ཉེ་ཆར་བོད་རང་སྐྱོང་ལྗོངས་ཀྱིས་“གཞོན་ནུས་རང་སྲུང་འགོག་སྲུང་གི་འཛིང་རགས་བསྐྲུན་ནས་གངས་ལྗོངས་སུ་ཉི་འོད་ལྡན་པའི་དགུན་གསེང་ལ་རོལ་བ།”ཞེས་པའི་གཞོན་ནུ་ལོ་ཆུང་གི་དགུན་གསེང་གི་རང་སྲུང་སློབ་གསོའི་འགོ་ཚུགས་བྱེད་སྒོ་ལྷོ་ཁ་གྲོང་ཁྱེར་སྣ་དཀར་རྩེ་རྫོང་སྟག་ལུང་གྲོང་རྡལ་གླིང་གཞི་སྡེ་ཁུལ་དུ་སྤེལ་བ་རེད། གུང་གཞོན་སྡེ་ཚོགས་བོད་ལྗོངས་ཨུ་ལྷན་གྱི་ཧྲུའུ་ཅི་གཞོན་པ་ཀྲའོ་ཡུན་འགོ་ཚུགས་མཛད་སྒོར་ཞུགས་པ་དང་། སྡེ་ཚོགས་ལྷོ་ཁ་གྲོང་ཨུད་ཀྱི་འབྲེལ་ཡོད་འགན་འཁུར་བློ་མཐུན་དང་། གཞོན་ནུ་དང་བླངས་པ། སློབ་མ། ཁྱིམ་བདག་འཐུས་མི་སོགས་མི་གྲངས་360ལྷག་ཙམ་བྱེད་སྒོར་ཞུགས་པ་རེད།
གཞོན་ནུ་ལོ་ཆུང་གིས་གསོན་ཤུགས་ལྡན་པའི་རིག་རྩལ་འཁྲབ་སྟོན་དང་ཆབས་ཅིག་འགོ་ཚུགས་མཛད་སྒོ་དངོས་སུ་འགོ་ཚུགས་པ་རེད། ལས་ཀའི་མི་སྣས་སྡེ་ཁུལ་དེའི་གཞོན་ནུ་ལོ་ཆུང་127ལ་རིག་ནུས་སྐད་ཡིག་སློབ་སྦྱོང་འཕྲུལ་ཆས་དང་ཡིག་ཆས་སོགས་འཚམས་འདྲིའི་དངོས་རྫས་སྤྲད་པ་དང་། ཆེད་ལས་ཀྱི་སེམས་ཁམས་འཆད་ཁྲིད་དགེ་རྒན་གདན་འདྲེན་ཞུས་ནས་དགུན་ཁའི་གུང་གསེང་ལ་སེམས་ཁམས་སྙོམ་སྒྲིག་དང་། སེམས་ཁམས་དོ་དམ་སོགས་བརྗོད་བྱ་གཙོ་བོར་ཆེད་དོན་ཟུར་ཁྲིད་བྱས་ནས་གཞོན་ནུ་ལོ་ཆུང་གི་འཚར་ལོངས་ཁྲོད་ཀྱི་སོམ་ཉི་སེལ་ཆེད་སྤྱི་བདེ་དང་། ཞིབ་དཔྱོད་ཁྲིམས་ཁང་སོགས་སྡེ་ཚན་གྱིས་ཆེད་མངགས་དྲིལ་བསྒྲགས་བྱེད་པའི་ས་གནས་བཙུགས་ནས། གོ་བདེ་བའི་སྐད་ཆ་སྤྱད་དེ་གཞོན་ནུ་ལོ་ཆུང་དང་དེ་བཞིན་ཁྱིམ་བདག་ལ་འགྲིམ་འགྲུལ་གྱི་བདེ་འཇགས་དང་། ཁ་བསླུས་སྔོན་འགོགདང་བརྙས་བཅོས་སྔོན་འགོག་སོགས་ཀྱི་ཤེས་བྱ་ཁྱབ་གདལ་བཏང་བ་དང་། ས་གནས་ས་ཐོག་ཏུ་དོགས་འདྲི་སེལ་བ་མ་ཟད་དྲིལ་བསྒྲགས་དཔྱད་གཞི་1000ལྷག་ཙམ་སྤྲད་པ་རེད།
བྱེད་སྒོ་སྤེལ་རིང་ཀྲའོ་ཡུན་གྱིས་གུང་གཞོན་སྡེ་ཚོགས་བོད་ལྗོངས་ཁུལ་ཨུ་ལྷན་གྱི་ཚབ་ཞུས་ནས་རྒྱ་ཆེའི་གཞོན་ནུ་ལོ་ཆུང་ལ་རེ་བ་བཞི་བཏོན་པ་སྟེ། གཅིག ཏང་དང་རྒྱལ་གཅེས་ལ་དགའ་བའི་སྲུང་སྐྱོང་མཁན་ཞིག་བྱེད་པ་དང་། སྤོ་བོ་ཞི་ཅིན་ཅིང་གི་མངགས་བཅོལ་བློ་ལ་བརྟན་པོར་བཞག་ནས་དུས་རབས་གསར་པའི་གཞོན་ནུ་བཟང་པོ་བརྩོན་ལེན་བྱེད་པ། གཉིས། རང་ཉིད་ཀྱི་བདེ་འཇགས་སྲུང་བའི་ལག་ལེན་མཁན་བྱས་ཏེ། བདེ་འཇགས་ཤེས་བྱར་སློབ་སྦྱོང་ནན་ཏན་བྱེད་པ་དང་། འགྲིམ་འགྲུལ་སྒྲིག་ལམ་དང་ཁྱིམ་གྱི་བདེ་འཇགས་སོགས་བླང་བྱ་བློ་ལ་བརྟན་པོར་ངེས་ཏེ། རང་འགུལ་ངང་ཉེན་ཁའི་ཁུལ་ལས་གཡོལ་ཏེ་རང་ངོས་ཀྱི་བདེ་འཇགས་སྲུང་སྐྱོང་ཏན་ཏིག་བྱ་དགོས། གསུམ། བྱང་ཚད་མཐོ་རུ་གཏོང་བའི་དོན་གཉེར་མཁན་བྱས་ཏེ། གྲངས་གཞིའི་བྱང་ཚད་དང་སེམས་ཁམས་བདེ་ཐང་སོགས་ཀྱི་སློབ་སྦྱོང་ནང་ཧུར་ཐག་ཞུགས་ནས་དཀའ་ངལ་འཕྲད་དུས་རང་འགུལ་ངང་ཞབས་ཞུའི་སྟེགས་བུའི་12355སོགས་ལ་བློ་འདྲི་བྱས་ཏེ། རྒྱུན་མཐུད་སློབ་སྦྱོང་ཁྲོད་འཚར་ལོངས་ཡོང་བ་དང་ལག་ལེན་སྦྱོང་བརྡར་ཁྲོད་ཡར་ཐོན་ཡོང་བ་བྱེད་པ། བཞི། བདེ་འཇགས་འདུ་ཤེས་ཀྱི་ལྟ་བ་ཁྱབ་སྤེལ་མཁན་བྱས་ཏེ། ཤེས་རྟོགས་བྱུང་བའི་བདེ་འཇགས་ཤེས་བྱ་ཁྱིམ་མི་དང་གྲོགས་པོར་མཉམ་སྤྱོད་བྱས་ནས་ཉེ་འགྲམ་གྱི་མི་རྣམས་ལ་སྐུལ་ཁྲིད་ཀྱིས་ཐུན་མོང་ཐོག་བདེ་འཇགས་འགོག་སྲུང་གི་འདུ་ཤེས་བརྟན་པོ་འཛུགས་དགོས།
ད་ཐེངས་ཀྱི་བྱེད་སྒོ་དེས་ལྗོངས་ཡོངས་སུ་“གཞོན་ནུས་རང་སྲུང་འགོག་སྲུང་གི་འཛིང་རགས་བསྐྲུན་ནས་གངས་ལྗོངས་སུ་ཉི་འོད་ལྡན་པའི་དགུན་གསེང་ལ་རོལ་བ།” ཅེས་པའི་གཞོན་ནུ་ལོ་ཆུང་གི་དགུན་ཁའི་གུང་གསེང་གི་སློབ་གསོ་མུ་འབྲེལ་རིགས་འབྲེལ་གྱི་རང་སྲུང་བྱེད་སྒོ་ཁྱོན་ཡོངས་ནས་སྤེལ་བ་རེད། བྱེད་སྒོ་དེའི་དམིགས་ཡུལ་ནི་མི་བཟང་གསོ་སྐྱོང་ཀྱི་རྩ་བའི་ལས་འགན་དོན་འཁྱོལ་གཏིང་ཟབ་བྱེད་པ་དང་། བོད་ཀྱི་གཞོན་ནུ་ལོ་ཆུང་འཚར་ལོངས་དང་ཤེས་ལྡན་མི་སྣར་འགྱུར་བའི་དགོས་མཁོར་དམིགས་ཏེ། རྣམ་པ་སྣ་ཚོགས་དང་ནང་དོན་ཕུན་སུམ་ཚོགས་པའི་སློབ་གསོ་དང་རང་སྲུང་བྱེད་སྒོ་སྤེལ་བ་བརྒྱུད་གཞོན་ནུ་ལོ་ཆུང་ལ་དགོས་ངེས་ཀྱི་བདེ་འཇགས་ཤེས་བྱ་དང་རང་སྲུང་རྩལ་ནུས་ཁོང་དུ་ཆུད་པར་རོགས་རམ་བྱས་ནས་འགོག་ཟོན་ཀྱི་འདུ་ཤེས་དང་འཕྲལ་སྡོམ་ཐག་གཅོད་ནུས་པ་ཆེ་རུ་བཏང་ཡོད།
གོམ་སྟབས་རྗེས་མར་བོད་ལྗོངས་གུང་གཞོན་སྡེ་ཚོགས་ཀྱིས་རྒྱུན་མཐུད་ངང་གསར་གཏོད་བྱེད་སྒོ་སྣ་ཚོགས་སྤེལ་ནས་བདེ་འཇགས་སྲུང་སྐྱོང་དང་འཚར་ལོངས་ཞབས་ཞུ་དེ་ལས་མང་བ་གཞི་རིམ་དུ་སྣུར་སྲིང་དང་། སྣ་མང་ཅན་དང་རྒྱུན་ལྡན་ཅན་གྱི་སློབ་གསོའི་ཐོག་ནས་བོད་ཁུལ་གྱི་གཞོན་ནུ་ལོ་ཆུང་རྣམས་བདེ་འཇགས་དང་ཕུན་སུམ་ཚོགས་པའི་དགུན་ཁའི་གུང་གསེང་རོལ་བར་སྲུང་སྐྱེལ་བྱས་ཏེ། སྡེ་ཚོགས་རྩ་འཛུགས་ཀྱི་ཐུགས་ཁུར་འོག་གཞོན་ནུ་ཚོ་འཚར་ལོངས་ཡོང་བར་རོགས་འདེགས་བྱེད་རྒྱུ་ཡིན་པ་རེད།
བསོད་བསྟན་གྱིས་བསྒྱུར།
