༄༅། །ཡར་རྒྱས་འགྲོ་བཞིན་པའི་སློབ་མས་རང་ཉིད་ལ་ཡིད་ཆེས་བྱེད་པའི་བསམ་པ་གསོ་སྐྱོང་བྱ་ཚུལ་གྱི་སྐོར་གླེང་བ།

མི་ཚེའི་ལམ་བུར་ཞུགས་པའི་སློབ་མ་རྣམས་ནི་ནོར་བུ་བསྙེན་པ་བཞིན་རིན་ཐང་ཆེ་ལ། སློབ་གསོའི་བྱ་བ་ནི་འཇིག་རྟེན་གྱི་མུན་པ་སེལ་བའི་སྒྲོན་མེ་ལྟ་བུ་ཡིན། དེང་གི་དུས་སུ་སློབ་སྦྱོང་གི་གྲུབ་འབྲས་ཞན་ལ་རང་ཉིད་ལ་ཡིད་ཆེས་མེད་པའི་སློབ་མ་རྣམས་ནི་དགེ་རྒན་ཚོས་ལྷག་པར་དུ་སེམས་ཁུར་བྱེད་དགོས་པའི་གཙོ་གནད་ཅིག་ཡིན། སློབ་མ་འདི་དག་ནི་རྒྱུན་དུ་རང་གི་ནུས་པ་ལ་ཐེ་ཚོམ་ཟ་ཞིང་། སྤྱི་ཚོགས་དང་འཛིན་གྲྭའི་ནང་འཚེར་སྣང་བྱེད་པས། ཁོ་ཚོར་ཡིད་ཆེས་ཀྱི་སྙིང་སྟོབས་བསྐྱེད་རྒྱུ་ནི་ཤིན་ཏུ་གལ་འགངས་ཆེ། དེ་ཡང་ས་སྐྱ་ལེགས་བཤད་ལས། རང་ཉིད་དམན་སར་མ་རློམ་ལ། །གཞན་ལ་ཡིད་ཆེས་ལྷག་པར་བྱེད། །རང་ཉིད་མཆོག་ཏུ་མ་རློམ་ལ། །གཞན་གྱི་ལེགས་ཆ་ཀུན་ལ་བསླབ། །ཅེས་གསུངས་པ་ལྟར། རང་ཉིད་ཀྱི་གནས་བབས་དང་ནུས་པ་ངོས་ཟིན་པ་ནི་སློབ་མས་རང་ལ་ཡིད་ཆེས་བྱེད་པའི་རྨང་གཞི་ཡིན།

དང་པོ། དགེ་རྒན་གྱི་བྱམས་བརྩེས་སློབ་མའི་སེམས་ཁམས་ཀྱི་བར་ཐག་ཉེ་རུ་གཏོང་དགོས།

ཡར་རྒྱས་འགྲོ་བཞིན་པའི་སློབ་མ་མང་པོ་ཞིག་ནི་རང་ཉིད་ལ་གྲུབ་འབྲས་ལེགས་པོ་མེད་པའི་དབང་གིས་རང་དམན་གྱི་བསམ་བློ་སྐྱེས་ཡོད། དེ་བས་དགེ་རྒན་གྱིས་སློབ་མ་སུ་ཡིན་ཡང་འདྲ་མཉམ་གྱི་བལྟ་བ་དང་། ལྷད་མེད་པའི་བརྩེ་སེམས་ཀྱི་མིག་གདའ་དང་ཐུགས་ཁུར་གྱིས་ཁོ་ཚོའི་སེམས་ཀྱི་གསང་སྒོ་འབྱེད་དགོས། སློབ་ཁྲིད་ཀྱི་སྐབས་སུ་བརྩེ་བ་ལྡན་པའི་འཛུམ་མདངས་དང་། སྐུལ་མ་གཏོང་བའི་སྐད་ཆས་སློབ་མའི་སློབ་སྦྱོང་བྱེད་སེམས་ལ་སྐུལ་སློང་བྱེད་དགོས། སློབ་མའི་ལེགས་ཆ་ཆུང་ཙག་རེ་བྱུང་ཡང་དུས་ཐོག་ཏུ་བསྔགས་བརྗོད་དང་། བྱ་དགའ་ཆུང་ཙག་སྤྲོད་པ་དེས་ཁོ་ཚོའི་ཡིད་ཆེས་གོང་མཐོར་གཏོང་ཐུབ།

གཉིས་པ། རང་དམན་གྱི་བསམ་བློ་སེལ་བའི་སྒོ་ནས་རང་ལ་མཐོང་ཆེན་བྱེད་དགོས།

སློབ་མའི་ནུས་པ་མི་འདང་བ་མ་ཡིན་པར་རང་གིས་རང་ལ་གདེང་འཇོག་ཡང་དག་པ་ཞིག་བྱེད་མི་ཐུབ་པ་དེ་ནི་ཆེས་ཆེ་བའི་འགོག་རྐྱེན་ཡིན། ཁོ་ཚོས་ནམ་རྒྱུན་རང་གི་སྐྱོན་ཆ་དང་གཞན་གྱི་ལེགས་ཆ་བསྡུར་བས། རང་ཉིད་ནི་ཅི་ཡང་མི་ནུས་པའི་སྣང་བ་སྐྱེས་ཡོང་། དགེ་རྒན་གྱིས་སློབ་མ་རེ་རེའི་ནང་དུ་སྦས་པའི་ཁྱད་ཆོས་རེ་འཚོལ་ཞིབ་བྱེད་དགོས་ལ། ཁོ་ཚོར་རང་ཉིད་ཀྱི་ཐུན་མོང་མ་ཡིན་པའི་ལེགས་ཆ་དེ་དག་ངོ་སྤྲོད་བྱེད་དགོས། དགེ་ལྡན་ལེགས་བཤད་ལས། རང་སྐྱོན་རང་གིས་མ་མཐོང་བར། །གཞན་གྱི་སྐྱོན་ལ་སྨྲ་བ་ལ། །དེ་ཡི་ལྐོག་ཏུ་མི་སྨྲ་ཞིང་། །དེ་ཡི་མདུན་དུ་བསྟོད་པ་ནི། །མཁས་པའི་ལུགས་སུ་གང་ཡང་མིན། །ཞེས་པ་ལྟར། སློབ་མས་རང་གི་སྐྱོན་ཆ་ངོས་ཟིན་ཏེ་ལེགས་བཅོས་དང་། ལེགས་ཆ་དར་སྤེལ་གཏོང་ཐུབ་པའི་སེམས་ཤུགས་སྐྱེད་དགོས། རང་ཉིད་ལ་མཐོང་ཆེན་བྱེད་དུ་བཅུག་ཚེ། དེ་ནི་ཁོ་ཚོས་རང་ལ་ཡིད་ཆེས་བྱེད་པའི་རྨང་གཞི་ཡིན་ལ། རང་དམན་གྱི་བསམ་བློ་གཙང་སེལ་བྱེད་པའི་ཐབས་ལམ་ཡང་ཡིན།

གསུམ་པ། སྤོབས་པ་སྦྱིན་པའི་སྒོ་ནས་གོ་སྐབས་བཟང་པོ་བསྐྲུན་དགོས།

ཡིད་ཆེས་ནི་ལག་ལེན་གྱི་ཁྲོད་ནས་ཐོབ་པ་ཞིག་ཡིན། དེ་བས་དགེ་རྒན་གྱིས་སློབ་མ་རྣམས་སློབ་གྲྭའི་བྱེད་སྒོ་སྣ་ཚོགས་ནང་ཞུགས་རྒྱུར་སྐུལ་ལྕག་གཏོང་དགོས། དཔེར་ན། ཡིག་གཟུགས་དང་རི་མོ་འབྲི་བའི་འགྲན་བསྡུར་ནང་ཞུགས་སུ་འཇུག་པ་དང་། ལེགས་གྲུབ་བྱུང་བའི་སྐབས་སུ་གཟི་བརྗིད་མངོན་པར་བྱེད་པ། སློབ་གསེང་གི་བྱེད་སྒོ་སྣ་ཚོགས་སྤེལ་བ་སོགས་ཡིན། ལྷག་པར་དུ་སློབ་མ་ཚོ་ཚོགས་ཆུང་ཆུང་དུ་མར་དབྱེ་ནས་ཙུའུ་ཀྲང་གི་འགན་འཁུར་དུ་བཅུག་ན། ཁོ་ཚོར་འགན་འཁུར་བའི་སེམས་པ་སྐྱེ་བ་དང་། བློ་ཁོག་ཆེན་པོས་སོ་སོའི་འཇོན་ཐང་ངོམ་ཐུབ་པས། ཡུན་རིང་པོར་བྱེད་སྒོ་དེ་དག་བརྒྱུད་ནས་རང་ལ་ཡིད་ཆེས་བྱེད་པའི་བསམ་པ་ཇེ་ཟབ་ཏུ་གཏོང་ཐུབ། འཇོན་ཐང་ནི་ལས་ཀའི་ཁྲོད་ནས་འཕེལ་རྒྱས་འགྲོ་བ་ཡིན།

བཞི་པ། ནོར་འཛོལ་ལ་གུ་ཡངས་དང་འབད་བརྩོན་ལ་བསྔགས་བརྗོད་གནང་བ།

སློབ་སྦྱོང་གི་བརྒྱུད་རིམ་ཁྲོད་ནོར་འཛོལ་ཡོང་བ་ནི་རྒྱུན་ལྡན་ཞིག་ཡིན། དགེ་རྒན་གྱིས་སློབ་མའི་ནོར་འཛོལ་ལ་དགག་པ་བྱེད་པ་ལས་ལྡོག་སྟེ། ནོར་འཛོལ་དེ་ལས་རིག་པ་གསར་པ་ཇི་ལྟར་བླངས་ཚུལ་ལ་ཁྲིད་སྟོན་བྱེད་དགོས། སློབ་མ་རྣམས་ལ་སྐྱོན་བརྗོད་གཏོང་རྒྱུ་དེ་ནི་དྲང་ལུགས་མིན་པར་མཐོང་སྟེ། ཁོང་ཚོའི་སེམས་སུ་འཇིགས་སྣང་བསྐྱེད་པ་མ་ཟད། ཡིད་ཆེས་ཀྱང་ཉམས་རྒུད་དུ་གཏོང་། དེའི་ཚབ་ཏུ་ཁོ་ཚོའི་འབད་བརྩོན་གྱི་ཚད་གཞིར་བསྔགས་པ་བརྗོད་དགོས། སློབ་མས་སྔོན་ཆད་དང་བསྡུར་ན་ཡར་རྒྱས་ཅུང་ཟད་ཙམ་བྱུང་ཡང་། དེ་ཉིད་ཆེས་རིན་ཐང་ལྡན་པའི་ལེགས་གྲུབ་ཅིག་ཏུ་བརྩིས་ནས་བསྟོད་བསྔགས་བྱེད་དགོས། འདིས་སློབ་མའི་སེམས་སུ་རང་ཉིད་ཀྱང་རིམ་བཞིན་ཡར་རྒྱས་འགྲོ་ཐུབ་པའི་གདེང་ཚོད་ཅིག་བསྐྱེད་ངེས།

ལྔ་པ། ཁྱིམ་བདག་དང་མཉམ་དུ་སློབ་མའི་འཕེལ་རྒྱས་ལ་སྐུལ་འདེད་བྱེད་པ།

དགེ་རྒན་གྱི་ནུས་པ་གཅིག་པུས་མི་འདང་བས། ཁྱིམ་བདག་གིས་ཀྱང་སློབ་མའི་འཕེལ་རྒྱས་ལ་དོ་ཁུར་བྱེད་དགོས། དགེ་རྒན་གྱིས་ཁྱིམ་བདག་དང་བརྒྱུད་རིམ་ལྡན་པའི་སྒོ་ནས་འབྲེལ་བ་བྱེད་པ་དང་། སློབ་མའི་ཡར་རྒྱས་ཀྱི་གནས་ཚུལ་དུས་ཐོག་ཏུ་བརྡ་སྦྱོར་བྱེད་དགོས། ཁྱིམ་བདག་གིས་རང་གི་བུ་ཕྲུག་ལ་དགག་པ་བྱེད་པ་ལས་སྐུལ་ལྕག་གཏོང་རྒྱུ་གལ་ཆེ་བའི་ལམ་སྟོན་བྱེད་དགོས། ཁྱིམ་ཚང་གི་ཁོར་ཡུག་བདེ་ཞིང་སྐྱིད་པ་དང་། དགེ་རྒན་གྱི་སྐུལ་ལྕག་ཟུང་དུ་འབྲེལ་བ་ཡིན་ན། སློབ་མ་དེ་དག་གི་རང་ཉིད་ལ་ཡིད་ཆེས་བྱེད་པའི་སེམས་ཤུགས་དེ་ནི་ཆུ་བོ་རི་གཟར་ལས་བབས་པ་བཞིན་ཆད་མེད་དུ་འཕེལ་རྒྱས་འགྲོ་ངེས་ཡིན།

མཐའ་དོན་དུ། སློབ་གསོ་ནི་འདམ་ལས་སྐྱེས་པའི་པདྨ་བཞིན་གཙང་ཞིང་རིན་ཐང་ལྡན་པའི་བྱ་གཞག་ཅིག་ཡིན། ཡར་རྒྱས་འགྲོ་བའི་སློབ་མ་ལ། །ཡིད་ཆེས་གསོ་བའི་སྒྲོན་མེ་སྤར། །ང་ཚོས་བྱམས་བརྩེའི་སྒོ་ནས་ཁོ་ཚོའི་མདུན་ལམ་ལ་རོགས་སྐྱོར་བྱེད་དགོས་ལ། གོ་སྐབས་སྤྲད་དེ་ཁོ་ཚོའི་སེམས་ཀྱི་སྤོབས་པ་དེ་གསོན་པོར་གནས་པར་བྱེད་དགོས། དགེ་རྒན་རྣམས་ཀྱིས་སློབ་མ་རེ་རེའི་དད་སེམས་དེ་དམིགས་བསལ་གྱི་འོད་ཟེར་ལྟར་གསོ་སྐྱོང་བྱེད་ཐུབ་ན། སློབ་མ་དེ་དག་ཚང་མ་མི་ཚེའི་ལམ་བུར་རྒྱལ་ཁ་ལེན་མཁན་དུ་འགྱུར་ངེས་ཡིན། དེ་ནི་དགེ་རྒན་གྱི་མི་ཚེའི་རིན་ཐང་དང་སློབ་གསོའི་དོན་སྙིང་ཡང་ཡིན། སློབ་གསོའི་ལམ་བུ་འདིར་ང་ཚོས་རྒྱུན་མི་ཆད་པའི་འབད་བརྩོན་བྱེད་དགོས་པ་ནི་ནམ་ཡང་གཞལ་ཐབས་མེད་པའི་བཀའ་དྲིན་གྱི་བྱ་གཞག་ཅིག་ལགས་སོ། །

ཁྲེང་ཀོན་ཆུས་ཧའེ་ཁྲེང་སློབ་ཆུང་།