西藏青年报藏文版རྩོམ་རིག་དགའ་ཚལ། ༄༅། །ངའི་ཕ་ཡུལ་གྱི་གཟི་བརྗིད། ༄༅། །ལྷ་གདོང་ཤན་ཁའི་རླུང་དར་བལྟས་པའི་མྱོང་ཚོར།

放大 缩小 默认

༄༅། །ངའི་ཕ་ཡུལ་གྱི་གཟི་བརྗིད།

□ 作者 ལྷ་མོ་དབྱངས་འཛོམས།

ཡར་ཀླུང་གཙང་པོའི་ཆུ་མོ་ནི་རི་བོ་སྔོན་པོའི་འདབས་ནས་ལོ་ཟླའི་འགྱུར་འགྲོས་དང་བསྟུན་ཏེ་དལ་གྱིས་འབབ་ཀྱིན་ཡོད། ལོ་བཅུའི་དུས་ཚོད་ནི་མཛུབ་མོ་འགུལ་ཙམ་གྱིས་འདས་སོང་མོད། ངའི་ཕ་ཡུལ་ལྷོ་ཁ་ནི་དུས་རབས་གསར་པའི་རླུང་འཚུབ་ཁྲོད་ཉམས་འགྱུར་གསར་པ་བཞད་ཅིང་། གནམ་ས་བློ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད། ངའི་ཁྱིམ་ཚང་ཆུང་ཆུང་འདི་ཡང་ས་གཞི་འདིའི་འཕེལ་རྒྱས་ཀྱི་གོམ་སྟབས་དང་མཉམ་དུ་འཚར་ལོངས་བྱུང་སྟེ། དཀའ་ངལ་དང་ལྡན་པའི་འཚོ་བ་ནས་བདེ་སྐྱིད་ལྡན་པའི་འཚོ་བར་འགྱུར་ལྡོག་བྱུང་ཡོད། ལོ་ཟླའི་ཁྲོད་སྦས་པའི་དོན་ཆུང་རིགས་ཀྱིས་ལྷོ་ཁའི་ལོ་བཅུའི་འགྱུར་ལྡོག་གི་མཚོན་དོན་ཆེན་པོ་དེ་བརྗོད་ཀྱིན་ཡོད།

ལོ་བཅུའི་སྔོན་ལ། ངའི་དྲན་ཤེས་ཀྱི་ཁྱིམ་ནི་ས་ཕག་ལས་བརྩིགས་པའི་ཁང་པ་དམའ་ཞིང་མུན་པ་འཐིབས་པ་ཞིག་ཡིན། ལྕགས་ཐབ་ཀྱི་དུ་བས་གྱང་ངོས་ནག་པོར་བཏང་ཡོད་ལ། ཆར་པ་འབབ་སྐབས་ཁང་པའི་ཐོག་ཁ་ནས་ཆུ་འཛག་གིན་ཡོད། ཨ་མས་ལུག་ལེབ་དང་ཟོ་བ་ཁྱེར་ནས་ཆུ་བསྡུ་དགོས་པ་དང་། ཆུ་ཐིགས་ཀྱི་སྒྲས་ང་གཉིད་ལས་སད་པ། ཁྱིམ་གྱི་དངོས་པོ་རིན་ཐང་ཆེ་ཤོས་ནི་བརྙན་འཕྲིན་ནག་པོ་རྙིང་པ་དེ་རང་ཡིན་ལ། སྤོ་བོས་ལྡུམ་རར་བསྡད་དེ་རང་གིས་བཙོས་པའི་ནས་ཆང་འཐུང་ཞིང་། དབུགས་རིང་འབྱིན་བཞིན་དུ་“གལ་སྲིད་འཚོ་བ་ཅུང་ཙམ་ཡག་ཏུ་ཕྱིན་ན། ང་ཚོས་ཀྱང་ཕྱི་རོལ་གྱི་འཇིག་རྟེན་ལ་ལྟ་ཐུབ་པར་འགྱུར་”ཞེས་ཟེར། སྐབས་དེར་ཕ་མ་གཉིས་ཉིན་གང་པོར་ཞིང་ཁར་ལས་ཀ་བྱས་ཏེ། ནས་འདེབས་པ་དང་གཡག་གཉིས་གསོས་ནས་ལོ་གང་པོར་ཉི་ཆར་འོག་ཏུ་དཀའ་ལས་བརྒྱབ་ཀྱང་འཚོ་བ་འཁོལ་ཙམ་ལས་མེད། སྒོ་ཁ་ནི་འདམ་རྫབ་ཀྱིས་ཁེངས་པའི་ལམ་ཞིག་ཡིན་པས། ཆར་པ་བབས་རྗེས་འགྲོ་ཐབས་བྲལ། གྲོང་རྡལ་གྱི་སློབ་གྲྭར་འགྲོ་དགོས་ན་འདམ་རྫབ་རྡོག་ཐོ་རྒྱག་བཞིན་ཆུ་ཚོད་གཅིག་ལྷག་ཙམ་འགྲོ་དགོས། དགུན་ཁའི་རླུང་གྲང་གིས་གདོང་ལ་གཞུས་པ་དེ་གྲི་རྣོན་པོ་ལྟར་ན་ཟུག་ཆེ། ངས་རྟག་ཏུ་ཁྱིམ་ལ་ཁང་པ་གསར་པོ་ཞིག་དང་ལམ་ཡག་པོ་ཞིག་ཡོད་པར་སྨོན་ལམ་འདེབས་མོད། སྐབས་དེར་དེ་ནི་སྨོན་པ་ཆུང་ཆུང་ཞིག་ལས་མེད།

ལོ་བཅུའི་རིང་ལ། ལྷོ་ཁའི་འཕེལ་རྒྱས་ཀྱི་གོམ་སྟབས་ཇེ་མགྱོགས་སུ་ཕྱིན་པ་དང་། ངའི་ཁྱིམ་གྱི་འཚོ་བའང་གོང་དུ་འཕེལ། སེམས་ལ་འཕྲད་པའི་དོན་ཆུང་ཞིག་གིས་ང་ལ་འགྱུར་ལྡོག་དེ་དངོས་སུ་ཚོར་དུ་བཅུག སྤོ་བོས་ཚེ་གང་པོར་གསོག་འཇོག་བྱས་པའི་ཆང་བཙོ་བའི་རྩལ་དེ། སྔོན་ཆད་ནི་རང་ཁྱིམ་དུ་འཐུང་བ་དང་ཉེ་འཁོར་ལ་སྟེར་བ་ཙམ་ཡིན་མོད། ད་ལྟ་ཁྱིམ་གྱི་“ཕྱུག་འགྱུར་དངོས་པོ་”ཞིག་ཏུ་གྱུར་ཡོད། ཕ་ཡུལ་དུ་སྐྱེ་ཁམས་ཡུལ་སྐོར་གོང་དུ་སྤེལ་བས། ལྷོ་ཁར་ཡུལ་སྐོར་དུ་ཡོང་མཁན་མང་དུ་ཕྱིན་ཏེ། ཕ་མ་གཉིས་ཀྱིས་སྲིད་ཇུས་ཀྱི་རླུང་རྟ་བསྡུས་ནས་ཁྱིམ་གསར་པ་དེ་མགྲོན་ཁང་ཆུང་ཆུང་ཞིག་ཏུ་འགྱུར་བ་དང་། སྤོ་བོའི་ནས་ཆང་ཡང་མགྲོན་པོ་ཚོར་བཤམས། ཡུལ་སྐོར་བས་ནས་ཆང་དེ་འཐུང་རྗེས་ཚང་མས་བསྟོད་བསྔགས་བྱས་ཏེ་ཉོ་བར་བརྩོན། རྗེས་སུ་གྲོང་ཚོས་ང་ཚོར་བཟོ་གྲྭ་ཆུང་ཆུང་གི་ཆོག་མཆན་རག་པར་རོགས་རམ་བྱས་པས། སྤོ་བོས་བཙོས་པའི་ནས་ཆང་ལ་“ལྷོ་ཁ་ཡར་ཀླུང་”ཞེས་པའི་རྟགས་བཀོད་དེ། དྲ་ཐོག་ཚོང་ལས་བརྒྱུད་རྒྱལ་ཡོངས་སུ་བཙོངས། སྔོན་ཆད་ཆང་བཙོ་བ་ལས་མི་ཤེས་པའི་སྤོ་བོ་ད་ལྟ་ཉིན་རྟག་པར་འཛུམ་མདངས་དང་བཅས། མི་རེ་རེར་“ང་རྒན་པོ་འདིའི་རྩལ་གྱིས་ཁྱིམ་ལ་དངུལ་བཟོ་ཐུབ་པ་འདི་ནི། སྔོན་ཆད་བསམ་ཡུལ་ལས་འདས་པ་ཞིག་རེད་”ཅེས་བརྗོད་ཀྱིན་ཡོད།

ལོ་བཅུའི་རིང་ལ། སྡོད་ཁང་གི་འགྱུར་ལྡོག་ནི་དེ་བས་ཀྱང་ཆེ། ང་ཚོར་བོད་ལུགས་ཀྱི་ཁང་པ་གསར་པ་བརྩིགས་ཏེ། རྩིག་པ་དམར་པོ་དང་གསེར་གྱི་ཐོག་ཁ་ཅན་ཡིན་ལ། སྒོ་ར་ཡངས་ཤིང་ཁང་པའི་ནང་དུ་ས་གདན་ལེགས་པོ་བཏིང་བ་དང་། དྲོད་བཏང་བའི་སྒྲིག་ཆས་ཀྱང་ཡོད་པས། དགུན་ཁ་ལྕགས་ཐབ་ཟུར་དུ་འཁུམས་ནས་སྡོད་མི་དགོས། སྡོད་ཁང་དུ་བརྙན་འཕྲིན་ཆེན་པོ་དང་། འཁྱག་སྒམ། འཁྲུས་ཆས་ཆོགས་ཀྱི་ཡོ་ཆས་ཡོངས་སུ་ཚང་། ཨ་མས་ལག་གིས་གོས་འཁྲུ་མི་དགོས་པ་དང་། པ་ལགས་ཀྱིས་ཀྱང་རླངས་འཁོར་ཆུང་ཆུང་ཉོས་པས། ལས་ཀ་སྒྲུབ་པ་དང་ང་སློབ་གྲྭར་བསྐྱལ་བར་སྐར་མ་འགའ་ལས་མི་དགོས། སྔོན་ཆད་ཀྱི་འདམ་རྫབ་ལམ་དེ་གཞུང་ལམ་སྣུམ་ནག་ཅན་དུ་གྱུར་པ་དང་། སྲང་ལམ་གྱི་གློག་སྒྲོན་མཚན་མོར་འོད་ཀྱིས་ཁེངས། གྲོང་ཚོར་སྤྱི་སྤྱོད་རླངས་འཁོར་ཤར་གཏོང་ཐུབ་པ་དང་སློབ་ཐོན་ལག་འཁྱེར་དང་དྲ་ཐོག་ནས་ཉོས་པའི་དངོས་པོ་སོགས་སྒོ་ཁར་སྐྱེལ་གྱིན་ཡོད། ངས་སློབ་གྲྭ་གསར་པའི་ནང་དུ་འཚོ་བ་སྐྱེལ་གྱིན་ཡོད་ལ། དགེ་རྒན་དང་མཉམ་དུ་གློག་ཀླད་དང་རི་མོ་སློབ་ཐུབ་སྟེ། སྔོན་ཆད་བསམ་ཡུལ་ལས་འདས་པའི་དངོས་པོ་མང་པོ་མཐོང་ཐུབ།

ལོ་བཅུའི་རིང་ལ། ཁྱིམ་མི་ཚོའི་འཚོ་བ་དེ་བས་ལྷོད་ཅིང་སྐྱིད། དགོང་མོ་ཕ་མ་གཉིས་ཀྱིས་སྒོ་རར་མཐོ་སྒང་གི་མེ་ཏོག་ལ་བདག་གཅེས་བྱེད་པ་དང་། སྤོ་བོས་ཡུལ་སྐོར་བ་རྣམས་ལྷོ་ཁའི་གཏམ་རྒྱུད་གླེང་ཞིང་། ནས་ཆང་གང་བླུགས་ཏེ་སྐྱིད་སྣང་གིས་ཁེངས། གཟའ་མཇུག་ཏུ་པ་ལགས་ཀྱིས་རླངས་འཁོར་བཏང་སྟེ་ཁྱིམ་མི་ཡོངས་ཡར་ཀླུང་གཙང་པོའི་འགྲམ་དུ་འཆམ་འཆམ་ལ་འགྲོ་བ་དང་། རི་བོ་སྔོན་པོ་དང་ཆུ་མོ་དྭངས་མོ་ལ་ལྟ་བ་དང་། ཡུལ་སྐོར་བ་མང་པོ་དང་། གྲོང་ཚོའི་ནང་ཁང་གསར་རིམ་པ་བཞིན་བརྩིགས་པས་ཕ་ཡུལ་གྱི་ཡོད་ཚད་ལ་འགྱུར་ལྡོག་ཆེན་པོ་བྱུང་ཡོད། སྔོན་ཆད་འཚོ་བའི་སྐོར་ལ་བློ་འཚབ་བྱེད་པའི་ཕ་མ་གཉིས་ལ། ད་ལྟ་འཛུམ་མདངས་ཇེ་མང་དུ་ཕྱིན་ཡོད་ལ། སྤོ་བོའི་ནས་ཆང་གི་དྲི་ཞིམ་དེ་སྒོ་ར་ཧྲིལ་པོར་ཁྱབ་སྟེ། ང་ཚོའི་ཁྱིམ་གྱི་བདེ་སྐྱིད་ཀྱི་རོ་མངར་ཡང་དེ་ལས་མངོན།

ལོ་བཅུའི་རིང་ལ། ང་ནི་བྱིས་པ་གླེན་པ་ཞིག་ནས་གཞོན་ནུ་གོ་རྟོགས་ལྡན་པའི་ན་གཞོན་ཞིག་ཏུ་འཚར་ལོངས་བྱུང་ཡོད། ངའི་ཁྱིམ་ནི་ས་ཕག་ཁང་པ་ནས་ཁང་པ་གསར་པར་སྤོས་ཡོད་ལ། གནམ་གཤིས་ལ་བརྟེན་པའི་འཚོ་བ་ནས་ཐོན་ལས་ལ་ཁ་ཕྱོགས་པར་འཕེལ་རྒྱས་བྱུང་ཡོད། ངའི་ཕ་ཡུལ་ལྷོ་ཁ་ནི་རྗེས་ལུས་དང་བཀག་རྒྱ་ཅན་ནས་འུར་ཟིང་ཆེ་ཞིང་དར་རྒྱས་སུ་སོང་ཡོད། ལོ་བཅུ་འདིའི་ནང་འགྱུར་བ་ནི་ཁང་པ་དང་། ལམ་དང་། འཚོ་བ་བཅས་ཕྱོགས་ཡོངས་ལ་ཡིན་ལ། མི་འགྱུར་བ་ནི་ཁྱིམ་མིའི་བརྩེ་བ་དང་། ས་གཞི་འདི་ལ་བཅངས་པའི་དུང་བ་ཡིན།

ཡར་ཀླུང་ས་གཞི་ཉམས་འགྱུར་གསར་པ་ལྡན་ཞིང་། ཁྱིམ་ཆུང་ཆུང་གི་བདེ་སྐྱིད་ཀྱིས་མི་སེམས་དྲོད། ལོ་བཅུ་ནི་མཛེས་པའི་འགོ་ཚུགས་ཙམ་ཡིན་ལ། ངས་ཉིན་བཞིན་ཡར་རྒྱས་སུ་འགྲོ་བའི་ཁྱིམ་དང་མཛེས་སུ་འགྲོ་བའི་ལྷོ་ཁ་ལ་བལྟས་ཏེ། སེམས་ནང་སྤོབས་པས་ཁེངས། ངས་ངེས་པར་དུ་སློབ་སྦྱོང་ཡག་པོ་བྱས་ཏེ་མ་འོངས་པར་ཕ་ཡུལ་འཛུགས་སྐྲུན་བྱེད་པའི་བྱ་གཞག་ནང་ལེགས་སྐྱེས་འཕུལ་ཏེ། སྤོ་བོའི་ནས་ཆང་གི་དྲི་ཞིམ་དེ་དེ་བས་རྒྱང་རིང་པོར་ཁྱབ་པར་བྱས་ཏེ། ངའི་ཁྱིམ་གྱི་བདེ་སྐྱིད་ཀྱི་འཚོ་བ་དེ་ཡུན་རིང་དུ་གནས་པ་དང་། ལྷོ་ཁའི་སང་ཉིན་དེ་བས་མཛེས་ཤིང་འོད་སྟོང་འབར་བ་ཞིག་ཡོང་བར་བྱའོ། །

ལྷོ་ཁ་གྲོང་ཁྱེར་རྒྱ་ཚྭ་རྫོང་སློབ་འབྲིང་ལོ་རིམ༩(༥)

ཟུར་ཁྲིད་དགེ་རྒན། ལྷག་པ་ཚེ་རིང་།

放大 缩小 默认
西藏青年报社出版  |  国内统一刊号:CN54—0006  |  邮发代号:67—11
制作单位:中国西藏青年报  |  所有内容为中国西藏青年报版权所有,未经授权不得复制转载或建立镜像  |  藏ICP备2022000062号
声明