༄༅། །ཆུ་ཐིགས་ཀྱི་རིན་ཐང་།

གོ་ལ་ཟླུམ་པོ་འདིའི་ཐོག་གནས་པའི་སྐྱེ་འགྲོ་སུ་ཞིག་ཡིན་རུང་། དེ་དག་འཚོ་གནས་བྱེད་པར་མེད་དུ་མི་རུང་བའི་མཐུན་རྐྱེན་ཞིག་ནི་འཚོ་བྱེད་ཆུ་ཡིན་པས། དེ་ནི་མིའི་རིགས་ཀྱི་ཚེ་སྲོག་གི་འབྱུང་རྩ་རེད་ཅེས་བརྗོད་ཆོག

གལ་ཏེ་ཆུ་མེད་ན་མིའི་རིགས་འཚོ་གནས་བྱེད་མི་ཐུབ་ལ། ས་གཞིའི་སྟེང་གི་སྐྱེ་དངོས་ཐམས་ཅད་ཀྱང་འཚར་སྐྱེས་བྱེད་ཐབས་བྲལ་བས། ད་ལྟའི་སའི་གོ་ལའི་མཛེས་སྡུག་གི་རྣམ་པ་དེ་འདྲ་གང་ནས་ཡོང་། ཆུ་མེད་ན་ས་གཞི་རིལ་མོའི་གསོན་ཤུགས་ཡོད་ཚད་རྫོགས་པས། ང་ཚོས་དུས་དང་རྣམ་པ་ཀུན་ཏུ་ཆུའི་ཐོན་ཁུངས་ལ་སྲུང་སྐྱོབ་བྱ་རྒྱུ་ནི་གཡོལ་ཐབས་མེད་པའི་འོས་འགན་གལ་ཆེན་ཞིག་ཏུ་བརྩི་དགོས།

ང་ཚོ་མིའི་རིགས་ཀྱི་འཚོ་བའི་གོམས་སྲོལ་གྱི་རིན་ཐང་ལྟ་བའི་ནང་། ཆུ་ནི་རིན་ཐང་ཆུང་ཞིང་། བེད་སྤྱོད་ག་ཚོད་བཏང་ཡང་རྫོགས་མེད་གཏན་གནས་ཞིག་ཡིན་པར་བརྩི་བཞིན་ཡོད། དུས་རྒྱུན་འཚོ་བའི་ཁྲོད་དཔེར་ན་སློབ་རྭའི་ནང་དུ་ཆུ་ཀ་ལ་བེད་སྤྱོད་བཏང་ཚར་རྗེས་དུས་ཐོག་ཏུ་ཁ་མ་བཀག་པར་གང་བྱུང་དུ་གློད་ནས་བཞག་པ་དང་། སློབ་རྭའི་སྔོ་ལྗང་རྩི་ཤིང་ལ་ཆུ་རྒྱག་སྐབས་ཉིན་མཚན་ལྟོས་མེད་འཕྲོ་བརླགས་ཚད་ལས་བརྒལ་བར་གཏོང་བ། སྔོ་ཚལ་དང་གཟུགས་པོ་སོགས་བཀྲུས་རྗེས་ཆུ་དུས་ཐོག་ཏུ་མི་བཀག་པས་ཆུ་འཕྲོ་བརླག་གཏོང་བའི་སྣང་ཚུལ་ཧ་ཅང་མང་པོ་ཐོན་བཞིན་ཡོད།

དེང་དུས་ཀྱི་རྒྱལ་ཁབ་མང་པོར་ཆུའི་ཐོན་ཁུངས་རྫོགས་ལ་ཉེ་བའི་སྣང་ཚུལ་གང་མང་ཐོན་བཞིན་ཡོད་ལ། ཐ་ན་རྒྱལ་ཁབ་འགའ་ཤས་ལ་ཆུ་དཀོན་པའི་རྐྱེན་གྱིས་ཧ་ལམ་ཉིན་རེར་སྐོམ་ཤིར་ཐེབས་ཚད་ཀྱི་མི་འབོར་ཡང་གང་མང་ཟིན་བཞིན་ཡོད། ཆུ་ཐིགས་གཅིག་ང་ཚོར་གལ་ཆེན་པོ་ལྟ་བུར་མི་སྣང་ཡང་། ཉིན་མ་རེ་རེར་ཆུ་ཐིགས་གཅིག་ཟགས་ནས་རྫོགས་པར་ཆ་བཞག་ན། ཉིན་གྲངས་སྟོང་ཕྲག་མང་པོའི་རྗེས་སུ་ཆུ་ཐིགས་ཀྱང་ཁྲི་འབུམ་མང་པོར་ཟད་དེ་ང་ཚོའི་འཚོ་སྡོད་ཀྱི་ཁོར་ཡུག་དེ་ཉིད་སྐམ་ས་ཆེན་མོ་ཞིག་ཏུ་འགྱུར་ངེས་ཡིན།

ཆུ་ཕྲན་གཅིག་གི་འབོར་ཚད་ཆུང་ཡང་། དེས་སེམས་ཅན་མང་པོའི་ཚེ་སྲོག་གི་རྒྱུན་སྐྱོང་བར་བྱེད། དེ་ནི་མཐོན་པོའི་བྲག་རི་དང་། དམའ་པོའི་ས་གཞི། ལ་ལུང་དུ་མ་བརྒལ་ནས་མུ་མཐའ་མེད་པའི་རྒྱ་མཚོ་ཆེན་པོར་འདྲེས་ཤིང་། ཡུལ་ལུང་གྲངས་མེད་བརྒྱུད་ནས་རང་བྱུང་ཁམས་ཀྱི་མཛེས་པའི་ཚེ་སྲོག་གི་དབུགས་རྒྱུན་མཐུད་པར་བྱེད། མ་གཞི་ཆུ་ཐིགས་ཆུང་ཆུང་ཞིག་གིས་ང་ཚོའི་མིག་ལམ་དུ་ཚོར་བ་ཆེན་པོར་སྦྱིན་མི་ཐུབ་ཀྱང་། ང་ཚོ་མི་རེ་རེས་ཆུ་ཐིགས་གཅིག་རེ་གྲོན་ཆུང་རེ་བྱས་ན། ཆུ་ཐིགས་དུང་ཕྱུར་ཁྲི་མ་འབུམ་གྲོན་ཆུང་ཐུབ་སྟེ་མཐའ་མ་ཆུ་རྫིང་དང་། རྒྱུགས་ཆུ། གཙང་པོ། མཐའ་ཡས་ཀྱི་ཆུ་གཏེར་ཆེན་པོར་འཕེལ་ཏེ་མིའི་རིགས་གཙོས་གོ་ལའི་སྲོག་ལྡན་ཡོངས་ལ་ཚེ་སྲོག་གི་ལེགས་སྐྱེས་ཆེན་པོ་འབུལ་བར་བྱེད།

མདོར་ན། ང་ཚོས་རང་གི་འཚོ་གནས་ཀྱི་གོ་ལ་འདིའི་ཆེད་དུ་རང་བྱུང་ཆུ་ལ་སྲུང་སྐྱོང་གང་ལེགས་བྱེད་དགོས་གལ་ཆེའོ། །

ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།

ཟུར་ཁྲིད་དགེ་རྒན། བོན་བསྟན་འཛིན།