གཅིག
དཔེ་དེབ་ནི་བསམ་བློར་རྒྱགས་ཕྱེ་བར་མེད་གནང་མཁན་ཞིག་ཡིན། དེ་བས་དཔེ་དེབ་ནི་སྐྱེ་བོ་དཀྱུས་མ་ཞིག་གིས་འཛམ་གླིང་རིག་བྱེད་དུ་མཁོ་བའི་མིག་དང་དབྱེར་མ་མཆིས།
གཉིས།
དཔེ་དེབ་ཀྱི་ཁྲོད། ང་ཚོས་རང་ཉིད་ལ་མངའ་བའི་མནོ་བསམ་གྱི་ཚང་མལ་ཞིག་དང་འཇའ་རིས་བཞིན་བཀྲ་བའི་མཇེས་སྡུག་གི་ལང་ཚོའི་དཔལ་དེ་རྙེད་ཐུབ། དཔེ་དེབ་ཀྱི་རྐྱེན་པས། མི་ལོ་གང་མང་རིང་ལ་ངས་སྐོམ་པ་ཆུ་འདོད་ལྟར་ཤེས་པར་འདོད་པའི་འཕྱང་མོ་ཉུག་ཏུ་ལུས་འདྲའི་གནད་དོན་དེ་དག་ག་ལེ་ག་ལེར་ངའི་བསམ་བློའི་ཚང་མལ་དུ་འཛུལ་ནས་སོམ་ཉིའི་དྲ་བ་དེ་གཅོད་བཞིན་གདའ། ངས་དེ་ལྟར་བསམས་ཤིང་ངས་དེ་ལྟར་དྲན་ནས། མཐའ་ཡས་ཆུ་གཏེར་ཆེན་པོ་དང་མཚུངས་པར་མུ་མཐའ་མེད་པའི་ཤེས་རིག་གི་ཉིང་བཅུད་འདུས་པའི་དཔེ་དེབ་དུ་མ་བལྟས་ནས་ད་བར་འོངས། དཔེ་དེབ་ཀྱི་ཁྲོད་ནས་ང་ཚོར་ཤེས་རིག་གི་འབྲས་བཟང་མི་ཐོབ་ཟེར་མཁན་ཡོད་རུང་། དཔེ་དེབ་ན་རྙོག་འཛིང་གི་གནད་དོན་མང་ཞིང་དཀའ་ངལ་ཆེ་ཟེར་མཁན་ཡོད་ནའང་། སྨོན་ལམ་མི་ཡལ་བའི་སྙིང་ཁ་དྲོན་མོ་ན་བདག་གིས་དཔེ་ཀློག་ལ་འཛད་མཐའ་མེད་པའི་བརྩེ་བ་དང་ཡིད་ཆེས་རི་རབ་བཞིན་བཅངས་ཡོད།
གསུམ།
དཀར་གསལ་འོད་སྣང་གིས་ཁེངས་པའི་ལམ་ཆེན་དུ་འཁྲིད་མཁན་ནི་རང་ཉིད་ཡིན་པས། རང་ཉིད་ཀྱི་མ་རིག་པའི་གནས་དང་སྡུག་བསྔལ་རང་ཉིད་ཀྱིས་སེལ་འོས། པདྨའི་འདབ་བརྒྱ་ལྷུག་པོར་གྲོལ་འདྲའི་སྲིད་པ་འཇིག་རྟེན་གྱི་མཛེས་སྡུག་ཁྲོད། རང་ཉིད་ཁ་རོག་རེར་ཅི་ཡང་མི་ཤེས་པར་ལུས་ཐེངས་རེར། ངས་རང་ཉིད་ཀྱི་བྲང་ཁར་ལག་ཟུང་གླན་ནས་ཕ་མ་དགེ་བཤེས་རྣམས་ཀྱི་རིན་བྲལ་འཀའ་སློབ་ཡང་ནས་ཡང་དུ་དྲན་གསོ་བྱེད་ཀྱིན་རང་ཉིད་ལ་སྐུལ་མ་གཏོང་གི་ཡོད། རྒྱུ་མཚན་ནི། དཔེ་དེབ་དང་འགྲོགས་སྐབས་རང་གིས་རང་མི་བསླུ་བར་སྙིགས་འདོར་བཅུད་ལེན་བྱེད་དགོས་ཤིང་། དཔེ་དེབ་དང་མཉམ་འགྲོགས་བྱེད་དུས་རང་ཉིད་ཀྱི་ལོ་ཟླ་ཆུད་ཟོས་སུ་མི་གཏོང་བར་ཡང་དག་པའི་ཁ་ཕྱོགས་སུ་མདུན་བསྐྱོད་ཀྱི་རེ་བའི་མིག་མདའ་བསྲིངས་དགོས་པས་ཡིན།
བཞི།
དཔེ་དེབ་དང་གྲོགས་པོ་བྱེད་ཤེས་པ་ན། སྐྱེ་བོ་སུ་ཡང་དོན་མེད་དུ་མུན་ནག་དང་ཐེ་ཚོམ་གྱི་གནས་སུ་ལྷུང་མི་སྲིད་ཅིང་། རང་གི་ལུས་ནས་མི་མངོན་ཞིང་མི་གསལ་བའི་ཞན་ཆ་དག་རིམ་གྱིས་ཚོར་ཐུབ། དཔེ་དེབ་དང་འགྲོགས་སྐབས། ཐོག་མར་རང་གིས་རང་ལ་རྒྱུན་འཁྱོངས་ཡོང་རྒྱུའི་ཡིད་ཆེས་ཀྱི་གཞི་མ་དགོས།
ལྔ།
རང་ཉིད་ཀྱི་ཆེད་དུ་དཔེ་ཀློག་གི་ཐབས་ལམ་འཚོལ་བའམ་དཔེ་ཀློག་བྱས་ནས་རང་ལ་འཚམས་པའི་ཐབས་ལམ་འཚོལ་བ་ཡིན། མི་ལོ་དུ་མར་མནོ་བསམ་བཏང་རྗེས། དཔེ་ཀློག་གི་ཐབས་ལམ་འཚོལ་བ་ནི་མི་ཚེའི་གོ་རིམ་ཞིག་དང་འདྲ་བར་དང་ཐོག་ཆེས་ཆུང་ས་ཞིག་དང་གོ་སླ་བ་ཞིག་ནས་བཟུང་སྟེ་རྒྱུན་འཁྱོངས་ཀྱིས་མདུན་བསྐྱོད་བྱེད་དགོས་པའི་མྱོང་བ་དྲག་པོ་ཞིག་སྟེར་བས་ཡིན། དཔེ་ཀློག་བྱེད་སྐབས། ངས་རང་ཉིད་ལ་ཡིད་ཆེས་བྱེད་དོན་ནི། མུ་མཐའ་མེད་པའི་ཤེས་རིག་གི་རིན་བྲལ་ནོར་བུ་དགོས་འདོད་ཀུན་འབྱུང་དེ་ང་ལ་ཐོབ་པའམ་ཡང་ན་ཅི་ཡང་མི་ཐོབ་ཀྱང་བདག་ལ་བློ་འགྱོད་ཅི་ཡང་མེད།
དྲུག
མི་ལོ་འདི་དག་གི་འཚོ་བ་དཔེ་ཀློག་དང་མཉམ་འགྲོགས་བྱས་པས། ངས་བདེ་སྐྱིད་ལྡན་པའི་འཚོ་བ་ཞེས་པའི་ཐ་སྙད་དེའི་བསྟན་དོན་དངོས་དེ་ཚོར་བྱུང་། དེ་བས་མི་ལོ་འདི་དག་རིང་དཔེ་ཀློག་གིས་ངར་གནང་བ་ནི་འཛད་མཐའ་མེད་པའི་བསམ་བློའི་རྒྱགས་ཕྱེ་ཞིག་དང་ཞི་དུལ་བག་ཡོད་དང་ལྡན་པའི་སེམས་ཁམས་ཤིག་བསྐྲུན་པ་དེ་ཡིན། དཔེ་ཀློག་གིས་ང་ཚོའི་འཚོ་བ་སྣ་མང་ཕུན་སུམ་ཇེ་ཚོགས་སུ་གཏོང་བ་མ་ཟད་བསམ་བློའི་ཕན་ཡོན་ཡང་ཇི་སྙེད་ཅིག་སྦྱིན་སྟབས། ང་ཚོས་དུས་རབས་ཀྱི་གོམ་འགྲོས་ལ་སྙེག་ཅིང་མི་ཚེ་གང་པོ་དཔེ་ཀློག་གི་འཚོ་བར་རོལ་དགོས་ཨང་། །
ལྷ་ས་ཅང་སུའུ་ཚོད་སློབ་ལང་ཚོའི་མེ་ཏོག་རྩོམ་རིག་ཚོགས་པ།
ཟུར་ཁྲིད་དགེ་རྒན། ཚེ་བརྟན་རྒྱལ་པོ།
