ཉེ་ཆར། 2024ལོའི་རྒྱལ་ཡོངས་ཀྱི་ཕུལ་བྱུང་དགེ་རྒན་གྱི་མིང་ཐོ་ཁྱབ་བསྒྲགས་བྱས་ཤིང་། བོད་ལྗོངས་སློབ་ཆེན་མར་ཁེ་སི་རིང་ལུགས་སློབ་གླིང་གི་འབུམ་རམས་པའི་སློབ་དཔོན་དང་དགེ་རྒན་ཆེ་མོ་བ་བཀྲ་ཤིས་མིང་ཐོའི་ནང་ཚུད་ཡོད།
བཀྲ་ཤིས་འདི་ལོ་ལོ་59ལ་སླེབས་ཤིང་། སློབ་ཁྲིད་ཀྱི་ལས་ལ་གཞོལ་ནས་ལོ་36སོང་བའི་ཁོང་གིས་སློབ་གསོའི་བྱ་གཞག་ལ་བཅངས་པའི་ལྷག་བསམ་དང་དགའ་ཞེན་ཆེན་པོ་མཚོན་པར་བྱས་ཡོད། བཀྲ་ཤིས་ཀྱིས་སྔར་ནས་བཟུང“ཀུན་སྤྱོད་མི་སྐྱོང་བྱ་རྒྱུ”དེ་སློབ་གསོའི་ལས་དོན་གྱི་ལས་འགན་ཨང་དང་པོར་བརྩིས་ནས་སློབ་ཁྲིད་བྱེད་སྟངས་རྒྱུན་ཆད་མེད་པར་འཚོལ་ཞིབ་དང་གསར་གཏོད་བྱས་ཏེ་ཡང་དག་པའི་བསམ་བློ་དང་། དད་སེམས་བརྟན་པོ། ཀུན་སྤྱོད་བཟང་པོ་བཅས་ལྡན་པའི་དུས་རབས་གསར་པའི་གཞོན་ནུ་གསོ་སྐྱོང་བྱེད་པར་གཞོལ་བཞིན་ཡོད།
“སློབ་མ་ཚོར་ཤེས་བྱ་བརྒྱུད་སྤྲོད་བྱེད་པར་ངེས་པར་དུ་དགེ་རྒན་གྱིས་ཤེས་བྱ་རྒྱུན་ཆད་མེད་པར་ཕུན་སུམ་ཚོགས་སུ་གཏོང་དགོས”བསམ་བློ་ཆབ་སྲིད་སློབ་ཚན་གྱི་དགེ་རྒན་ཞིག་ཡིན་པའི་ངོས་ནས་ངེས་པར་དུ་དུས་རབས་ཀྱི་གོམ་སྟབས་ཀྱི་རྗེས་སུ་བསྙེགས་ནས་རིགས་པའི་གཞུང་ལུགས་གསར་པ་དང་ཤེས་བྱ་གསར་པ་རྒྱུན་ཆད་མེད་པར་སློབ་སྦྱོང་བྱས་ཚེ། གཞི་ནས་སློབ་ཁྲིད་ཀྱི་ནང་དོན་གསར་ཤོས་དང་གོ་ཆོད་རང་བཞིན་འགན་ལེན་བྱེད་ཐུབ་པ་བཀྲ་ཤིས་ཀྱིས་གསལ་པོར་ཤེས་ཀྱི་ཡོད། དེར་བརྟེན་ཁོང་གིས་དུས་དང་རྣམ་པ་ཀུན་ཏུ་འཛམ་གླིང་གི་གནས་ཚུལ་དང་། རྒྱལ་བབ། ལྗོངས་བབ་བཅས་ལ་དོ་ཁུར་བྱས་ནས་རིགས་པའི་གཞུང་ལུགས་ཀྱི་གྲུབ་འབྲས་གསར་ཤོས་དང་ལག་ལེན་གྱི་ཉམས་མྱོང་སློབ་ཚན་ནང་མཉམ་འདྲེས་བྱས་ཏེ་བསམ་བློ་ཆབ་སྲིད་སློབ་ཚན་ལ་རིགས་པའི་གཞུང་ལུགས་ནང་དོན་གཏིང་ཟབ་ལྡན་པ་དང་སློབ་མའི་དོན་དངོས་དང་ཡང་ཉེ་བཅར་ཐུབ་པར་བྱས་པས་སློབ་ཚན་གྱི་ཡིད་དབང་འཕྲོག་ཤུགས་དང་གོ་བསྐོན་བློ་འགུག་གི་ནུས་པ་ཆེ་རུ་ཕྱིན་ཡོད།
སློབ་ཁྲིད་བྱེད་རིང་། བཀྲ་ཤིས་ཀྱིས་སྔོན་ཐོན་གྱི་སློབ་ཁྲིད་འདུ་ཤེས་དང་བྱ་ཐབས་སྤྱོད་རྒྱུ་མཐའ་འཁྱོངས་ཀྱིས་སློབ་མའི་གནས་ཚུལ་ལ་ཕྱོགས་ཡོངས་ནས་དོ་ཁུར་བྱེད་པ་དང་སློབ་ཁྲིད་གྲ་སྒྲིག་ནན་ལ་ཞིབ་ཚགས་པོ་བྱས་ཏེ་སློབ་ཚན་ཚང་མར་ཕན་འབྲས་དེ་བས་ལེགས་པ་ཐོན་པའི་བརྩོན་ལེན་བྱེད་ཀྱི་ཡོད། ཁོང་གིས་ལོ་ལྟར་རང་འགུལ་ངང་ཞིབ་འཇུག་སློབ་མ་དང་དངོས་གཞིའི་ཚན་ཁག་གི་སློབ་མའི་བསམ་བློ་ཆབ་སྲིད་ཀྱི་སྤྱི་པའི་སློབ་ཚན་དང་ཆེད་ལས་སློབ་ཚན་སློབ་ཁྲིད་ཀྱི་འགན་འཁུར་གྱི་ཡོད། ལོ་ལྟར་གྱི་ཕྱོགས་བསྡུས་སློབ་གསོའི་དཔྱད་བསྡུར་ནང་ཕུལ་བྱུང་ལ་ཐེངས་མང་བདམས་ཡོད།
སློབ་མ་ཚོས“གདེང་ཚོད་བཞི”བརྟན་དུ་གཏོང་བ་དང“མོས་སེམས་ལྔ”ཐུབ་པར་ཁྲིད་སྟོན་བྱ་ཆེད། བཀྲ་ཤིས་ཀྱིས་བོད་ཀྱི་ས་གནས་ཁག་ཏུ་བརྟག་ཞིབ་དང་རྟོག་ཞིབ་ཐེངས་མང་བྱས་ཏེ《མར་ཁེ་སི་རིང་ལུགས་ཀྱི་མེས་རྒྱལ་གྱི་ལྟ་བ་དང་། མི་རིགས་ཀྱི་ལྟ་བ། རིག་གནས་ཀྱི་ལྟ་བ། ཆོས་ལུགས་ཀྱི་ལྟ་བ་བཅས་ཀྱི་སློབ་གསོའི་རྣམ་བཤད》དང་།《བོད་ཀྱི་སྤྱི་ཚོགས་ལམ་ལུགས་གསར་རྙིང་བསྡུར་བའི་སློབ་གསོའི་རྣམ་བཤད》《མར་ཁེ་སི་རིང་ལུགས་ཀྱི“ལྟ་བ་ལྔའི”རིགས་པའི་གཞུང་ལུགས་འཕེལ་རྒྱས་དང་བོད་ཀྱི་ལག་ལེན》སོགས་སློབ་ཁྲིད་ཟུར་ཁྲིད་བསླབ་གཞི་མང་པོ་སྔ་རྗེས་སུ་རྩོམ་འབྲི་གཙོ་སྐྱོང་བྱས་ནས། མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་སོགས་ཀྱི་ནང་དོན་བསླབ་གཞི་དང་སློབ་ཚན་ནང་ཁྱབ་པར་བྱས་ཡོད།
ལོ་མང་རིང་། བཀྲ་ཤིས་ཀྱིས་གཞོན་ནུ་དགེ་རྒན་གསོ་སྐྱོང་བྱ་རྒྱུར་མཐོང་ཆེན་བྱས་ནས་གཞོན་ནུ་དགེ་རྒན་གྱི་སློབ་ཁྲིད་དང་སློབ་དཔྱོད་ལས་དོན་ལ་མཛུབ་ཁྲིད་བྱེད་ཀྱི་ཡོད། སྔ་རྗེས་སུ་ཚོགས་པའི་སྣེ་ཁྲིད་དེ་སློབ་གསོ་པུའི《མི་རིགས་ས་ཁུལ་གྱི་བསམ་བློ་ཆབ་སྲིད་ཀྱི་རིགས་པའི་གཞུང་ལུགས་སློབ་ཚན་གྱི་སློབ་ཁྲིད་དཔྱད་གཞིའི་དེབ་རྩོམ་སྒྲིག་ཞིབ་འཇུག》དང་། 《ཞིང་ཆེན་གཅིག་ལ་ཐབས་ཇུས་གཅིག་གི་མར་ཁེ་སི་རིང་ལུགས་ཀྱི“ལྟ་བ་ལྔའི”རིགས་པའི་གཞུང་ལུགས་ཀྱི“གསུམ་སྤེལ”གྱི་ཕུལ་བྱུང་གཏོད་པའི་བྱ་སྤྱོད》 《བོད་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་བསམ་བློ་ཆབ་སྲིད་སློབ་ཚན་གྱི་གཞི་གཅིག་ཅན་གྱི་གཅིག་མཐུན་ཚོགས་པ་འཛུགས་སྐྱོང་ཞིབ་འཇུག》བཅས་དང་དེ་བཞིན་རང་སྐྱོང་ལྗོངས་ཀྱི《མར་ཁེ་སི་རིང་ལུགས་ཀྱི“ལྟ་བ་ལྔའི”སློབ་གསོ་ཞིབ་འཇུག》སོགས་སློབ་ཁྲིད་ཞིབ་འཇུག་རྣམ་གྲངས་གལ་ཆེན་དང་བསམ་བློ་ཆབ་སྲིད་སློབ་ཚན་ཁྱབ་གདལ་རྣམ་གྲངས་མང་པོ་གཙོ་སྐྱོང་བྱས་ནས་ལེགས་སྒྲུབ་བྱས་ཡོད།“བོད་ཀྱི་མཐོ་སློབ་ཀྱི་བསམ་བློ་ཆབ་སྲིད་སློབ་ཚན་གྱི་སྤུས་ཚད་མཐོར་གཏོང་ཞིབ་འཇུག”དང“བོད་ཀྱི་གསར་བརྗེའི་རིག་གནས་ཐོན་ཁུངས་གསར་སྤེལ་དང་བསམ་བློ་ཆབ་སྲིད་སློབ་ཚན་མཉམ་འདྲེས་ཞིབ་འཇུག”སོགས་ཀྱི་སྙན་ཞུར་ཆོག་མཆན་ཐོབ་པ་དང་འབྲེལ་ལེགས་གྲུབ་བྱུང་ཡོད། སྔ་རྗེས་སུ“ལོ་རྒྱུས་དངོས་གཙོ་རིང་ལུགས་ཀྱི་སྤྱི་ཚོགས་ཀྱི་རྣམ་པར་ལྟ་བའི་ཁྱབ་ཁོངས་འོག་གི་བོད་ཀྱི་སྤྱི་ཚོགས་ཀྱི་རྣམ་པའི་འཕེལ་རྒྱས་ཞིབ་འཇུག”དང“བོད་ཀྱི་ལོ་ཆུང་བྱིས་པའི་ཀུན་སྤྱོད་འཚར་ལོངས་ཁྲོད་སྤྱི་ཚོགས་རིང་ལུགས་ལྟེ་བའི་རིན་ཐང་ལྟ་བའི་སློབ་གསོས་ཐོན་པའི་ཤུགས་རྐྱེན་དང་དེ་བཞིན་དེའི་ཐབས་ལམ་ཞིབ་འཇུག”སོགས་ཚན་ཞིབ་དཔྱད་གཞི་བཅུ་ལྷག་ཙམ་གཙོ་སྐྱོང་བྱས་ཡོད། སྔ་རྗེས་སུ་བོད་ལྗོངས་སློབ་ཆེན་གྱི་སློབ་གྲྭའི་ཚགས་པར་དང་དུས་དེབ་སོགས་ཀྱི་ཐོག་རིག་གཞུང་རྩོམ་ཡིག་བཅུ་གྲངས་བཀོད་ཡོད། ལོ་བཅུ་ཕྲག་ཁ་ཤས་རིང་དཀའ་སྤྱད་འབད་འཐབ་བྱས་པ་བརྒྱུད་བཀྲ་ཤིས་ལ་སྔ་རྗེས་སུ“རྒྱལ་ཁབ་ཀྱི་སློབ་ཁྲིད་དགེ་རྒན་གྲགས་ཅན”དང་། “གཅིག་རེ་ལྔའི་རིགས་པའི་གཞུང་ལུགས་ཀྱི་ཤེས་ལྡན་པ” རང་སྐྱོང་ལྗོངས་སྲིད་གཞུང་གི་དམིགས་བསལ་ཕོགས་སྣོན་ལོངས་སྤྱོད་བྱེད་མཁན། པའོ་ཀང་ལྕགས་དང་ངར་ལྕགས་ཀྱི་ཕུལ་བྱུང་དགེ་རྒན་གྱི་དམིགས་བསལ་བྱ་དགའ། རྒྱལ་ཡོངས་མཐོ་སློབ་ཀྱི་བསམ་བློ་ཆབ་སྲིད་རིགས་པའི་གཞུང་ལུགས་སློབ་ཚན་གྱི་ཤུགས་རྐྱེན་ལྡན་པའི་མི་སྣ་སོགས་ཀྱི་གཟི་བརྗིད་མཚན་སྙན་ཐོབ་ཡོད།
པ་སངས་སྒྲོན་ལགས་ཀྱིས་བསྒྱུར།
