འདི་ནི་ལྷོ་ཁ་གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་དབུ་བརྙེས་པའི་ཚོགས་ཆེན་གྱི་རྣམ་པ་ཡིན།
ཟླ་12ཚེས་23ཉིན་ལྷོ་ཁ་གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་དངོས་སུ་དབུ་བརྙེས་པའི་ཚོགས་ཆེན་འཚོགས་པ་དེ་ནི་ལྷོ་ཁ་གྲོང་ཁྱེར་གྱི་ཞིང་འབྲོག་ཐོན་ལས་དེ་ཁ་ཐོར་རྣམ་པའི་གོང་འཕེལ་དང་ཁ་བྲལ་ནས་རྩ་འཛུགས་ཅན་དང་མཐུན་སྦྱོར་ཅན་གྱི་འཕེལ་རྒྱས་ཀྱི་དུས་མཚམས་གསར་རྐྱང་དུ་སླེབས་པ་མཚོན་ཡོད། ཚོགས་མིའི་སྡེ་ཚན་37གྱི་འགན་འཁུར་བ་ཚོགས་ཆེན་ནང་བཞུགས་ཡོད།
ད་ཐེངས་ཚོགས་འདུའི་ནང་ཞུགས་མཁན་མི་སྣས་ཡཱ་ཐུའོ་ཀུང་སིའི་འབྲེལ་ཡོད་གྲ་སྒྲིག་ལས་དོན་སྙན་ཞུ་དང་གྲ་སྒྲིག་ཚོགས་འདུའི་གྲོས་ཞིབ་གནས་ཚུལ་གྱི་ཁྱབ་བསྒྲགས་ལ་ཉན་པ་དང་། 《ལྷོ་ཁ་གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་ཀྱི་སྲོལ་ཡིག》《ལྷོ་ཁ་གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་ཀྱི་འདེམས་བསྐོ་བྱ་ཐབས》ལ་གྲོས་ཞིབ་དང་བརྡས་ཐག་བཅད་པ་རེད། གཏན་འཁེལ་བྱས་པའི་གོ་རིམ་ལྟར་ཚོགས་ཆེན་ཐོག་མཐུན་ཚོགས་ཀྱི་ལས་འཛིན་ལྷན་ཚོགས་སྐབས་དང་པོའི་ལས་འཛིན་པ་འདེམས་ཐོན་བྱུང་། ཚོགས་ཞུགས་ཀྱི་མི་སྣ་ཡོངས་ཀྱིས་ཐུན་མོང་ཐོག་བདེན་དཔང་བྱས་པ་བརྒྱུད་བྱང་བུ་སྤྲོད་པའི་མཛད་སྒོ་བདེ་བླག་ངང་ལེགས་གྲུབ་བྱུང་ནས་ལྷོ་ཁ་གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་དངོས་སུ་དབུ་བརྙེས་པ་ཁྱབ་བསྒྲགས་བྱས་ཡོད།
དེ་རྗེས་གསར་དུ་བདམས་ཐོན་བྱུང་བའི་ལས་འཛིན་ལྷན་ཚོགས་ཀྱི་ལས་འཛིན་པས་ཚང་འཛོམས་གྲོས་ཚོགས་ཐེངས་དང་པོ་འཚོགས་ནས་མཐུན་ཚོགས་ཀྱི་ཚོགས་གཙོ་དང་ཚོགས་གཙོ་གཞོན་པ། དྲུང་ཆེ་བཅས་འདེམས་བསྐོ་བྱས་པ་རེད། མཐུན་ཚོགས་ཀྱི་དྲུང་ཆེ་བསྟན་འཛིན་གྱིས་ངོ་སྤྲོད་གནང་གསལ། གྲོང་ཁྱེར་ཞིང་འབྲོག་ཐོན་ལས་མཐུན་ཚོགས་ནི་ལྷོ་ཁ་ཡཱ་ཐོའུ་ཡིས་གཙོ་ཁྲིད་འོག་དབུ་བརྙེས་པ་ཞིག་ཡིན་པ་དང་ཁོངས་མིའི་སྡེ་ཚན་ནང་ཡཱ་ཐོའུ་ཀུང་སིའི་ཁོངས་གཏོགས་ཞིང་འབྲོག་ཐོན་ལས་ཀྱི་བུའི་ཀུང་སི་ཚུད་ཡོད་ལ། དེ་བཞིན་གྲོང་ཁྱེར་ཡོངས་ཀྱི་ཞིང་འབྲོག་ལས་ཀྱི་ཐོན་སྐྱེད་དང་། ལས་སྣོན། ཕྱིར་ཚོང་། ཟོག་འགྲུལ། ཚོང་དོན། ཞིང་ལས་གློག་རྡུལ་ཚོང་ལས་སོགས་མངའ་ཁོངས་མང་པོའི་ཁེ་ལས་དང་མཉམ་ལས་ཁང་ལ་མིག་སྔར་ཁོངས་མིའི་ཚན་པ་37ཡོད་པ་རེད། མཐུན་ཚོགས་དབུ་བརྙེས་པའི་རྗེས་སུ་ཞིང་འབྲོག་ལས་ལ་སྤུས་ཚད་མཐོ་བའི་གོང་འཕེལ་བྱུང་སྟེ་ས་གནས་དེ་གའི་ལེགས་ཆ་དང་ཁྱད་ཆོས་ལྡན་པའི་ཐོན་ལས་རྨང་གཞིར་བྱས་ཏེ། ལྷོ་ཁའི་ཞིང་ལས་ཐོན་རྫས་ཀྱི་སྤུས་རྟགས་ཤུགས་རྐྱེན་རྒྱུན་ཆད་མེད་པར་ཆེ་རུ་བཏང་ནས་གྲོང་ཁྱེར་ཡོངས་ཀྱི་ཞིང་འབྲོག་ཐོན་ལས་ཀྱི་འཕེལ་རྒྱས་ལ་འགུལ་ནུས་གསར་པ་བསྣན་ཡོད།
བསོད་བསྟན་གྱིས་བསྒྱུར།
