༄༅། །བདེ་སྐྱིད་ཀྱི་འབྱུང་རྩ།

སྔར་བོད་ཀྱི་ཞིང་བྲན་མི་དམངས་ནི་སྡུག་བསྔལ་གྱི་རྒྱ་མཚོའི་ནང་མི་རབས་ནས་མི་རབས་བར་མངའ་བདག་ཆེན་པོ་གསུམ་གྱིས་གཉའ་གནོན་བཤུ་གཞོག་ཚད་མེད་མྱངས། འོན་ཀྱང་ད་ལྟའི་བོད་རིགས་མི་དམངས་རྣམས་ཏང་དང་རྒྱལ་ཁབ་ཀྱི་བླ་མེད་གཟིགས་སྐྱོང་འོག་གང་བཟའ་གང་འཐུང་། གང་དྲོ་གང་གྱོན། གང་དགའ་གང་སྐྱིད་ཀྱི་འཚོ་བར་རོལ་བཞིན་ཡོད། འོ་ན་བདེ་སྐྱིད་ཀྱི་འཚོ་བ་དེ་འདྲར་རོལ་ཐུབ་པའི་རྩ་བ་དེ་གང་ཡིན་ནམ་ཟེར་ན། དེ་ཡང་“བྱང་སྐར་སྤུན་བདུན་གྱི་ལམ་སྟོན་ཇི་བཞིན་བསྐྱོད་ན་ལམ་ནོར་ཐེབས་མི་སྲིད་པ་དང་། གུང་ཁྲན་ཏང་གི་རྗེས་སུ་འབྲངས་ན་བདེ་སྐྱིད་ཐོབ་ངེས་རེད་”ཅེས་པ་ལྟར་བོད་རིགས་མི་དམངས་ཀྱི་བདེ་སྐྱིད་ཀྱི་འབྱུང་རྩ་ནི་ཀྲུང་གོ་གུང་ཁྲན་ཏང་ཡིན།

ངན་ངོན་གྱི་ཟས་དང་། ཧྲལ་ཧྲུལ་གྱི་གྱོན་པ། དོག་ཅིང་དཀར་ཆ་མེད་ལ་ཆར་ལྷགས་གང་ཡང་འགོག་མི་ཐུབ་པའི་སྡོད་ཁང་ནི་སྔར་སོང་བོད་མི་རྣམས་ཀྱི་འཚོ་བའི་ཆ་རྐྱེན་རེད། གདུག་རྩུབ་དྲག་པོ་རྫོགས་རྒྱུ་མེད་པའི་ཁྲལ་དང་འུ་ལག་ནི་རྒྱ་ཆེའི་མང་ཚོགས་ཚོའི་ལུས་དང་གྲིབ་གཟུགས་ཇི་བཞིན་ཚེ་སྦྱར་ཡིན་པས། དངོས་གནས་ལས་ལ་བོང་བུའི་སྡུག་ལས། ལྟོ་ལ་ཁྱི་ཡི་ཁྱི་ལྟོ་ཟེར་བ་དེ་རང་ཡིན། སེམས་ནང་མུན་ནག་གདུག་རྩུབ་ཆེ་བའི་ཉམ་ཐག་གི་འཚོ་བར་འུ་ཐུག་ཐབས་ཟད་གནས་སུ་གྱར་ཡང་དེ་ལས་གྲོལ་ཐུབ་པའི་ཐབས་ཤེས་གང་ཡང་མེད། འོན་ཏེ་གུང་ཁྲན་ཏང་གིས་བོད་ལ་བཅིངས་འགྲོལ་བཏང་བ་ནས་བཟུང་བོད་ལ་གཞི་ནས་བདེ་སྐྱིད་ཀྱི་ཉི་མ་ཤར། གཞི་ནས་མུན་ནག་གི་འཇིག་རྟེན་ལས་ཐར་ཐུབ་པ་དང་བདེ་སྐྱིད་ཀྱི་འཚོ་བ་དུས་དེ་ནས་བཟུང་འགོ་ཚུགས། རས་གུར་ནས་ཐོན་ཏེ་ཨར་འདམ་གྱིས་བསྐྲུན་པའི་ཁང་གསར་ལ་འཛུལ། སྣུམ་སྒྲོན་བསད་དེ་དཀར་གསལ་གྱི་གློག་བཞུའི་འོག་ཚོན་ཁྲ་ཅན་གྱི་བརྙན་འཕྲིན་དང་ལག་ཐོགས་ཁ་པར་ལ་ལྟ་འགོ་ཚུགས། དེ་ཡང་ཆུ་བོ་ཡར་ཀླུང་གཙང་པོ་རིང་ཡང་ཆུ་འགོ་ཡོད། རི་བོ་ཧི་མ་ལ་ཡ་མཐོ་ཡང་རྩེ་མོ་ཡོད་ཟེར་བ་ལྟར་རླབས་ཆེ་ཞིང་གཟི་བརྗིད་ལྡན་པའི་ཀྲུང་གོ་གུང་ཁྲན་ཏང་གིས་བོད་ལ་ཞི་བས་བཅིངས་འགྲོལ་བཏང་བས། རྒྱ་ཆེའི་བོད་རིགས་མི་དམངས་རྣམས་གཞི་ནས་ཆེས་མུན་ནག་དང་ཆེས་གདུག་རྩུབ་ཆེ་བའི་དམྱལ་ཁམས་ལས་གྲོལ་ཏེ་བདེ་སྐྱིད་ཀྱི་འཚོ་བར་རོལ་ཐུབ་པ་བྱུང་།

སྔོ་ཞིང་དྭངས་པའི་ནམ་མཁའ། དྲོ་ཞིང་འཇམ་པའི་ཉི་འོད། ཡངས་ཤིང་ཆེ་བའི་ས་གཞི། མཐོ་ཞིང་བརྗིད་པའི་ལྷུན་པོ། མཛེས་ཤིང་སྡུག་པའི་མེ་ཏོག ཡིད་དུ་འོང་བའི་ས་ཆ་འདི་ནི་བོད་ལྗོངས་ཡིན། འདིར་འཚོ་སྡོད་བྱེད་པའི་རྒྱ་ཆེའི་བོད་རིགས་མི་དམངས་རྣམས་ཏང་གི་ཡང་དག་སྲིད་ཇུས་འོག་རང་སྟོབས་རང་སྤེལ་བྱས་ཏེ། བཟའ་བཏུང་ལ་ཆ་བཞག་ན་སྔོན་ཆད་ཀྱི་ཇ་རྐྱང་སྤགས་རྐྱང་ནས་རིམ་བཞིན་ཤ་རིགས་སྣ་ཚོགས། ཚལ་རིགས་དང་ཤིང་འབྲས་སྣ་ཚོགས་བཟའ་རྒྱུ་ཡོད་ལ། གྱོན་གོས་ལ་ཆ་བཞག་ན། ལོ་འཁོར་མོར་བོད་ལྭ་རྐྱང་པ་ནས་དབྱར་དགུན་སྟོན་དཔྱིད་དུས་བཞིའི་གྱོན་ཆས་སྣ་ཚོགས་པ་གྱོན་རྒྱུ་ཡོད། འགྲིམ་འགྲུལ་ཐད་སྔར་གྱི་རྐང་ཐང་དང་རྟ་བོང་ལས་ད་ཆ་གནམ་དུ་གནམ་གྲུ། ས་ལ་མེ་འཁོར། ཡངས་ཤིང་རྒྱ་ཆེ་བའི་སྣུམ་ནག་ལམ་ཆེན་ཐོག་འཁོར་རིགས་སྣ་ཚོགས་བསྡད་རྒྱུ་ཡོད། དེ་བཞིན་སྤྱི་ཚོགས་སྤྱི་པའི་སྒྲིག་བཀོད་ཐད་རྒན་འཁོགས་ལ་རྒན་གསོ་ཁང་སོགས་སྤྱི་པའི་ཞབས་ཞུ་མ་ལག་འཐུས་ཚང་དང་། ལུས་ལ་ན་ཚ་ཚ་བྱུང་ན་གང་སར་འཕྲོད་བསྟེན་འགན་བཅོལ་ཞབས་ཞུའི་ས་ཚིགས། བུ་ཕྲུག་སློབ་གྲྭར་བསྐྱོད་དགོས་ན། ན་ཚོད་ལ་དཔག་པའི་གང་ལ་གང་འཚམས་ཀྱི་སློབ་གྲྭ་ཆེ་འབྲིང་ཆུང་གསུམ་གང་སར་ཡོད་པ་སོགས་གང་ལྟར་བརྗོད་ཀྱིས་མི་ལངས་པའི་ལེགས་ཚོགས་འདི་དག་ཀུན་ནི་གུང་ཁྲན་ཏང་གི་བཀའ་དྲིན་ཉག་གཅིག་ཡིན། གུང་ཁྲན་ཏང་ནི་མུན་པའི་ཡོལ་བ་རློག་པའི་འཇིག་རྟེན་གྱི་སྒྲོན་མེ་ཞིག་ཡིན་པས། བོད་རིགས་མི་དམངས་ཀྱིས་བཀའ་དྲིན་ཚོར་ཤེས་ཐུབ་པ་བྱས་ནས། རྨོངས་དད་དང་ལེ་ལོ། རྙིང་ཞེན་དང་བག་འཁུམས་སོགས་རང་རྒྱུད་ནས་ཡེ་ནས་དོར་ཏེ། ཚན་རིག་ལག་རྩལ་དང་དཔལ་འབྱོར་འཕེལ་རྒྱས་ཀྱི་བྱ་གཞག་གསར་བཏོད་ལ་འབད་པ་ལྷུར་ལེན་བྱས་ནས། ད་ལྟའི་བདེ་སྐྱིད་ཀྱི་འཚོ་བར་གཅེས་འཛིན་ཐུབ་པ་བྱ་དགོས།

ང་ཚོས་ནམ་ཡང་ལོ་རྒྱུས་ལ་ངེས་ཤེས་བརྟན་པོས་རང་འཁྲིའི་ལས་འགན་ཀྲུང་གོ་གུང་ཁྲན་ཏང་ལ་དགའ་ཞེན་དང་མེས་རྒྱལ་ལ་དགའ་ཞེན། མི་དམངས་ལ་དགའ་ཞེན། སློབ་སྦྱོང་ལ་འབད་བརྩོན་བཅས་བྱས་ཏེ་བདེ་སྐྱིད་ཀྱི་འབྱུང་རྩ་མ་བརྗེད་པར་ཏང་གི་བཀའ་དྲིན་སེམས་ནང་རྡོ་བརྐོས་རི་མོ་བཞིན་བརྟན་པོར་ངེས་ཏེ། ནམ་ཡང་ཏང་དང་རྒྱལ་ཁབ་ཀྱི་ཁེ་ཕན་གོང་དུ་བཀུར་བ་དང་། ནམ་ཡང་མི་དམངས་ཀྱི་བདེ་སྐྱིད་རྩ་བར་འཛིན་ནས་སླད་རྒྱལ་ཁབ་ལ་མཁོ་བ་དང་མི་རིགས་ལ་ཕན་པ། ཕ་ཡུལ་འཛུགས་སྐྲུན་ལ་ཕན་ཐོགས་པའི་མི་ཞིག་བྱ་རྒྱུ་ནི་གལ་འགངས་ཤིན་ཏུ་ཆེ་བར་འདོད་དོ། །

ལྷ་ས་ཅང་སུའུ་ཚོད་ལྟའི་སློབ་འབྲིང་ལོ་རིམ༢（༡༡）

ཟུར་ཁྲིད་དགེ་རྒན། གཡང་སྐྱིད།