རྒྱལ་ཁབ་བདེ་འཇགས་ཉིན་མོར་སྡེ་ཚོགས་ཆབ་མདོ་གྲོང་ཨུད་དང་ཆབ་མདོ་གྲོང་ཁྱེར་ལོ་ཆུང་གདོང་ལེན་ལས་དོན་ཨུ་ལྷན་གྱིས་བརྗོད་དོན་གཙོ་བོའི་རུ་ཁག་ཉིན་མོའི་བྱེད་སྒོ་སྤེལ་བ།

2025ལོའི་ཟླ་4ཚེས་15ཉིན་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་བཙུགས་ནས་ལོ་10འཁོར་བར་སྡེ་ཚོགས་ཆབ་མདོ་གྲོང་ཁྱེར་གྲོང་ཨུད། ཆབ་མདོ་གྲོང་ཁྱེར་ལོ་ཆུང་གདོང་ལེན་ལས་དོན་ཨུ་ལྷན་གྱིས་གྲོང་ཁྱེར་རྒྱལ་ཁབ་བདེ་འཇགས་ཅུས་དང་མཉམ་འབྲེལ་ཐོག་ཆབ་མདོ་གྲོང་ཁྱེར་དམའ་རིམ་སློབ་འབྲིང་གསུམ་པར་ཕེབས་ནས“རྒྱལ་ཁབ་བདེ་འཇགས“བྱིས་པས”མཉམ་སྲུང་བྱེད་ཅེས་པའི་བརྗོད་དོན་གཙོ་བོའི་རུ་ཁག་ཉིན་མོའི་བྱེད་སྒོ་སྤེལ་བས་ལོ་ཆུང་གདོང་ལེན་རུ་མི་200ལྷག་ཙམ་ལ་ཁྱབ་ཡོད་པ་རེད།

བྱེད་སྒོ་སྤེལ་ཡུལ་དུ་ཆབ་མདོ་གྲོང་ཁྱེར་རྒྱལ་ཁབ་བདེ་འཇགས་ཅུས་ཀྱི་ལས་བྱེད་པ་དང་ཉེན་རྟོག་པས་ལོ་ཆུང་གདོང་ལེན་རུ་མིར“རྒྱལ་ཁབ་བདེ་འཇགས་ཤེས་བྱ་སློབ་གྲྭར་ཁྱབ་པའི”ཆེད་དོན་དྲིལ་བསྒྲགས་བྱས་ཏེ། སྤྱི་ཡོངས་ཀྱིས་རྒྱལ་ཁབ་བདེ་འཇགས་ཀྱི་ལྟེ་བའི་སྲོག་ཤིང་གི་གོ་དོན་དང་དོན་སྙིང་གལ་ཆེན། ལོ་ཆུང་གདོང་ལེན་རུ་ཁག་གིས་རྒྱལ་ཁབ་བདེ་འཇགས་སྲུང་སྐྱོང་བྱེད་པའི་འགན་འཁྲི་དང་འོས་འགན་བཅས་ལ་དམིགས་ནས། རྒྱལ་གཅེས་རིང་ལུགས་ཀྱི་སློབ་གསོ་དང་རྒྱལ་ཁབ་བདེ་འཇགས་ཀྱི་འདུ་ཤེས་མཉམ་འདྲེས་གསོ་སྐྱོང་ཐད་དོན་དངོས་ཀྱི་གྱོད་དཔེ་དང་ཟུང་འབྲེལ་བྱས་ནས་རྒྱལ་ཁབ་བདེ་འཇགས་ཀྱི་ཁྲིམས་ལུགས་ཁྲིམས་སྲོལ་དང་། སྤྱི་དམངས་ཀྱི་འོས་འགན་དེ་བཞིན་གཞོན་ནུ་ལོ་ཆུང་གིས་རྒྱལ་ཁབ་བདེ་འཇགས་སྲུང་སྐྱོང་ཇི་ལྟར་བྱེད་དགོས་པའི་སྐོར་གཙོ་གནད་དུ་བཟུང་ནས་འགྲེལ་བཤད་བྱས་པ་རེད། དེ་དང་ཆབས་ཅིག་དང་བླངས་ཟུར་ཁྲིད་པས “སྔོན་འགོག་གཙོར་འཛིན་”པའི་ལས་དོན་བྱེད་ཕྱོགས་ལ་དམ་པོར་དམིགས་ནས། གཞོན་ནུ་ལོ་ཆུང་གི་ཁྱུ་འདུས་ཁྱད་ཆོས་དང་འཚམ་པའི་རོལ་རྩེད་ཀྱི་དྲིས་ལན་རྣམ་པའི་ཐོག་ནས་ཕྲུ་གུ་ཚོའི་སེམས་ཀྱི་ནང་དུ་རྒྱལ་ཁབ་བདེ་འཇགས་ཀྱི་ས་བོན་འཛུགས་པར་བྱས་ཡོད།

ལོ་ཆུང་གདོང་ལེན་རུ་ཁག་གི་རུ་མི་བསྟན་འཛིན་ཚེ་རིང་གིས་རང་ཉིད་ནི་སྔོན་ཐོན་རུ་མི་ཞིག་ཡིན་པའི་ངོས་ནས་ཉེ་འགྲམ་གྱི་དོན་དག་ཆུང་ཆུང་ནས་འགོ་བརྩམས་ཏེ། སློབ་སྦྱོང་དང་འཚོ་བར་བླང་བྱ་དང་རེ་བ་ནན་པོ་བཅངས་ནས་རང་རྟོགས་ངང་རྒྱལ་ཁབ་ཀྱི་བདེ་འཇགས་སྒྲིག་ཁྲིམས་དང་སྒྲིག་སྲོལ་ལམ་ལུགས་ཁག་ལ་བརྩི་སྲུང་ཡག་པོ་བྱས་ཏེ་རྒྱལ་ཁབ་ཀྱི་གསང་བ་སྲུང་འཛིན་བྱེད་ཀྱི་ཡིན་ཞེས་བཤད།

བསོད་བསྟན་གྱིས་བསྒྱུར།