སློབ་མ་ཚོའི་ཁྲིམས་སྐྱོང་འདུ་ཤེས་དང་རང་ཉིད་ལ་སྲུང་སྐྱོང་བྱེད་པའི་ནུས་པ་སྔར་བས་ཆེ་རུ་གཏོང་བ་དང་། ན་སོ་དར་ལ་མ་བབས་པའི་མིར་རང་འགུལ་ངང་ཁྲིམས་སྲུང་བར་ཁྲིད་སྟོན་ཧུར་ཐག་བྱེད་པ། སློབ་གྲྭའི་བརྙས་བཅོས་སྔོན་འགོག་ལ་རམ་འདེགས་བྱེད་པ། ཁྲིམས་སྐྱོང་སློབ་གྲྭ་འཛུགས་སྐྲུན་ལ་སྐུལ་འདེད་གཏོང་བ་བཅས་བྱ་ཆེད། ཉེ་ཆར་ལྷ་ས་མཐོ་གསར་ཁུལ་གུང་གཞོན་སྡེ་ཚོགས་ལས་དོན་ཨུ་ལྷན་གྱིས་ལྷ་ས་གྲོང་ཁྱེར་སྣེའུ་དམའ་རིམ་སློབ་འབྲིང་དུ“སློབ་གྲྭའི་གཏུམ་སྤྱོད་མཚམས་འཇོག་བྱེད། སློབ་གྲྭའི་བརྙས་བཅོས་གཏན་འགོག་བྱེད”ཅེས་པ་བརྗོད་དོན་གཙོ་བོར་བྱས་པའི་ན་གཞོན་ལ་སྲུང་སྐྱོང་བྱེད་པའི་དྲིལ་བསྒྲགས་སློབ་གསོའི་བྱེད་སྒོ་སྤེལ་བ་རེད།
བྱེད་སྒོ་སྤེལ་རིང་། ལས་དོན་པས་PPTབརྒྱུད་གྱོད་དཔེ་ངོ་མ་དྲངས་པ་དང་གོ་བདེ་ཤེས་སླའི་སྐད་ཆའི་ཐོག་ནས་སློབ་མའི་ལུས་སེམས་ཀྱི་ཁྱད་ཆོས་དང་ཟུང་འབྲེལ་བྱས་ཏེ། སློབ་མ་ཚོར་བཅའ་ཁྲིམས་ཤེས་བྱར་དབྱེ་ཞིབ་དང་འགྲེལ་བཤད་བརྒྱབ་པ་མ་ཟད། སློབ་གྲྭའི་བརྙས་བཅོས་ཀྱི་མཚན་ཉིད་དང་། སློབ་གྲྭའི་བརྙས་བཅོས་ཀྱི་མཚོན་ཚུལ། ན་སོ་དར་ལ་མ་བབས་པའི་མིའི་བྱ་སྤྱོད་གང་དག་ཁྲིམས་འགལ་ཡིན་པ། ཉེས་གསོག་དང་ཁྲིམས་འགལ་གྱི་འབྲེལ་བ་སོགས་ཀྱི་གནད་དོན་ལ་གསལ་བཤད་ཞིབ་ཕྲ་བརྒྱབ་ནས་སློབ་མ་ཚོར་སློབ་གྲྭའི་བརྙས་བཅོས་གཏན་འགོག་མཐའ་གཅིག་ཏུ་བྱ་རྒྱུའི་ཁྲིད་སྟོན་ཧུར་ཐག་བྱས་པ་དང་སློབ་མ་ཚོར“བརྙས་བཅོས་གཟེད་མཁན”དང་། “གནོད་འཚེ་ཕོག་མཁན” “ཟུར་ལྟས་མཁན”བཅས་མི་བྱེད་པ་དང་རང་རྟོགས་ངང་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ཞུས་ནས་བཅའ་ཁྲིམས་ཀྱི་མཚོན་ཆ་ཡང་དག་སྤྱད་དེ་རང་ངོས་ཀྱི་ཁྲིམས་མཐུན་ཁེ་དབང་སྲུང་དགོས། དེ་དང་དུས་མཚུངས་ལས་དོན་པས་སློབ་མ་ཚོར་རྒྱུན་ལྡན་གྱི་འཚོ་བ་དང་སློབ་སྦྱོང་ཁྲོད་རང་ཉིད་ཀྱི་གཏམ་སྤྱོད་ཚད་ལྡན་དུ་གཏོང་བ་དང་བཅའ་ཁྲིམས་ཀྱི་ཤེས་བྱ་རྒྱུན་ཆད་མེད་པར་སློབ་སྦྱོང་བྱས་ཏེ་སྒྲིག་བཀུར་ཁྲིམས་སྲུང་དང་ཁྲིམས་ཤེས་པའི་དུས་རབས་གསར་པའི་ན་གཞོན་བཟང་པོ་ཞིག་བྱེད་དགོས་པའི་བླང་བྱ་བཏོན་པ་རེད།
བོད་ལྗོངས་ཉིན་རེའི་ཚགས་པར་ལས་དྲངས།
