2024ལོ་ནས་བཟུང་རང་ལྗོངས་12315ཐད་སྦྲེལ་ཁ་པར་རྒྱུན་འཁྱོངས་ཀྱིས་བེད་སྤྱོད་གཏོང་ཐུབ་པ། ཁྲོམ་ར་ལྟ་སྐུལ་དོ་དམ་སྤྱི་ཁྱབ་ཅུས་ཀྱིས་རྒྱལ་ཡོངས་ཀྱི་12315ཐད་སྦྲེལ་ཁ་པར་འབྲེལ་མཐུད་བྱེད་ཚད་ལ་འཐེན་བཤེར་བྱེད་སྐབས་མདུན་གྲལ་དུ་སླེབས་པ་དང་དུས་མཚུངས་རང་སྐྱོང་ལྗོངས་12315བཀོད་འདོམས་ལྟེ་གནས་དང་ལྷ་ས་གྲོང་ཁྱེར་12345ཐད་སྦྲེལ་ཁ་པར་དབར་ཆ་འཕྲིན་སྤེལ་རེས་མངོན་འགྱུར་བྱུང་ཡོད། 2024ལོར་ལྗོངས་ཡོངས་ཀྱི་ལས་སྟེགས་12315ཐོག་ཁྱོན་བསྡོམས་འཛད་སྤྱོད་པས་ཞུ་གཏུག་དང་ཐེར་འདོན་བྱས་པའི་གྱོད་གཞི་ཁྲི་2.17བདག་སྤྲོད་བྱས་པ་དང་གྱོད་དོན་291ཐོ་འགོད་བྱས་པ། དངུལ་ཆད་དང་གཞུང་བཞེས་སྒོར་ཁྲི་14.62བཅས་འཛད་སྤྱོད་པར་དཔལ་འབྱོར་གྱོང་གུན་སྒོར་ཁྲི་1796.86ཕྱིར་སློག་ཐུབ་པ་རེད།
ཤེས་རྟོགས་བྱུང་བར་གཞིགས་ན། རང་ལྗོངས་ཀྱི་ཁྲོམ་རའི་ལྟ་སྐུལ་དོ་དམ་སྡེ་ཁག་རིམ་པ་ཁག་གིས་བཟའ་བཅའི་བདེ་འཇགས་ལྟ་སྐུལ་དོ་དམ་ལ་ཤུགས་སྣོན་ཐེངས་མང་བརྒྱབ་ནས་བཟའ་བཅའི་འཐེན་བཤེར་གྱི་ལས་འགན་ཁག་15572ལེགས་གྲུབ་བྱུང་བ་དང་མིའི་གྲངས་ཚད་སྟོང་ཟིན་པའི་ནང་ནས་འཐེན་བཤེར་ཐེངས་4.15ཟིན་ཡོད་པ་རེད། ཟས་རིགས་བདེ་འཇགས་གདེང་འཇོག་རང་བཞིན་གྱི་འཐེན་བཤེར་ཚད་ལྡན་གྱི་བརྒྱ་ཆ99ཡན་རྒྱུན་འཁྱོངས་བྱས་ཡོད། རང་སྐྱོང་ལྗོངས་སྤྱི་བདེ་ཐིང་སོགས་ལྗོངས་ཐད་གཏོགས་སྡེ་ཚན་12དང་མཉམ་དུ་2024ལོའི་དྲ་རྒྱའི་ཁྲོམ་རར་ལྟ་སྐུལ་དོ་དམ་འཕེལ་རྒྱས་ལ་སྐུལ་འདེད་དང་བདེ་འཇགས་འགན་ལེན་གྱི་ཆེད་དོན་བྱ་སྤྱོད་སྒྲིག་འཛུགས་བྱས་ནས་སྤེལ་བ་དང་། ལྗོངས་ཡོངས་ཀྱི་ཁྲོམ་རའི་ལྟ་སྐུལ་དོ་དམ་སྡེ་ཁག་རིམ་པ་ཁག་གིས་ཆེད་དོན་བྱ་སྤྱོད་ནང་སྟེགས་བུའི་ཞབས་ཞུའི་དྲ་ཐོག་ཚོང་ཁང177མཚམས་འཇོག་བྱེད་དགོས་པའི་བཀའ་བཏང་བ་དང་དྲ་རྒྱའི་བཟའ་བཏུང་ཞབས་ཞུའི་གྱོད་གཞི་41ཞིབ་བཤེར་ཐག་གཅོད་བྱས་པ་རེད། དམངས་འཚོ་ཁྱབ་ཁོངས་ཀྱི་བརྡ་ཁྱབ་ལྟ་སྐུལ་དོ་དམ་ཆེད་དོན་བྱ་སྤྱོད་སྤེལ་ནས་དམངས་འཚོ་ཁྱབ་ཁོངས་ཀྱི་བརྡ་ཁྱབ་ཁྲིམས་འགལ་གྱོད་གཞི་10གྱོད་དོན་ཐོ་འགོད་ཞིབ་བཤེར་ཐག་གཅོད་བྱས་པ་བརྒྱུད་དེའི་གྱོད་གཞིའི་རིན་ཐང་སྒོར་ཁྲི་4.93དང་དངུལ་ཆད་གཞུང་བཞེས་སྒོར་ཁྲི་26.82ཟིན་ཡོད།
ངོ་སྤྲོད་བྱས་པར་གཞིགས་ན། 2024ལོར་རང་སྐྱོང་ལྗོངས་ཁྲོམ་རའི་ལྟ་སྐུལ་དོ་དམ་ཅུས་ཀྱིས་བོད་ཀྱི་སྨན་ལས་ལས་རིགས་ཚད་ཡོད་ཀུང་སི་ག་གེ་མོ་ཞིག་གི་རིན་གོང་མཐོར་གཏོང་གི་དོགས་གཞི་ཡོད་པའི་གྱོད་གཞི་ཐོ་འགོད་ཞིབ་བཤེར་ཐག་གཅོད་བྱས་ནས་དངུལ་ཆད་སྒོར་ཁྲི་49བཏང་བ་དང་། ཁེ་ལས་དང་འབྲེལ་བ་ཡོད་པའི་གྲོན་དངུལ་བསྡུ་བའི་ཆེད་དོན་ཞིབ་བཤེར་སྒྲིག་འཛུགས་བྱས་ནས་གྲོན་དངུལ་བསྡུ་བའི་ཚན་པ་58ལ་ཞིབ་བཤེར་བྱས་ཏེ། སྒྲིག་འགལ་གྲོན་དངུལ་བསྡུ་བའི་གནད་དོན་53ཤེས་རྟོགས་བྱུང་བ་དང་། སྒྲིག་འགལ་གྲོན་དངུལ་བསྡུ་བའི་གྱོད་གཞི་4གྱོད་དོན་ཐོ་འགོད་བརྟག་དཔྱད་བྱས་ཤིང་། འབྲེལ་ཡོད་གྲོན་དངུལ་སྒོར་ཁྲི་100.69ཕྱིར་སྤྲོད་བྱེད་དགོས་པའི་བཀའ་རྒྱ་བཏང་ནས་སྒོར་ཁྲི་4.83དངུལ་ཆད་དང་གཞུང་བཞེས་བཏང་ཡོད་པ་རེད།
ཚེ་རིང་ཐར་གྱིས་བསྒྱུར།
