ཉེ་ཆར། ལྷོ་ཁ་གྲོང་ཁྱེར་སྲིད་གཞུང་གིས་མ་འཇོག་ཐེབས་རྩ་དེ་ཀྲུང་གོའི་དངུལ་འཛིན་མ་འཇོག་ཐེབས་རྩ་ལས་རིགས་མཐུན་ཚོགས་སུ་གྲུབ་འབྲས་ཐོབ་པའི་ངང་ཐོ་འགོད་བྱས་པ་མ་ཟད། བོད་ལྗོངས་ཅང་ནན་གཏེར་ལས་མ་རྐང་ཚད་ཡོད་ཀུང་སིའི(གཤམ་དུ་“ཅང་ནན་གཏེར་ལས་”བསྡུ་རྒྱུ)མ་དངུལ་བཏང་ནས་བོད་རང་སྐྱོང་ལྗོངས་ཀྱི་ས་གནས་དེ་གའི་རྣམ་གྲངས་ལ་ཐད་ཀར་མ་འཇོག་ལེགས་གྲུབ་བྱས་པའི་སྲིད་གཞུང་གི་མ་འཇོག་ཐེབས་རྩ་དང་པོར་གྱུར་ཡོད།
ཤེས་རྟོགས་བྱུང་བར་གཞིགས་ན། ཐེབས་རྩ་དེའི་སྤྱིའི་གཞི་ཁྱོན་སྒོར་དུང་ཕྱུར་10ཡིན་པས། ལྷོ་ཁ་གྲོང་ཁྱེར་ནོར་སྲིད་ཀྱིས་མ་དངུལ་100%བཏང་བ་དང་བོད་ལྗོངས་ལྷོ་ཁ་ཡར་ཀླུང་མ་འཇོག་ཚད་ཡོད་ཀུང་སིར་མ་རྐང་འཇོག་མཁན་གྱིས་འགན་འཁྲི་ལག་བསྟར་བྱ་རྒྱུའི་དབང་ཆ་སྤྲད་པ་དང་ཡོངས་བསྒྲགས་འདེམས་བསྐོ་བྱས་པ་བརྒྱུད་གོ་ཡོན་རྐང་དབང་མ་འཇོག་ཚད་ཡོད་ཀུང་སིར་ཐེབས་རྩའི་དོ་དམ་པའི་འགན་འཁུར་རྒྱུའི་མངགས་བཅོལ་བྱས་པ་རེད།
མིག་སྔར་ཕྱོགས་གཉིས་པོས་མ་འཇོག་གན་རྒྱ་བཞག་ཟིན་པ་མ་ཟད་ཅང་ནན་གཏེར་ལས་ཀྱིས་ད་ཐེངས་ཀྱི་ཁ་ཕྱོགས་གཏན་འཁེལ་གྱི་འཕར་གཏོང་ཐད་སྤྱི་བསྒྲགས་བྱས་ནས་ཁྱབ་བསྒྲགས་བྱས་པ་རེད། ཤེས་རྟོགས་བྱུང་བར་གཞིགས་ན། ཅང་ནན་གཏེར་ལས་ནི་2000ལོར་བཙུགས་པ་དང་ལྷོ་ཁ་གྲོང་ཁྱེར་སྣེ་གདོང་ཁུལ་དུ་གནས་ཡོད། རྒྱལ་ཡོངས་ཁེ་ལས་འབྲིང་ཆུང་གི་མ་རྐང་ནང་བཤུག་མ་ལག་གིས་སྒོ་བྱང་སྤྲད་པའི་ཁེ་ལས་གསར་པ་ཞིག་ཡིན་པ་རེད། གཙོ་བོ་ཁིར་ལྕགས་གཏེར་སོགས་གཏེར་ཁའི་ཐོན་ཁུངས་རྩད་ཞིབ་གསར་སྤེལ་དང་ཕྱིར་ཚོང་གི་ལས་སྒོ་གཉེར་གྱི་ཡོད་པ་དང་མིག་སྔར་རྒྱལ་ནང་གི་གཞི་ཁྱོན་སྔོན་ཐོན་ཡིན་པ་མ་ཟད་ཤུགས་རྐྱེན་ངེས་ཅན་ལྡན་པའི་ཁིར་ལྕགས་གཏེར་མཁོ་འདོན་ཚོང་པ་ཞིག་རེད།
འབྲེལ་ཡོད་འགན་འཁུར་བས་ལྷོ་ཁ་གྲོང་ཁྱེར་སྲིད་གཞུང་གིས་མ་འཇོག་ཐེབས་རྩས་ནོར་སྲིད་མ་དངུལ་གྱི་འདེགས་ཤིང་ཆེ་རུ་གཏོང་བའི་ནུས་པ་དང་ཐོན་ལས་ཁྲིད་སྟོན་གྱི་ནུས་པ་འདོན་སྤེལ་གང་ལེགས་བྱས་ཏེ། རང་ཡུལ་གྱི་ སྤུས་ལེགས་རྣམ་གྲངས་ལ་མུ་མཐུད་སྔོག་འདོན་དང་མ་འཇོག་བྱས་ནས་སྤྱི་ཚོགས་ཀྱི་མ་རྩ་དེ་བས་མང་བ་རྒྱལ་ཡོངས་ཁེ་ལས་འབྲིང་ཆུང་གི་མ་རྐང་ནང་བཤུག་མ་ལག་དེ་ཀྲུང་གོའི་དངུལ་འཛིན་ལྟ་སྐུལ་དོ་དམ་ཨུ་ལྷན་གྱིས་ཐད་ཀར་དོ་དམ་བྱེད་དགོས་ཤིང་ལྷོ་ཁ་གྲོང་ཁྱེར་གྱི་དཔལ་འབྱོར་འཛུགས་སྐྲུན་ནང་ཐུན་མོང་ཐོག་ཞུགས་རྒྱུར་སྐུལ་སློང་བྱས་ཏེ། ལྷོ་ཁ་གྲོང་ཁྱེར་གྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ལྟེ་བའི་དངུལ་རྩའི་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ཞེས་བཤད་པ་རེད།
ཚེ་རིང་ཐར་གྱིས་བསྒྱུར།
