放大
缩小
默认ཆར་བཞུད་ཀྱི་སྨུག་རླངས་རི་མགུལ་ལ་ཡུགས་མཐུད་དུ་ཁེན་ཞིང་།
སྐྱ་རེངས་རྒྱས་པའི་རྟེན་འབྲེལ་གྱི་ཁ་གཡང་དང་ཆེས་ཉེ་བ་ནི།
འུར་རྡོའི་ཚག་སྐད་དང་བསྡོངས་པའི་ནོར་ནག་གི་ངུར་སྒྲ་རེད།
སྟོན་ཟླ།
འདི་ནི་སོ་ནམ་པའི་དུས་བཟང་ཡིན་ལ།
འདི་ནི་འབྲོག་སྡེའི་དཀར་བཅུད་ཀྱི་ལྷག་འཕྲོ་རུའང་བསྙད་ཆོག
ཡིན་ཏེ།
ས་མ་འབྲོག་གི་ང་ཚོར་མཚོན་ན།
སྟོན་ཟླ་ནི་འཆད་པར་དཀའ་བའི་ནམ་ཟླ་ཞིག་སྟེ།
ཨ་མས་རོང་འབྲོག་གི་ལམ་བུ་འཐག་བཞིན་འཐེན་ལ།
ཨ་ཕས་ཞིང་ས་དང་ཁང་ཁྱིམ་གྱི་ལོགས་སུ་འཇིག་རྟེན་འདིའི་ལམ་བུ་གསར་བ་ཞིག་བཏོད་ཀྱིན་བདོག
སྔར་ན།
ལགས་མ་ཆག་པའི་ང་རང་།
དྲན་པས་ཟིན་པའི་སྟོན་ཟླ་དེར།
ཞིང་ཐང་གི་ལོ་ཏོག་དག་སྒྲིབས་གོས་སུ་བྱས་ནས་ཨ་ཕར་བསྟན་བཤིག་བརྩེ་བ་དྲན་ལ།
ཨ་མའི་རྩིབ་ནས་ལྷེབ་གཅིག་ཏུ་འཁྲིགས་པའི་ཞོ་མངར་ལ་སྙིམ་པ་ཟེད་ནས་སྒུག་པའང་ལྷག་པར་དྲན།
དེ་དུས།
གཞུ་ལྟར་གུག་པའི་ཟོར་བ་དང་།
མདའ་ལྟར་འདྲོང་བའི་ཕ་མ་གཉིས་ཀྱིས།
སྤྱི་གཙུགས་ཀྱི་སྐྲ་ལོ་རླུང་གིས་བསླས་ཤིང་།
མཛེས་སྡུག་གི་ཞལ་རས་རྔུལ་ཆུས་འཁྲུ་བ་ཡིན་ཡང་།
བཀོར་རྡོ་དང་བཀོར་ཐག་འདྲ་བའི་སྣང་མེད་ཀྱི་བུ་ལོར།
ཅེས་ཀྱང་ཟོལ་དུ་མི་འགྲོ་བའི་མཚེམས་དཀར་གྱི་མཛེས་པ་དེ་ཡང་ཡང་ཕྱོགས་པར་བྱེད།
ད་སྐབས།
དཔྱད་གླེང་ལ་དགའ་བའི་ཕ་ཡུལ་ཞིག་ཡིད་ཀྱི་དྲན་པར་བཞུགས་ཀྱང་།
ལས་དབང་གི་བཀའ་བཙན་པའམ།
ལྟོ་རྒྱབས་གཉིས་དེ་འགངས་ཆེ་བས་སམ།
གང་ལྟར།
སྐྱེས་སའི་ཕ་ཡུལ་དང་གྱེས་ནས་མི་ཡུལ་གྱི་འཚོ་ཟས་འཚོལ་དུས།
ཕ་ཡུལ་ནི་ཁོ་བོས་ཀུན་ལ་ངོམས་ངོམས་བྱ་རྒྱུ་དེ་ཡིན་ཡང་།
འཚོ་བའི་སྒྲོགས་ཐག་གིས་བཅིངས་པའི་ང་རང་།
རང་དབང་གི་སྲབས་ཁ་ཤོར་ཟིན་པས།
འགྲུལ་བཞུད་སྣ་ཚོགས་ཀྱི་ཁྲོད་དུ།
སྐྱེ་བོ་དུ་མའི་ཕ་ཡུལ་ལ་ཐོན་པ་སྲིད་མོད།
ཡིན་ཡང་།
ལྟེ་ཁྲག་དྲོན་མོ་ས་ལ་འཐོར་ཅིང་།
དྲོད་འཇམ་མ་ནུ་ཁ་ལ་ལྡུག་པའི།
ངའི་མཛེས་སྡུག་གི་ཕ་ཡུལ་དེ།
མཚན་གུང་རྨི་ལམ་གྱི་འཁྲུལ་གཟུགས་སུ་བཞེངས་པ་ལས།
ནམ་ཐོན་འདི་ཐོན་གྱི་གདེང་ཞིག་ང་ལ་མེད་ཅིང་།
ད་སླེབས་ད་འདུག་ཟེར་བའི་དུས་ཤིག་ཀྱང་དཀའ་ཚད་དུ་སྣང་ཕྱིར།
གསེར་མདོག་གི་སྟོན་ཟླ་ཚེས་དུས།
ངས་ཕ་ཡུལ་གྱི་མཛེས་པ་རྣམས་ཡིད་ངོར་འཆར་ནུས་ལ།
དུས་ཀྱི་དེད་པའི་རི་མོའི་ངོས་སུ།
ཞིང་ནང་གི་ལོ་ཏོག་ཙམ་དུ་མ་ཟད།
ཡབ་ཡུམ་གཉིས་ཀྱང་སྙེ་རིས་དང་འདྲ་བའི་གཉེར་རིམ་སྟུག་ཅིང་།
ཟོར་བ་དང་འདྲ་བའི་གུག་ཆ་ཆགས་པའང་ཤེས་ཐུབ།
འོན་ཏེ།
དྲན་གདུང་གི་གསེར་སྐུད་ཕ་མར་མཐུད་ཀྱང་།
ང་རང་ད་དུང་རྒྱང་རིང་ལ་མཆིས་ན།
ཁྱེད་གཉིས།
ཁྱེད་གཉིས་ཀྱི་ངལ་ཡངས་ཐུབ་པའི་དུས་ཤིག་གང་ན་ཡོད།
འོ།
སྟེས་དབང་ནི་ཡ་མཚན་ཡོངས་ཀྱི་གྲོགས་བཟང་ལགས་པས།
ཁོ་བོའང་མྱུར་མོར་ཕ་ཡུལ་ལ་ཐོན་ཐུབ་པར་ཤོག
放大
缩小
默认
