མི་གཅིག་གི་མི་ཚེའི་ནང་ལ་མི་བརྒྱ་ཕྲག་དང་སྟོང་ཕྲག་མང་པོ་ཞིག་ཐུག་སྲིད་ལ། མི་དེ་དག་ག་ཚོད་ཀྱིས་མཐུན་པ་བྱུང་ན་གཞི་ནས་རང་ཉིད་ཀྱི་སེམས་པ་ཤེས་མཁན་གྱི་གྲོགས་དང་གྲོགས་མོ་ངོ་མ་དེ་ཐུག་སྲིད།
དུས་རྒྱུན་མི་རྒན་རྣམས་ཀྱིས། “གྲོགས་པོ་ཟེར་བ་ནི། རང་ཉིད་ལ་རྒྱལ་ཁ་ཐོབ་དུས་རྒྱབ་ཕྱོགས་ནས་སྨོན་འདུན་ཞུ་མཁན་དེ་ཡིན་ལ། རང་ཉིད་སྐྱོ་བའི་དུས་སུ་སྐད་ཆ་ཅི་ཡང་མ་བཤད་ཀྱང་། རང་གི་སྐྱོ་སྣང་ཇི་བཞིན་དུ་རྟོགས་ཐུབ་མཁན་དེ་ཡིན”ཟེར།
དེ་རིང་ང་ཚོའི་གྲོང་ཚོའི་ནང་ལ་སློབ་མ་ཚང་མ་མཉམ་དུ་འཛོམས་ནས་སྐྱིད་སྐྱིད་གཏོང་གི་ཡིན་ཟེར། ད་ལྟ་ང་ཚོའི་གྲོང་ཚོའི་ངོས་ནས་སྐྱིད་སྐྱིད་ལ་རོལ་བ་ནི་གོམས་སྲོལ་ལྟ་བུ་ཞིག་ཏུ་ཆགས་ནས། ལོ་རེར་ཐེངས་རེ་གཏོང་གི་ཡོད། སྔ་དྲོའི་ཆུ་ཚོད་དགུ་པའི་ཐོག་ང་ཚོ་གྲོགས་མོ་ལྔ་པོ་གྲོང་ཚོའི་རིག་གནས་ཁང་དུ་ཕྱིན་པ་ཡིན། ངེད་ལྔ་པོ་ནི་ཆུང་དུས་ནས་མཉམ་དུ་འཚར་ལོངས་བྱུང་བ་ཡིན་ལ། ཕན་ཚུན་བར་གྱི་མཛའ་བརྩེ་ནི་བཤད་མ་དགོས་པ་ཞིག་ཡོད། ང་ཚོ་དེར་སླེབས་དུས་ཕྲུ་གུ་འགའ་ཤས་ང་ཚོའི་སྔོན་ནས་སླེབས་ཚར་འདུག ང་ཚོ་རྐུབ་བཀྱག་ལྔ་ལྷན་དུ་བསྒྲིགས་ནས་དེར་བསྡད་པ་ཡིན། སྒྲོག་ཙེའི་ཐོག་ཏུ་འཐུང་ཆ་དང་། བྱི་རིལ། ཀུ་ཤུ་སོགས་ལོ་ཆུང་ཚོ་དགའ་བའི་བཟའ་བཏུང་རིགས་སྣ་ཚོགས་བསྒྲིགས་འདུག དེ་ནས་ཕྲུ་གུ་རྣམས་རིམ་པས་གཅིག་རྗེས་གཉིས་མཐུད་ཀྱིས་སླེབས་པ་དང་ཕྲུ་གུ་མང་ཆེ་བ་འཛོམས་ཟིན། ཐོག་མར་ང་ཚོ་ཕན་ཚུན་ངོ་ཚ་ནས་གཅིག་གིས་གཅིག་ལ་སྐད་ཆ་ཡང་མ་བཤད། གྲོང་ཚོའི་འགོ་འཛིན་སླེབས་པ་དང་ཁོང་གིས་ང་ཚོར། “ཁྱོད་ཚོ་འཛེམ་བྱེད་དགོས་མ་རེད། རང་རང་ག་རེ་ཟ་འདོད་ཡོད་ཀྱང་ཟོ། དེ་ནས་ཕྱི་དྲོ་ང་ཚོ་རྒྱ་ཁོག་གི་སྟོན་མོ་ཡོད་ལ་ཞབས་བྲོ་ཡང་འཁྲབ་རྒྱུ་ཡོད”ཟེར། དེ་ནས་ང་ཚོས་སེམས་པ་ལྷོད་ལ་ཕབ་ནས་ཕན་ཚུན་དབར་སྐད་ཆ་ཤབ་ཤུབ་ཤོད་འགོ་ཚུགས། ང་ཚོས་རང་ཉིད་མདུན་གྱི་མངར་ཆ་ཟ་བ་དང་འཐུང་ཆ་འཐུང་བ་མ་ཟད། ལ་ལས་ཕོར་པར་བླུགས་པའི་གྲོ་ཞོ་རྣམས་ཞིམ་མདོག་ཁ་པོས་ལྡག་གི་འདུག སློབ་མ་མང་ཆེ་བས་ཚོ་དང་ཚོ་བྱས་ཏེ་མགོ་བོ་ནང་འགུག་གིས་རང་ཉིད་ཀྱི་སློབ་གྲྭའི་གནས་ཚུལ་སྐོར་ཤོད་རེས་བྱེད་ཀྱི་འདུག ང་ཚོ་སྒོར་སྒོར་བྱས་ཏེ་ཏག་སེ་བརྒྱབ་པ་ཡིན། གལ་ཏེ་སུ་ཞིག་ཕམ་ན་དེས་མི་གཞན་གྱིས་བཏོན་པའི་རེ་བ་ལྟར་ལས་འགན་ལེགས་སྒྲུབ་ཐུབ་པ་བྱེད་དགོས་ཀྱི་ཡོད།
དེ་ལྟར་ཚང་མ་རྩེད་མོར་མགོ་འཁོར་བཞིན་སྡོད་སྐབས། བུད་མེད་མང་པོ་ཞིག་གིས་ཕྱི་དྲོའི་ཁ་ལག་ཁྱེར་ནས་ནང་དུ་འཛུལ་བྱུང་། ཁོ་ཚོས་སྐད་ཆེན་པོས། “ཕྲུ་གུ་ཚོ་རྒྱ་ཁོག་བཟའ་བར་ཤོག”ཟེར། ང་ཚོས་སྒྲོག་ཙེ་རེ་རེའི་སྒང་ལ་རྒྱ་ཁོག་གཞོང་པ་རེ་བཞག་ཅིང་། ཕྲུ་གུ་བདུན་བརྒྱད་ཀྱིས་བསྐོར་ནས་ཟོས་པ་ཡིན། མི་རེའི་ལག་ནང་དུ་འཐུང་ཆ་རེ་བཟུང་ཞིང་། གཞོགས་གཅིག་ནས་ཁ་ཚ་ཅན་གྱི་ཟ་མ་ཟ་བ་དང་། གཞོགས་གཞན་ཞིག་ནས་ཁ་ཚ་འཇོམས་བྱེད་ཀྱི་འཐུང་ཆ་གྲང་མོ་འཐུང་། རིག་གནས་ཁང་ཡོངས་རྫོགས་དགའ་སྤྲོའི་རྣམ་པས་ཁེངས་ཤིང་གད་མོའི་དགོད་སྒྲས་ཁྱབ། ང་ཚོ་ཟས་ཟོས་རྗེས་མཉམ་དུ་ཞབས་བྲོ་འཁྲབ་པ་དང་། གླུ་དབྱངས་ལེན་པ་བཅས་བྱས། བུ་མོ་ཆེ་བ་དེ་ཚོས་མདུན་ནས་ཞབས་བྲོ་འཁྲབ་པ་དང་། ང་ཚོས་རྒྱབ་ནས་ཁོ་ཚོ་ལ་ལད་ཟློས་ཀྱིས་འཁྲབ་པ་ཡིན། ཕྲུ་གུ་ཚང་མས་ཕྱོགས་གཅིག་ནས་གླུ་གར་ལ་རོལ་ཞིང་ཕྱོགས་གཞན་ཞིག་ནས་ཁ་པར་བླངས་ཏེ་ཉིན་འདིའི་བདེ་སྐྱིད་ཀྱི་རྣམ་པ་དྲན་རྟེན་དུ་ཉར་བཞིན་འདུག
དུས་ཚོད་ནི་ཇི་འདྲའི་འགྲོ་མགྱོགས་པ་ལ་ཨང་། ཉིན་གཅིག་གི་མཉམ་འཛོམས་འཚོ་བ་ཡང་དེ་ལྟར་མཇུག་བསྒྲིལ་སོང་། ངས་ཚང་མའི་གདོང་གི་འཛུམ་མདངས་དེ་མཐོང་དུས། སེམས་སུ་དུས་ཚོད་ཅེས་པ་འདི་འགྲོ་རྒྱུ་མེད་པའམ་འདི་ལས་དལ་ཙམ་དང་ང་ཚོ་ནམ་ཡང་རྒས་རྒྱུ་མེད་ན་སྐྱིད་པ་ལ་ཨང་བསམས་བྱུང་། །
འབྲི་རུ་རྫོང་སློབ་འབྲིང་དང་པོའི་ལོ་རིམ༧（༤）
ཟུར་ཁྲིད་དགེ་རྒན། དགའ་བཟང་།
