放大
缩小
默认ཟླ་1ཚེས་8ཉིན་2026ལོའི་ལྷ་ས་གྲོང་ཁྱེར་མང་ཚོགས་ཚོགས་པའི་རྩ་འཛུགས་ཀྱིས་གྲོང་ཁྱེར་དང་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྐྱོང་ཆེན་པོར་རོགས་རམ་བྱེད་པའི་ཐབས་ཇུས་བྱ་སྤྱོད་དེ་གནའ་གྲོང་དོ་དམ་ཨུ་ལྷན་གྱི་ཤ་གསར་སྒོ་ར་རུ་སྤེལ་འགོ་ཚུགས་པ་རེད།
ད་ཐེངས་ཀྱི་བྱེད་སྒོ་དེ“མང་ཚོགས་ཀྱི་སྟོབས་ཤུགས་གཅིག་སྡུད་བྱས་ནས་སྡོད་འོས་པའི་ལྷ་ས་ཐུན་མོང་ཐོག་བསྐྲུན་དགོས”ཞེས་པ་བརྗོད་བྱ་གཙོ་བོར་བྱས་པ་དང་། ལྷ་ས་གྲོང་ཁྱེར་དང་གྲོང་གསེབ་ཁོར་ཡུག་ཕྱོགས་བསྡུས་བཅོས་སྐྱོང་ཆེན་པོའི་ཐབས་ཇུས་འགོ་ཁྲིད་ཚོགས་ཆུང་གི་གཞུང་ལས་ཁང་གིས་གཙོ་གཉེར་བྱས་པ་དང་། སྡེ་ཚོགས་ལྷ་ས་གྲོང་ཁྱེར་ཨུ་ལྷན་དང་། གྲོང་ཁྱེར་བཟོ་ཚོགས། གྲོང་ཁྱེར་བུད་མེད་མཉམ་འབྲེལ། བར་སྐོར་གྱི་གནའ་གྲོང་དོ་དམ་ཨུ་ལྷན་བཅས་ཀྱིས་མཉམ་འབྲེལ་ཐོག་སྒྲུབ་འགན་འཁུར་ཏེ། ཕྱོགས་མང་པོའི་འགྲིལ་ཤུགས་སྡོམ་ཤུགས་གཅིག་སྡུད་བྱས་ནས་ལྷ་ས་གྲོང་ཁྱེར་དང་གྲོང་གསེབ་ཀྱི་ཁོར་ཡུག་ལེགས་སུ་གཏོང་བར་མང་ཚོགས་ཀྱི་སྒུལ་ཤུགས་བསྣན་ཡོད།
འགོ་ཚུགས་མཛད་སྒོའི་ཐོག་ལྷ་ས་གྲོང་ཁྱེར་ཨུ་ལྷན་གྱི་ཧྲུའུ་ཅི་གཞོན་པ་ཀྲའོ་ཧུའེ་ཉན་གྱིས་ཤིས་ཚིག་གསུངས་པ་དང་འབྲེལ་གྲོང་ཁྱེར་དང་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྐྱོང་ནི་དམངས་འཚོའི་ལས་གྲྭ་དང་དམངས་སེམས་ཀྱི་ལས་གྲྭ་གལ་ཆེན་ཞིག་ཡིན་པས་སྤྱི་ཚོགས་ཡོངས་ཐུན་མོང་ཐོག་ཞུགས་དགོས་ཞེས་བསྟན་པ་རེད། མང་ཚོགས་ཚོགས་པའི་རྩ་འཛུགས་ནི་ཏང་གིས་མང་ཚོགས་དང་འབྲེལ་བ་བྱེད་པའི་ཟམ་པ་དང་འབྲེལ་ཐག་ལྟ་བུ་ཡིན་པའི་ཆ་ནས། དམིགས་བསལ་གྱི་སྐུལ་སློང་ལེགས་ཆ་དང་རྩ་འཛུགས་ལེགས་ཆ་ལྡན་པས། རང་འགུལ་ངང་འགན་འཁུར་བ། བྱ་སྤྱོད་ཧུར་ཐག་སྤེལ་ནས་ཁྲིད་སྟོན་གྱིས་ལས་བཟོ་བ་དང་། གཞོན་ནུ། བུད་མེད་སོགས་ཀྱི་སྟོབས་ཤུགས་རྒྱ་ཁྱབ་ངང་བཅོས་སྒྲིག་བྱ་སྤྱོད་ཀྱི་འཐབ་ཕྱོགས་སུ་ཞུགས་ནས་གཙང་སྦྲ་དང་། མཛེས་པ། དཔལ་ཡོན་ལྡན་པ་བཅས་ཀྱི་ས་མཐོའི་འཚོ་སྡོད་རུང་བའི་གྲོང་ཁྱེར་འཛུགས་སྐྲུན་བྱ་ཆེད་བློ་གྲོས་དང་སྟོབས་ཤུགས་ལེགས་སྐྱེས་སུ་འབུལ་དགོས། དེ་རྗེས་སུ་སྡེ་ཚོགས་ལྷ་ས་གྲོང་ཁྱེར་ཨུ་ལྷན་གྱི་ཧྲུའུ་ཅི་ཀུའུ་ཞང་ཁྲུའུ་ཡིས་སྒྲོག་སྦྱང་གྲོས་འགོའི་ཡི་གེ་བསྐུར་བར་“ང་ནས་འགོ་བརྩམས་པ་དང་འགྲམ་ནས་འགོ་བཙུགས་ཏེ་དྭངས་གཙང་དང་མཛེས་སྡུག་ལྡན་པའི་ཁྱིམ་གཞིས་ཐུན་མོང་དུ་འཛུགས་རྒྱུའི”འབོད་སྐུལ་གནང་ཡོད། ལྷ་ས་གྲོང་ཁྱེར་གྱི་གཞོན་ནུ་དང་བླངས་ཞབས་ཞུ་རུ་ཁག་གི་འཐུས་མི་དང་གནའ་གྲོང་དོ་དམ་ཨུ་ལྷན་གྱི་སྤྱི་ཚོགས་ལས་བཟོ་པའི་（བུད་མེད་）འཐུས་མིས་སྔ་རྗེས་སུ་ཁོར་ཡུག་བཅོས་སྐྱོང་ནང་ཞུགས་པའི་བློ་བརྟན་འགྱུར་མེད་ཀྱི་ཆོད་སེམས་མངོན་པ་དང་། བྱེད་སྒོའི་ས་གནས་ས་ཐོག་ཏུ་ད་དུང་འཚམས་འདྲིའི་བྱེད་སྒོ་ “གསར་པ་”སྤེལ་ནས་འཐབ་ཕྱོགས་དང་པོའི་བཅོས་སྒྲིག་ནང་ཞུགས་མཁན་ཚོར་ཐུགས་ཁུར་གནང་བ་རེད།
དེའི་རྗེས་སུ་ཁོར་ཡུག་བཅོས་སྐྱོང་དང་ལག་ལེན་བྱེད་སྒོའི་དུས་མཚམས་དངོས་སུ་སྤེལ་འགོ་ཚུགས་ཤིང་། བྱེད་སྒོའི་ནང་ཞུགས་པའི་དཔུང་ཁག་མགྱོགས་མྱུར་ངང་དམིགས་འཛུགས་ས་ཁོངས་སུ་ཁ་ཐོར་བྱས་ནས་ཁོར་ཡུག་གཙང་སྦྲ་དང་། གད་སྙིགས་གཙང་འདྲེན་དཔལ་ཡོན་ཁ་ཏ་སོགས་ཀྱི་ལས་དོན་སྤེལ་ཡོད། ལྷ་ས་གཞོན་ནུའི་དང་བླངས་ཞབས་ཞུ་རུ་ཁག་གི་དང་བླངས་པ་རྣམས་ཀྱིས་གཅིག་གྱུར་གྱི་གྱོན་ཆས་གྱོན་ནས་གཙང་ཕྱགས་ཡོ་བྱད་ཁྱེར་ནས་ཁྲོམ་གཞུང་དང་སྲང་ལམ་དུ་བསྐྱོད་ནས་འཕྲོད་བསྟེན་གྱི་ཁུག་ཀྱོག་གང་ཡང་བསྐྱུར་མེད།
“དང་བླངས་པའི་མིང་ཐོག་ནས་ཁོར་ཡུག་བཅོས་སྐྱོང་ནང་ཞུགས་ཐུབ་པས་ང་ལ་དམིགས་བསལ་དོན་སྙིང་ཡོད་པའི་ཚོར་སྣང་ཡོང་གི་འདུག”གཞོན་ནུ་དང་བླངས་པ་ཝང་ལེ་ཡིས་དཔྲལ་སྟེང་གི་རྔུལ་ཆུ་ཕྱིས་ཏེ་“ང་ཚོས་འབད་བརྩོན་བྱས་པའི་འོག་སྲང་ལམ་གཙང་མ་རུ་གྱུར་པར་བལྟས་ཚེ། གྲོང་མི་རྣམས་ཀྱིས་བསྟོད་བསྔགས་ཀྱི་མིག་མདངས་ལས་ངས་‘ངལ་རྩོལ་གྱིས་མཛེས་སྡུག་གསར་གཏོད་བྱེད་པའི’གནས་ལུགས་དངོས་མྱོང་ཚོར་བྱུང་བས། འབྱུང་འགྱུར་ངས་ཐོག་མཐའ་བར་གསུམ་དུ་དང་བླངས་ཞབས་ཞུའི་ནང་ཞུགས་རྒྱུ་རྒྱུན་འཁྱོངས་བྱས་ནས་གཞོན་ནུའི་སྟོབས་ཤུགས་ལ་བརྟེན་ནས་འཚོ་སྡོད་འོས་པའི་ལྷ་ས་འཛུགས་སྐྲུན་བྱེད་པར་འབུལ་ཤུགས་ཆེ་རུ་གཏོང་རྒྱུ་ཡིན”ཞེས་བཤད་པ་རེད།
བསོད་བསྟན་གྱིས་བསྒྱུར།
放大
缩小
默认
