དེ་རིང་བཀྲ་ཤིས་པའི་ཉིན་མོ་ལ། གནམ་ལ་སྐར་མ་བཟང་། ས་ལ་དུས་ཚོད་བཟང་། བར་ལ་རྟེན་འབྲེལ་འགྲིག རྟེན་འབྲེལ་ལས་ཀྱི་འགོ་མ། བསོད་ནམས་ལས་ཀྱི་ཞིང་ས་ཞེས་ཤོད་སྲོལ་ཡོད་པ་ལྟར། དེ་རིང་བག་སྟོན་བཀྲ་ཤིས་ཉིན་མོ་ལ། ཕ་ཨ་ཁུ་ལྷན་རྒྱས་ཕེབས། མ་དང་སྲུ་མོ་རྣམ་པ་བྱོན། གཉེན་དང་ཉེ་བ་མང་པོ་འཛོམས། གྲོགས་ཡུལ་ལུང་གཅིག་པ་འདུས་པས། རྟགས་རྟེན་འབྲེལ་ལེགས། ལས་སྨོན་ལམ་བཟང་། ཚེ་བསོད་ནམས་འཛོམས་ཞེས་པའི་ཚིག་བཟང་པོ་དང་དོན་བཟང་པོས་སྔུན་བསུས་ཏེ། ཀ་བཤད་ཀྱི་ལམ་ནས་སྨོན་ལམ་ཚིག་ཁ་ཤས་བུ་དང་བུ་མོ་ཁྱེད་གཉིས་གཙོ་བོར་བྱས་ནས་ལྷན་རྒྱས་རྣམ་པའི་སྙན་ལམ་དུ་འབུལ་རྒྱུ་ཡིན་པས་གསན་གནང་ཡོད་པར་ཞུ།
ཀ་ཅ་གཡང་གིས་འཁྱིལ་བའི་ཁང་བཟང་དུ། །ཁ་ཞེ་གཉིས་སུ་མེད་པའི་སྙིང་གཏམ་ཞིག །ག་སར་བསམ་པ་བཟང་པོ་འཆང་བཞིན་དུ། །ང་ཡི་སེམས་ཀྱི་གཏིང་ནས་སྨོན་ལམ་འདེབས། །ཅ་ཅོ་སྤངས་ནས་རང་དོན་མ་འཆུགས་ཤིང་། །ཆ་རྒྱུས་ཡོད་མེད་གང་ལ་མ་བལྟོས་པར། །ཇ་མར་ཐུད་གསུམ་རྟག་ཏུ་རོལ་བཞིན་དུ། །ཉ་རྒྱས་བློ་སེམས་ཁེངས་པའི་སྨོན་ལམ་འདེབས། །ཏ་ཟིག་ནོར་གྱི་རྒྱལ་པོའི་ལོངས་སྤྱོད་ལྟར། །ཐ་གྲུ་གང་དུ་སླེབས་ཀྱང་རོལ་བའི་ཁར། །ད་ལྟ་ཉིད་ནས་ཕན་ཚུན་བརྩི་བཞིན་དུ། །ན་གཞོན་བསམ་དོན་འགྲུབ་པའི་སྨོན་ལམ་འདེབས། །པ་ཊའི་རིས་ལྟར་སེམས་པ་མི་འཁྱོག་པར། །ཕ་མ་བྱམས་སེམས་ཅན་གྱི་ཞལ་ཏ་ལས། །བ་ཀུ་ལ་ལྟར་སྤྱོད་བཟང་སྲུང་གིན་དུ། །མ་ལྟར་བརྩེ་བ་ཟབ་པའི་སྨོན་ལམ་འདེབས། །ཙ་རི་གནས་བཟང་བསྐོར་བའི་དགེ་བ་དང་། །ཚ་གྲང་དཀའ་ཐུབ་སྤྱད་པའི་ཕན་ཡོན་ལས། །ཛ་ཏི་སྨན་མཆོག་ལུས་ལ་ཕན་པ་ལྟར། །ཝ་ལེར་རིགས་བཟང་སྐྱེ་བའི་སྨོན་ལམ་འདེབས། །ཞྭ་ལྟར་གོང་དུ་བཀུར་བའི་ལྷན་རྒྱས་ཚོས། །ཟ་འཐུང་གང་དགའི་དཔལ་ལ་རོལ་གྱུར་ནས། །འ་ཅག་ཕན་ཚུན་སྤྲོ་བ་འཕེལ་བའི་ཆེད། །ཡ་རབས་སྤྱོད་བཟང་འཛོམས་པའི་སྨོན་ལམ་འདེབས། །ར་རྫི་རྒན་པོས་ར་ལ་བརྩེ་བ་ལྟར། །ལ་དང་ལུང་པ་གང་དུ་བསླེབས་ན་ཡང་། །ཤ་ཞེན་ཆེ་བའི་ལྷག་བསམ་འཆང་བཞིན་དུ། །ས་ཆ་འདི་གར་བསམ་དོན་འགྲུབ་པར་ཤོག །ཧ་གཉིད་སད་པའི་ཁྱོ་ཤུག་ཁྱེད་གཉིས་ལ། །ཨ་ཁུ་ཨ་ནེས་བཤད་པའི་སྙིང་གཏམ་ཡིན། །བཀྲ་ཤིས་ནམ་མཁར་གང་བའི་སྨོན་ལམ་དང་། །བདེ་ལེགས་ས་གཞིར་ཁྱབ་པའི་བྱིན་རླབས་ལས། །ཕུན་སུམ་གཡང་རྟེན་ཚོགས་པའི་རྟེན་འབྲེལ་ཞུ། །
