ཉེ་བའི་ལོ་ཤས་རིང་། རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ཏེ། རིག་གནས་ལ་བརྟེན་ནས་ཡུལ་སྐོར་ལ་སྐུལ་འདེད་གཏོང་བ་དང་། ཡུལ་སྐོར་ལ་བརྟེན་ནས་རིག་གནས་མངོན་པར་བྱེད་པ། མཉམ་འདྲེས་གཏིང་ཟབ་བྱེད་པ་བཅས་མཐའ་འཁྱོངས་ཀྱིས་རིག་གནས་ཡུལ་སྐོར་གྱི“འདུ་འགོད་ཆེན་པོ་དགུ”ཡི་འཛུགས་སྐྲུན་ལ་སྐུལ་འདེད་གཏོང་བ་དང་དྲ་སྦྲེལ་དང་སྨྱན་སྦྱོར་གསར་པ་སོགས་ཀྱི་ལས་སྟེགས་ལ་བརྟེན་ནས། “རིག་གནས་བོད་ལྗོངས”ཀྱི་སྨྱན་སྦྱོར་གསར་པར་ཐད་གཏོང་གི་བྱ་ཐབས་སྤྱད་དེ་རིག་གནས་བྱེད་སྒོ་སྣ་ཚོགས་སྤེལ་ནས་ཕྱོགས་ཡོངས་དང་། དངོས་ཡོད། ཕྱོགས་བསྡུས་བཅས་ཀྱི་སྒོ་ནས་བོད་ཀྱི་རིག་གནས་འཕེལ་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་མངོན་པར་བྱས་ཏེ། བོད་ཀྱི་སྤྱི་པའི་རིག་གནས་ཞབས་ཞུ་དོ་སྙོམས་ཅན་ལ་སྐུལ་འདེད་གཏིང་ཟབ་བཏང་ཡོད།
རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་གྲོང་གསེབ་ཀྱི་རིག་གནས་འཛུགས་སྐྱོང་དང་། རིག་གནས་དང་ཡུལ་སྐོར་ཟུང་འབྲེལ། སྒྱུ་རྩལ་གསོ་སྦྱོང་། སྒྱུ་རྩལ་གྲུབ་འབྲས་ཁྱབ་གདལ། མངོན་མིན་རིག་གནས་ཤུལ་བཞག་རྒྱུན་འཛིན་བྱེད་སྒོ་གཉེར་བ་སོགས་གོ་སྐབས་སུ་བྱས་ཏེ། བོད་ཀྱི་རིག་གནས་སྒྱུ་རྩལ་གྱི་དམིགས་བསལ་ཁྱད་ཆོས་ལྡན་པའི་བརྗོད་དོན་གཙོ་བོའི་བྱེད་སྒོ་ཐད་གཏོང་བྱས་པ་བརྒྱུད། ཐབས་ལམ་རྒྱ་ཆེ་རུ་དང་། ལྟད་མོ་བ་ཞུགས་ཚད་མང་དུ། ཁྱབ་སྤེལ་གྱི་ཕན་འབྲས་ཆེ་རུ་བཅས་ཕྱིན་ཡོད། 2022ལོ་ནས་བཟུང་། རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་སྔ་རྗེས་སུ་ལྷ་སའི་རྒྱན་གོས་གཟའ་འཁོར་སྐབས་དང་པོ་དང་། “སྐལ་བཟང་མེ་ཏོག་འཁྲབ་སྟོན་དུས་ཚིགས” བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པ་སོགས་བརྗོད་དོན་གཙོ་བོའི་རིག་གནས་བྱེད་སྒོ་ཐད་གཏོང་བྱས་ཏེ་ཐག་རིང་ལུང་ཁུག་གི་མང་ཚོགས་ཚོ“ཁྱིམ་ནས་དོན་མི་དགོས་པར”རིག་གནས་འཕེལ་རྒྱས་ཀྱི་གྲུབ་འབྲས་ལོངས་སྤྱོད་ཐུབ་ནས་དྲ་ཐོག་ཏུ་ཞུགས་ཚད་དང་ཕན་ཚུན་སྤེལ་རེས་བྱེད་ཚད་རྒྱུན་མཐུད་ངང་མང་དུ་ཕྱིན་ཡོད། ལྷག་པར་དུ་འདི་ལོའི་ཟླ་8པར་བོད་ལྗོངས་ཟློས་གར་ཁང་ཆེ་མོར་གཉེར་བའི་བོད་ཀྱི་རིག་གནས་སྒྱུ་རྩལ་དུས་ཆེན་སྐབས་གཉིས་པའི་མཇུག་འགྲིལ་མཛད་སྒོ་དང་བྱ་དགའ་སྤྲོད་པའི་དགོང་ཚོགས་ཐོག“རིག་གནས་བོད་ལྗོངས”ཀྱི་སྐད་འཕྲིན་དང་ཁྱུག་དབྱིངས་ལས་སྟེགས་བརྒྱུད། ལྟད་མོ་བ་མི་ཁྲི་50ཙམ་ཟིན་ནས་རིག་རྩལ་དགོང་ཚོགས་ལ་ལྟ་མཁན་མི་གྲངས་ཀྱི་ཟིན་ཐོ་གསར་པ་བཏོད་པ་དང་སྒྱུ་རྩལ་དུས་ཆེན་གྱི་ཤུགས་རྐྱེན་སྔར་བས་ཆེ་རུ་ཕྱིན་ཡོད།
ཤེས་རྟོགས་བྱུང་བར་གཞིགས་ན། བོད་ཀྱི་སྤྱི་པའི་སྤྲིན་ཚོམས་ལས་སྟེགས་དང“རིག་གནས་བོད་ལྗོངས”ཀྱི་སྨྱན་སྦྱོར་གསར་པའི་ལས་སྟེགས་ཕུད། རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་ད་དུང་སྤུས་ལེགས་ཐོན་རྫས་བདམས་ནསIPTVབརྙན་འཕྲིན་དུད་སྣེར་བཏང་སྟེ་ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་ཀྱི་ཡིད་དབང་འཕྲོག་ཤུགས་ཆེན་པོ་ལྡན་པའི་སྤུས་ལེགས་ཐོན་རྫས་དག་བརྙན་འཕྲིན་བརྒྱུད་ཡུལ་སྐོར་བ་ཁྲི་སྟོང་མང་པོར་མཉམ་སྤྱོད་བྱས་པས། བོད་ཀྱི་རིག་གནས་ཀྱི་ཁྱབ་སྤེལ་ནུས་པ་དང་ཁྱབ་རྒྱ་ཆེ་རུ་ཕྱིན་པ་དང་རྒྱ་ཆེའི་ཡུལ་སྐོར་བས་དེ་བས་སྟབས་བདེ་དང་། ནུས་ཆེ། གནད་སྨིན་བཅས་ཀྱི་སྒོ་ནས་བོད་ཤེས་རྟོགས་ཐུབ་པར་བྱུང་ཡོད།
ཉི་དོན་དང་པད་མ་ཆོས་སྒྲོན་གྱིས་སྒྱུར་ཞུས་བྱས།
