ཉེ་ཆར། རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་བོད་རང་སྐྱོང་ལྗོངས་ཀྱི་དབང་པོ་སྐྱོན་ཅན་གྱི་བྱ་གཞག་གོང་འཕེལ་གྱི་གྲུབ་འབྲས་གསར་འགྱུར་ཡོངས་བསྒྲགས་ཚོགས་འདུ་སྐོང་ཚོགས་བྱས་ཤིང་། རང་སྐྱོང་ལྗོངས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ཏང་ཙུའུ་ཁོངས་མི་ལས་འཛིན་གཞོན་པ་སྒྲོལ་མ་ཚེ་རིང་གིས་ངོ་སྤྲོད་བྱས་པར། ལྗོངས་ཡོངས་སུ་ལག་ཁྱེར་ཡོད་པའི་དབང་པོ་སྐྱོན་ཅན་ཁྲི་11.5ཙམ་ཡོད་པ་དང་རིམ་ཁག་དབང་པོ་སྐྱོན་ཅན་མཉམ་འབྲེལ་ལྷན་ཚོགས་རྩ་འཛུགས་ཀྱི་འཐུས་མི་དང་། ཞབས་ཞུ། དོ་དམ་བཅས་འགན་ནུས་ཧུར་ཐག་བསྒྲུབས་པས་ཏང་དང་སྲིད་གཞུང་གིས་དབང་པོ་སྐྱོན་ཅན་དང་འབྲེལ་བ་བྱེད་པའི་ཟམ་པ་དང་སྒྲོག་ཐག་ལྟ་བུར་གྱུར་ཡོད་ཅེས་བཤད་པ་རེད། 2024ལོའི་ཟླ་4པ་བར་རིམ་རྩིས་བྱས་ན་དབང་པོ་སྐྱོན་ཅན་གྱི“ཁ་གསབ་ཁག་གཉིས”ཀྱི་མ་དངུལ་སྒོར་དུང་ཕྱུར་15.5སྤྲད་པར་དབང་པོ་སྐྱོན་ཅན་ཁྲི་12ཙམ་ལ་ཕན་པ་ཐོབ་པ་དང་། འདི་ལོའི་ཟླ་1ཚེས་1ཉིན་ནས་བཟུང་ཁ་གསབ་ཀྱི་ཚད་གཞི་སླར་ཡང་20%མཐོ་རུ་བཏང་ནས་དབུས་ནུབ་རྒྱུད་ཀྱི་ཞིང་ཆེན་གྱི་མདུན་གྲལ་དུ་སླེབས་ཡོད་པ་རེད། མ་མཐའི་འཚོ་བའི་འགན་ལེན་གྱི་རོགས་སྐྱོབ་སྲིད་ཇུས་དོན་འཁྱོལ་བྱས་ཏེ་རིག་སྟོབས་དང་། སེམས་ཁམས་དབང་སྐྱོན་ཅན། དེ་བཞིན་རིམ་པ་དང་པོ་དང་གཉིས་པའི་དབང་པོ་སྐྱོན་ཅན་བཅས་མི་རྐྱང་གི་དུད་ཚང་ལྟར་མ་མཐའི་འཚོ་བའི་འགན་ལེན་གྱི་ཁྱབ་ཁོངས་ནང་བཅུག་པ་དང་། ཁྱིམ་ཚང་ཁྲི་1.6ལྷག་ཙམ་གྱི་ཡོང་འབབ་མ་མཐའི་འཚོ་བའི་འགན་ལེན་གྱི་ཚད་གཞིར་མ་སླེབས་པའི་དབང་པོ་སྐྱོན་ཅན་ཚང་མ་མ་མཐའི་འཚོ་བའི་འགན་ལེན་བྱེད་པའི་ནང་བཅུག་ཡོད།
ཤེས་རྟོགས་བྱུང་བར་གཞིགས་ན། ན་སོ་དར་ལ་མ་བབས་པའི་དབང་པོ་སྐྱོན་ཅན་གྱི་མིར་གཅེས་སྐྱོང་དང་ཞབས་འདེགས་ཞུ་བའི་ཐད། རང་སྐྱོང་ལྗོངས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས《བོད་རང་སྐྱོང་ལྗོངས་ཀྱི་དབང་པོ་སྐྱོན་ཅན་བྱིས་པའི་བདེ་ཐང་སླར་གསོའི་རོགས་སྐྱོབ་ཀྱི་ལག་བསྟར་ཞིབ་སྲོལ》བཟོས་ནས། “དབང་པོ་སྐྱོན་ཅན་གྱི་བྱིས་པའི་རུས་ནད་ལ་རོགས་སྐྱོབ”དང“དབང་པོ་སྐྱོན་ཅན་གྱི་བྱིས་པར་མི་ཐབས་ཀྱིས་ཉན་རོགས་ཡོ་བྱད་འཇུག་པ”སོགས་ཀྱི་ཆེད་དམིགས་རོགས་སྐྱོབ་རྣམ་གྲངས་ལག་ལེན་བསྟར་བས་དབང་པོ་སྐྱོན་ཅན་གྱི་བྱིས་པ་3327ལ་ཕན་པ་ཐོབ་ཡོད། ན་སོ་དར་ལ་མ་བབས་པའི་དབང་པོ་སྐྱོན་ཅན་ཁྱོན་ཡོངས་ནས་འཕེལ་རྒྱས་དང་སྤྱི་ཚོགས་ནང་ཞུགས་རྒྱུར་སྐུལ་འདེད་བཏང་སྟེ་དབང་པོ་སྐྱོན་ཅན་གྱི་སློབ་གསོའི་བྱ་གཞག་ཡག་པོ་སྒྲུབ་ཆེད། མིག་སྔའི་བར་ལྗོངས་ཡོངས་སུ་དམིགས་བསལ་སློབ་གསོའི་སློབ་གྲྭ་7བསྐྲུན་ཟིན་པ་དང་སློབ་གྲྭར་འགྲོ་མུས་ཀྱི་སློབ་མ་978ཡོད་ལ། འོས་འགན་སློབ་གསོའི་དུས་མཚམས་ཀྱི་དབང་པོ་སྐྱོན་ཅན་སློབ་མ་སློབ་གྲྭར་ཞུགས་ཚད་97%ཡན་ཟིན་ཡོད་པ་རེད། དབང་པོ་སྐྱོན་ཅན་སློབ་མ་ཚོར་ཁྱབ་པའི་སློབ་གསོའི་འགན་ལེན་གསུམ་གྱི་སྲིད་ཇུས་དང་། རོགས་དངུལ་སྲིད་ཇུས། སློབ་སྐྱོར་རོགས་དངུལ་སོགས་ཀྱི་ལམ་ལུགས་དོན་འཁྱོལ་བྱས་ནས་མཐོ་རིམ་སློབ་གསོ་དང་ལེན་བྱེད་མཁན་གྱི་དབང་པོ་སྐྱོན་ཅན་སློབ་མར“བྱ་དགའ་དང་། དངུལ་བུན། ལས་ཞུགས། རོགས་རམ། ཁ་གསབ། རྩ་ཆག”བཅས་གཙོ་བོར་བྱས་པའི་རོགས་དངུལ་སྲིད་ཇུས་སྣ་ཚོགས་ཁྱོན་ཡོངས་ནས་ལོངས་སུ་སྤྱོད་ཆོག་གི་ཡོད་པ་རེད། དམིགས་བསལ་སློབ་གསོ་མཐོར་གཏོང་བྱ་སྤྱོད་ལག་ལེན་བསྟར་བ་དང་སློབ་གྲྭ་དཀྱུས་མའི་འཛིན་གྲྭ་གཞན་དང་མཉམ་དུ་སློབ་སྦྱོང་བྱེད་པ་དང་སྒོ་རྩར་སློབ་ཁྲིད་བྱེད་པའི་ལས་ཀའི་ལམ་སྲོལ་འཐུས་ཚང་དུ་བཏང་ནས། ལྗོངས་ཡོངས་ཀྱི་དབང་པོ་སྐྱོན་ཅན་བྱིས་པ་3646འཛིན་གྲྭ་གཞན་དང་མཉམ་དུ་སློབ་སྦྱོང་ཐུབ་པ་དང་སྒོ་རྩར་སློབ་ཁྲིད་བྱེད་པར་སྐྱོད་མཁན་2597ཟིན་ནས་དབང་པོ་སྐྱོན་ཅན་གྱི་སློབ་གསོ་དང་ལེན་བྱེད་པའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་ཡོད་པ་རེད།
སྒྲོལ་མ་ཚེ་རིང་གིས་གོམ་སྟབས་རྗེས་མར་རང་ལྗོངས་ཀྱི་དབང་པོ་སྐྱོན་ཅན་གྱི་བྱ་གཞག་དེ་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་ལྟར་ལག་བསྟར་གཏིང་ཟབ་བྱས་ཏེ། ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུ་བའི་ཐོག་སེམས་མཐུན་སྟོབས་སྒྲིལ་དང་ཞུམ་མེད་མདུན་སྐྱོད་ཀྱིས་དུས་རབས་གསར་པའི་རྒྱང་སྐྱོད་ལམ་བུ་གསར་པའི་ཐོག་དབང་པོ་སྐྱོན་ཅན་གྱི་བྱ་གཞག་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་རྒྱུ་ཡིན་ཞེས་བཤད་པ་རེད།
བསོད་བསྟན་གྱིས་བསྒྱུར།
