ཟླ་6ཚེས་21ཉིན་ནས་ཉིན་25བར་གུང་གཞོན་སྡེ་ཚོགས་བོད་ལྗོངས་ཨུ་ལྷན་དང་ལྗོངས་སློབ་མའི་མཉམ་འབྲེལ་ལྷན་ཚོགས་ཀྱི་གདན་ཞུས་ལྟར་ཤང་ཀང་གི་གཞོན་ནུ་ལོ་ཆུང་འཐུས་མི་ཚོགས་པ་བོད་ལྗོངས་སུ་སློབ་སྦྱོང་གི་ཉམས་མྱོང་སྤེལ་རེས་དང་ཞིབ་འཇུག་བྱེད་སྒོ་སྤེལ་བར་སླེབས་ཤིང་། ཤང་ཀང་སློབ་ཆེན་དང་ཤང་ཀང་རང་བྱུང་བཟོ་སྐྲུན་རིག་པའི་སློབ་ཆེན་སོགས་མཐོ་སློབ་ནས་ཡོང་བའི་གཞོན་ནུ་སློབ་མ་33བྱེད་སྒོའི་ནང་བཞུགས་ཡོད་པ་རེད།
སློབ་སྦྱོང་གི་ཉམས་མྱོང་སྤེལ་རེས་བྱེད་རིང་འཐུས་མི་ཚོགས་པ་དང་བོད་ལྗོངས་སློབ་ཆེན། བོད་ལྗོངས་གསོ་རིག་སློབ་ཆེན་གྱི་སློབ་མ་དང་ཉམས་མྱོང་སྤེལ་རེས་དང་གྲོས་བསྡུར་བྱས་པ་དང་འབྲེལ་ས་གནས་གཉིས་ཀྱི་གཞོན་ནུ་རིག་གཞུང་ཞིབ་འཇུག་དང་ཤེས་ལྡན་མི་སྣ་གསོ་སྐྱོང་སོགས་ཀྱི་གནས་ཚུལ་ངོ་སྤྲོད་བྱས་པ་རེད། བོད་དང་ཤང་ཀང་ས་གནས་གཉིས་ཀྱི་གཞོན་ནུ་སློབ་མས་ད་དུང་ཆ་སྒྲིག་མཛའ་གྲོགས་ཀྱི་བྱེད་སྒོ་སྤེལ་ནས་རོལ་རྩེད་རྒྱ་བསྐྱེད་དང་ཤེས་ཡོན་དང་སྒྱུ་རྩལ་མཉམ་འགུལ་གྱི་ཁྲོད་ས་གནས་གཉིས་ཀྱི་གཞོན་ནུ་ཚོས་སློབ་སྦྱོང་དང་མིག་ལྟོས་བྱེད་རེས་དང་། ཤེས་རྟོགས་ཟབ་ཏུ་གཏོང་རེས། མཛའ་གྲོགས་ཐོབ་རེ་བཅས་བྱས་ཡོད།
ཉམས་མྱོང་སྤེལ་རེས་བྱེད་སྒོའི་ཁྲོད་ཤང་ཀང་གི་གཞོན་ནུ་ལོ་ཆུང་འཐུས་མི་ཚོགས་པའི་ཁོངས་མིས་བོད་ཀྱི་རྟེན་རྫས་བཤམས་མཛོད་ཁང་དང་། ཕོ་བྲང་པོ་ཏ་ལ། ཐང་བོད་མནའ་འབྲེལ་རྡོ་རིང་། བོད་དུ་བཅའ་སྡོད་ཆིང་སྲིད་གཞུང་གི་བློན་ཆེན་ཡ་མོན། བོད་ཀྱིས་ཀྲུང་ཧྭ་མི་རིགས་ཐུན་མོང་སྒྲིག་གཞིའི་འདུ་ཤེས་བརྟན་པོ་འཛུགས་པའི་གཞོན་ནུ་ལོ་ཆུང་གི་བརྗོད་དོན་གཙོ་བོའི་འགྲེམས་ཁང་སོགས་ལ་ལྟ་སྐོར་བྱས་ནས་གཏིང་ཟབ་ལ་རྨང་གཞི་བརྟན་པའི་ཀྲུང་ཧྭ་མི་རིགས་ཀྱི་སྣ་མང་གཞི་གཅིག་ལ་མྱོང་ཚོར་བྱས་ནས། གཞོན་ནུ་ལོ་ཆུང་སློབ་མས་ཕུལ་བྱུང་གི་སྲོལ་རྒྱུན་རིག་གནས་ལ་ངོས་འཛིན་གཏིང་ཟབ་ཏུ་ཡོང་རྒྱུར་སྐུལ་འདེད་བཏང་ཡོད།
སྟོད་ལུང་བདེ་ཆེན་ཆུས་དབུལ་སྐྱོར་གནས་སྤོས་བཀོད་སྒྲིག་བྱ་ཡུལ་དུ། འཐུས་མི་ཚོགས་པ་ཚོགས་ཆུང་དབྱེ་ནས་ཞིང་པའི་ཁྱིམ་ཚང་དུ་བསྐྱོད་དེ་ཇ་སྣུམ་དང་རྩམ་པ་སོགས་བཟའ་བཅའ་བཟོ་བའི་བརྒྱུད་རིམ་ཉམས་ལེན་བྱས་ཏེ། བོད་ཀྱི་བབ་ཆགས་ཀྱི་ཡུལ་སྲོལ་གོམས་གཤིས་ལ་མྱོང་ཚོར་བྱས་པ་དང་བོད་ཀྱི་གྲོང་གསེབ་གསར་པའི་རྣམ་པ་དང་སྒྱུར་བཅོས་འཕེལ་རྒྱས་ཀྱི་གྲུབ་འབྲས་ལ་ཤེས་རྟོགས་བྱས་པ་རེད། ཤང་ཀང་རྒྱ་ཡིག་སློབ་ཆེན་གྱི་སློབ་གྲོགས་ཧོང་རུང་ཤིན་གྱིས་ཉམས་མྱོང་སྤེལ་རེས་བྱེད་སྒོའི་ཐོག་བོད་ཀྱི་ཐུན་མོང་མ་ཡིན་པའི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་དང་། ཉིན་རེ་བཞིན་འགྱུར་ལྡོག་འགྲོ་བཞིན་པའི་འཕེལ་རྒྱས་ཀྱི་འགྱུར་ལྡོག“མི་རིགས་ཁག་མཐུན་སྒྲིལ་ལྡན་པའི་ངང་ཁྱིམ་ཚང་གཅིག་ལྟར་གྱི་བརྩེ་དུང་”དངོས་སུ་མྱོང་ཚོར་ཐུབ་བྱུང་བས། རང་ཉིད་ཀྱིས་མཐོང་ཐོས་བྱུང་བ་རྣམས་མི་དེ་བས་མང་བར་བཤད་ཐུབ་པ་བྱས་ཏེ། ཐུན་མོང་ཐོག་འགྲོ་འོང་སྤེལ་རེས་དང་མཉམ་འདྲེས་ལ་སྐུལ་འདེད་བཏང་ནས་ཀྲུང་ཧྭ་མི་རིགས་ཐུན་མོང་སྒྲིག་གཞིའི་འདུ་ཤེས་བརྟན་པོ་འཛུགས་རྒྱུ་ཡིན་ཞེས་བཤད།
ཤེས་རྟོགས་བྱུང་བར་གཞིགས་ན། 2003ལོ་ནས་བཟུང་གུང་གཞོན་སྡེ་ཚོགས་བོད་ལྗོངས་ཨུ་ལྷན་དང་། ལྗོངས་སློབ་མའི་མཉམ་འབྲེལ། ཤང་ཀང་རྩེད་རའི་མཐུན་ཚོགས་བཅས་ཀྱིས་ལོ་ལྟར་ཕན་ཚུན་འཚམས་འདྲི་དང་སློབ་སྦྱོང་ཉམས་མྱོང་སྤེལ་རེས་མཉམ་ལས་ཀྱི་ལམ་སྲོལ་ཡག་པོ་བཙུགས་ཡོད་པས། མིག་སྔའི་བར་ཕྱོགས་གཉིས་གྱིས་ཉམས་མྱོང་སྤེལ་རེས་ཁག་18སྤེལ་བ་དང་ས་གནས་གཉིས་ཀྱི་ཕུལ་བྱུང་གཞོན་ནུ་ལོ་ཆུང་700ལྷག་ཙམ་ཕན་ཚུན་འཚམས་འདྲི་དང་ཉམས་མྱོང་སྤེལ་རེས་ཀྱི་བྱེད་སྒོའི་ནང་བཞུགས་ཡོད་པ་རེད།
གོམ་སྟབས་རྗེས་མར་གུང་གཞོན་སྡེ་ཚོགས་བོད་ལྗོངས་ཨུ་ལྷན་གྱིས་རྒྱུན་མཐུད་ངང་གཞོན་ནུ་ལོ་ཆུང་ཚོ་ཉམས་མྱོང་སྤེལ་རེས་བྱེད་སྒོ་གཏིང་ཟབ་ཏུ་བཏང་ནས། བོད་དང་ཤང་ཀང་གི་གཞོན་ནུ་ལོ་ཆུང་རྒྱ་ཁྱབ་ངང་འགྲོ་འོང་དང་། ཕྱོགས་ཡོངས་ནས་སྤེལ་རེས། མཉམ་འདྲེས་གཏིང་ཟབ་ཏུ་གཏོང་རྒྱུར་སྐུལ་འདེད་བཏང་ནས་རྒྱ་ཆེའི་གཞོན་ནུ་ལོ་ཆུང་གིས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ནང་ལང་ཚོའི་འགན་འཁྲི་འཁུར་དུ་འཇུག་རྒྱུ་ཡིན་པ་རེད།
བསོད་བསྟན་གྱིས་བསྒྱུར།
