་རྨོངས་གཉིད་ལ་ཚུད་པའི་སློབ་མ་དེ་ཚོར་ཤེས་རིག་གི་ཟམ་ཆེན་བསྐྲུན་ནས། ཤེས་རིག་གི་འོད་སྣང་སྦྱིན་ནས་སློབ་མ་ཚོའི་ལམ་སྣེ་ཁྲིད་དེ་ཤེས་རིག་གི་ལམ་བུའི་སྟེང་དུ་ལམ་སྟོན་རོགས་བྱེད་པའི་བྱས་རྗེས་བཟང་པོ་དེ་ལ་བསྔགས་པའི་ཁྲ་ཚོམ་གྱི་མེ་ཏོག་གུས་མོས་བསྟོར་རོ། །
བཤེས་གཉེན་ལགས། ཁྱེད་ནི་རང་སེམས་ཀྱི་མེ་ལོང་ངོས་སུ་དུས་རྟག་ཏུ་དྲན་སྐུལ་གྱི་ཅོང་བརྡ་གཏོང་མཁན་དེ་ཡིན་ལ། ཀྱག་ཀྱོག་གི་གཡང་གཟར་གྱི་ལམ་སྣེ་ནས་ཤེས་རིག་གི་ལམ་བཟང་དུ་ཁྲིད་མཁན་དེའང་ཡིན། ཁྱེད་ཀྱིས་བདག་ལ་གནང་བའི་ཤེས་བྱ་ཡོན་ཏན་གྱི་བདུད་རྩི་རེ་རེ་ནི་བདག་གི་འཚོ་གནས་ཀྱི་འབྱུང་རྩ་ཡིན་པས། ཁྱེད་ཀྱི་བཀའ་དྲིན་ནི་དུས་ནམ་ཡང་རྡོ་བརྐོས་རི་མོ་བཞིན་སེམས་དབུས་ནས་ཡལ་བར་དཀའ།
འཇིག་རྟེན་འདི་ན་གནས་པའི་སེམས་ཅན་ལ་ཕན་པ་ཆེ་ཤོས་གནང་མཁན་ནི་ཉི་མའི་འོད་ཟེར་མ་ཡིན་ནམ། འོད་ཟེར་སྟོང་ལྡན་གྱི་ཉི་མའི་འོད་ཟེར་མེད་ན་སྨག་རུམ་གྱི་མུན་པ་གང་གིས་སེལ། རུས་པར་ཟུག་འདྲའི་གྲང་ངར་གང་གིས་འཇོམས། བདེ་བ་ཡི་ལམ་སྟོན་སུ་ཡིས་བྱེད། སྐྱེ་དངོས་ཀྱི་སྐྱེ་འཕེལ་གང་ལ་བརྟེན། དེར་བརྟེན་ཉི་མ་ནི་ང་ཚོའི་ཚེ་སྲོག་གི་འབྱུང་རྩ་ཡིན་པས་དེ་ལ་བསྔགས་བརྗོད་ཀྱི་མེ་ཏོག་མི་སྟོར་མཁན་སུ་ཞིག་ཡོད། དེ་བས་ཉི་མ་དང་འདྲ་བའི་བྱེད་པོ་ཞིག་ཡོད་པ་ནི་མིའི་རིགས་ཀྱི་རྨོངས་པའི་མིག་ཟུང་ཕྱེ་མཁན་གྱི་དགེ་བའི་བཤེས་གཉེན་ཁོང་ཡིན་ནོ། །
འབྲི་རུ་རྫོང་སློབ་འབྲིང་དང་པོ།
ཟུར་ཁྲིད་དགེ་རྒན། དགའ་བཟང་།
