ནང་དོན་གནད་བསྡུས། ལུས་རྩལ་སློབ་ཚན་ནི་གཟུགས་པོའི་བྱེད་སྒོའི་སློབ་ཚན་སྟབས་བདེ་ཞིག་མིན་པར་སློབ་འབྲིང་སློབ་མ་ཁྱོན་ཡོངས་ནས་འཕེལ་རྒྱས་འགྲོ་རྒྱུར་འབྲེལ་བ་ཆེན་པོ་ཡོད་པའི་འགག་རྩའི་ལྷུ་ཚིགས་ཤིག་རེད། དེས་སློབ་མའི་ལུས་རྩལ་གྱི་རྩལ་ནུས་གསོ་སྦྱོང་དང་གཤིས་རྒྱུད་བཟང་པོ་གཏོད་ལ། སློབ་སྦྱོང་གི་གནོན་ཤུགས་ཆུང་དུ་གཏོང་བ་བཅས་ཕྱོགས་ཡོངས་ནས་འཕེལ་རྒྱས་དང་འཚར་ལོངས་འགྲོ་རྒྱུར་ཁང་ཆེན་གྱི་རྨང་རྡོ་ལྟ་བུའི་འདེགས་སྐྱོར་གྱི་ནུས་པ་ཞིག་ཐོན།
གླེང་གཞི།
སློབ་འབྲིང་དུས་རིམ་ནི་སློབ་མའི་ལུས་སེམས་འཕེལ་རྒྱས་ཀྱི་གནད་འགག་ཆེ་བའི་དུས་སྐབས་ཡིན་ལ། ལུས་རྩལ་སློབ་ཚན་ནི་སློབ་གྲྭའི་སློབ་གསོའི་གྲུབ་ཆ་གལ་ཆེན་ཞིག་ཡིན་པས་སློབ་མ་འཚར་ལོངས་ཡོང་བར་དོན་སྙིང་གལ་ཆེན་ལྡན། ཡིན་ནའང་དོན་དངོས་ཀྱི་འཚོ་བའི་ཁྲོད་དུ་སློབ་འབྲིང་གི་ལུས་རྩལ་སློབ་ཁྲིད་ལ་དེ་ཙམ་གྱི་སྣང་ཆེན་མི་བྱ་བའི་གནས་ཚུལ་ཐོན་མུས་ཡིན།
གཅིག གཟུགས་པོ་བདེ་ཐང་གི་ཕྱོགས་ནས་བལྟས་ན། སློབ་འབྲིང་སློབ་མ་ནི་འཚར་ལོངས་ཀྱི་འགག་རྩའི་དུས་སྐབས་སུ་གནས་ཡོད་པས་ལུས་རྩལ་སློབ་ཚན་གྱིས་ཁོང་ཚོར་འཚར་ལོངས་ཀྱི་གོ་སྐབས་འདང་ངེས་མཁོ་འདོན་བྱས་ཡོད་པས་སློབ་མ་ཚོའི་ལུས་པོའི་མ་ལག་བདེ་ཐང་ངང་འཚར་ལོངས་ཡོང་བ་དང་ཤ་གནད་ནུས་ལྡན་ངང་འཚར་ལོངས་ཡོང་བ། དེ་བཞིན་སྙིང་དང་གློ་བའི་ནུས་པ་རིམ་བཞིན་ཆེ་རུ་འགྲོ་བ་བཅས་ལ་ཕན་ཐོགས་ཡོད། རྒྱུན་གཏན་ནས་ལུས་རྩལ་རྣམ་གྲངས་སྣ་ཚོགས་སྦྱོང་བརྡར་བྱས་པ་བརྒྱུད་སློབ་མ་ཚོའི་གཟུགས་གཞི་ཐང་དུ་འགྲོ་བ་དང་ནད་འགོག་ནུས་པ་ཆེ་རུ་འགྲོ་བ། ནད་ཡམས་ཀྱི་གནོད་འཚེ་ཉུང་དུ་འགྲོ་བ་བཅས་ལ་ཕན་པ་ཆེར་བྱུང་ནས་སླད་ཕྱིན་གྱི་སློབ་སྦྱོང་དང་འཚོ་བར་སྲ་ཞིང་བརྟན་པའི་གཟུགས་གཞིའི་རྨང་གཞི་འདིང་བར་དགེ་མཚན་དམིགས་བསལ་དུ་ཐོན་ཐུབ།
གཉིས། ལུས་རྩལ་སློབ་ཚན་གྱིས་སློབ་འབྲིང་སློབ་མའི་སེམས་ཁམས་བདེ་ཐང་ལ་དགེ་མཚན་ལྡན་པའི་ཤུགས་རྐྱེན་ཐེབས་ཀྱི་ཡོད། སློབ་སྦྱོང་གི་གནོན་ཤུགས་ཉིན་བཞིན་ལྕི་རུ་འགྲོ་བའི་སྐབས་ལུས་རྩལ་སློབ་ཚན་དེ་སློབ་མ་ཚོའི་གནོན་ཤུགས་ཆུང་དུ་གཏོང་བ་དང་སྤྲོ་སྣང་འཕེལ་བ་བྱེད་པའི་ཐབས་ལམ་གལ་ཆེན་ཞིག་ཏུ་གྱུར་ཡོད། འགུལ་སྐྱོད་ཀྱི་ཁྲོད་དུ་ཁོ་ཚོས་སུན་སྣང་བརྗེད་དེ་ལུས་སེམས་ལྷོད་ལ་བབས་པར་ལོངས་སྤྱོད་བྱས་ནས་སེམས་འཚབ་མེད་པར་གཏོང་ཐུབ་ལ། ཧུར་བརྩོན་ཡར་སྐྱེད་ཀྱི་སེམས་ཁམས་དང་བློ་བརྟན་འགྱུར་མེད་ཀྱི་འདུ་ཤེས་ཀྱི་གཤིས་རྒྱུད་གསོ་སྐྱོང་བྱེད་ཐུབ།
གསུམ། ལུས་རྩལ་སློབ་ཚན་གྱིས་སློབ་འབྲིང་སློབ་མའི་ཚོགས་པའི་མཉམ་ལས་ཀྱི་སྙིང་སྟོབས་དང་འགྲན་རྩོད་ཀྱི་འདུ་ཤེས་གསོ་སྐྱོང་བྱ་རྒྱུར་ཕན་ཐོགས་ཡོད། ལག་རྩེད་སྤོ་ལོ་དང་རྐང་རྩེད་སྤོ་ལོ་སོགས་མཉམ་ལས་རང་བཞིན་གྱི་ལུས་རྩལ་རྣམ་གྲངས་ནང་སློབ་མ་ཚོས་ཕན་ཚུན་གཞོགས་འདེགས་དམ་ཟབ་བྱ་བའི་རྨང་གཞིའི་ཐོག་གཞི་ནས་གྲུབ་འབྲས་བཟང་པོ་ཐོབ་ཐུབ། ཚོགས་པ་འདིའི་རིགས་ཀྱི་མཉམ་ལས་ཀྱི་ཉམས་མྱོང་གིས་ཁོ་ཚོའི་རྗེས་ཕྱོགས་ཀྱི་སྤྱི་ཚོགས་འཚོ་བའི་ཁྲོད་དུ་སྔར་ལས་ལྷག་པའི་སྒོ་ནས་མི་དང་འབྲེལ་འདྲིས་དང་མཉམ་ལས་བྱེད་པར་ཕན་པ་ཡོད། དེ་དང་ཆབས་ཅིག་ལུས་རྩལ་འགྲན་བསྡུར་ཁྲོད་ཀྱི་འགྲན་རྩོད་ཀྱིས་སློབ་མ་ཚོའི་ངར་ཤུགས་འཕེལ་ཐུབ་པ་མ་ཟད། ཁོང་ཚོས་འགྲན་རྩོད་ཁྲོད་རྒྱུན་ཆད་མེད་པར་རང་ཉིད་བརྒལ་ཐུབ་པ་དང་ཕུལ་བྱུང་བརྩོན་ལེན་བྱེད་བྱ་བའི་འདུ་ཤེས་བཟང་པོ་སྐྱོང་ཐུབ།
བཞི། ལུས་རྩལ་སློབ་ཁྲིད་ཀྱིས་ད་དུང་སློབ་འབྲིང་སློབ་མའི་རང་གཤིས་འཕེལ་རྒྱས་ལ་སྐུལ་འདེད་གཏོང་ཐུབ། སློབ་མ་མི་རེ་ངོ་རེས་ལུས་རྩལ་བྱ་འགུལ་ཁྲོད་ནས་རང་ཉིད་ཀྱི་ཁྱད་ཆོས་དང་དགའ་ཕྱོགས་རྙེད་ཐུབ་ལ། རྒྱུག་ཤར་གློད་པ་དང་། རྒྱང་མཆོང་བྱེད་པ། ཡང་ན་སྤོ་ལོའི་རིགས་ཀྱི་ལུས་རྩལ་ལ་དགའ་བ་སོགས་གང་ཡིན་རུང་ཚང་མས་ལུས་རྩལ་སློབ་ཚན་ཁྲོད་ནས་རང་ཉིད་ངོམ་པའི་གར་སྟེགས་ཤིག་རྙེད་ཐུབ་པས་རང་གིས་རང་ལ་ཡིད་ཆེས་པའི་བསམ་པ་ཆེ་རུ་སྐྱེད་ཐུབ་ལ། དམིགས་བསལ་ཅན་གྱི་ཁྱད་ཆོས་གསོ་སྐྱོང་བྱེད་ཐུབ།
མདོར་ན།
སློབ་འབྲིང་སློབ་མའི་ལུས་རྩལ་སློབ་ཚན་ནི་གལ་འགངས་ཆེ་བའི་རིག་ཚན་ཞིག་ཡིན་པ་ནི་སྨོས་མི་དགོས་པ་ཞིག་རེད། དེ་ནི་སློབ་མའི་གཟུགས་པོ་བདེ་ཐང་དང་སེམས་ཁམས་བདེ་ཐང་ལ་འབྲེལ་བ་ཡོད་པ་མ་ཟད། ད་དུང་ཚོགས་པའི་མཉམ་ལས་ནུས་པ་དང་འགྲན་རྩོད་འདུ་ཤེས། རང་གཤིས་འཕེལ་རྒྱས་བཅས་ལ་ཤུགས་རྐྱེན་ཟབ་མོ་ཐེབས་ཀྱི་ཡོད། ང་ཚོས་ངེས་པར་དུ་སློབ་འབྲིང་སློབ་མའི་ལུས་རྩལ་སློབ་ཚན་ལ་ཚད་མཐོའི་མཐོང་ཆེན་བྱས་ཏེ་ཁོང་ཚོར་དེ་བས་སྤུས་ལེགས་ཀྱི་ལུས་རྩལ་སློབ་གསོའི་ཁོར་ཡུག་གཏོད་ནས་སློབ་འབྲིང་སློབ་མ་ཚང་མ་ལུས་རྩལ་སློབ་ཚན་ཁྲོད་བདེ་ཐང་ངང་འཚར་ལོངས་ཡོང་ཐུབ་པ་བྱས་ཏེ་འབྱུང་འགྱུར་གྱི་འགྲན་སློང་བསུ་ཐུབ་པ་བྱེད་དགོས། །
ལྷོ་ཁ་གྲོང་ཁྱེར་ཤར་འོད་སློབ་འབྲིང་།
